Ka ki aitotiskeritci Cecoc otarotakana 3 - Kice Manito Ocki Omirwatcimowin

Iriniw ka maskisitc e kikehakaniwitc

¹ Peikwaw e ickwa apita kicikarik, Pien kirika Jean icawakopan kitci aiamihe mikiwamik kitci aiamihatcik e nicto tipahikanearik e ickwa apita kicikarik.

² Peikw nta iriniw taci apikopan pecotcik ickwatemik neta kitci aiamihe mikiwamik. Anihe ickwatem icinikatcikatepan “Ka mirwinakok ickwatem.” Maskisikopan anahwe iriniw. Ekoni ka ki icinakositc ka nitawikitc. Tato kickwa iciwirakaniwikopan neta, kitci ki natotamowatc iriniwa ka pitakeritci neta kitci aiamihe mikiwamik ocoriamiriw.

³ Kek ki wapamew Piena kirika Jeanwa e iti pitakeritci. Ki nataweritamawew coriariw.

⁴ Pien kirika Jean micta kanawapamewok. Aci itew Pien: “Kanawapamicinan.”

⁵ Wewerita kanawapamikowok anihi iriniwa. Iteritamokopan anahwe iriniw: “Ni ka mirikok kekociciriw.”

⁶ Aci Pien itew: “Nama takon coria, nama kaie osawo coria. Aric kotak kekocic ki ka miritin. Pasiko! Pimote tca anahwe otci, Cecoc Krist, Nazareth ka otcitc!”

⁷ Minawatc ki otapiniskenew onihiwinirik, e witcihatc kitci pasikoritci. Tecikotc ki iti mackawisiw nte ositik kaie okonik anahwe ka maskisitc.

⁸ Ki pasikopataw e nanipowitc, nac e iti pimotetc. Ekoni e ici pitaketc neta kitci aiamihe mikiwamik, e witcewatc Piena kirika Jeanwa, e pimotetc, e kwackwackotitc, kirika e mirwatcimatc Kice Manitowa.

⁹ Kaskina nta iriniwok e mitcetitcik ki wapamewok e pimoteritci kirika e mirwatcimaritci Kice Manitowa.

¹⁰ Ka nisitowinawatcik anihi iriniwa, neta ko kitci aiamihe mikiwamik ka apirispana, ickwatemik itekera, “Ka mirwinakok ickwatem” ka icinikaterik, e natotamarispana, ki micta sekamowok kaie ki kockowapamowok aniheriw ka ki ispariritci.

Pien e aiarimwetc kitci aiamihe mikiwamik

¹¹ Pien kirika Jean nama ki otci nakatikowok anihi ka ki kikehakaniwiritci iriniwa. Aci kaskina iriniwa e mitcetiritci pe mowinitikowok neta micta aricapiriw kitci aiamihe mikiwamik, “Galerie de Salomon” ka icinikatcikaterik, e micta mamiskateritamiritci.

¹² Pien ka wapamatc anihi iriniwa e mitcetiritci, ki itew: “Israël iriniwok, kekwan wetci kockowapamoekw e ki kikehakaniwitc anahwe iriniw? Kekwan wetci pe itapiekw e kanawapamiak, mia mitowi ninan tipirawe e ki tipi mackawisiak kitci pimotehakitc anahwe iriniw, kekotc ma osam e ki tipi miro nosanehwakitc Kice Manito kitci ki ici kackitaiak!

¹⁶ Wetci ki mirakaniwitc mackawisiwiniw kitci kikehakaniwitc anahwe iriniw ka wapamekw kaie ka kiskerimekw, osam e asperimototawakaniwitc Cecoc, mictahi e mackawisimakanik oticinikasowin. Ekoni wetci tekaci ki kikehakaniwitc anahwe iriniw, mia ka ici wapatamekw kaie kirawaw.

¹³ Kice Manito, anahwe ka ki kicterimikotc Abrahama, Isaka, Cakopa kaie kaskina kotakihi kitaniskotape kimocominawa, wir ka ki totak kitci kiskeritakonik oticperitakosiwiniw Cecoca, anihi ka ki atoskectakotc. Aric kirawaw, ki ki pakiterimawaw kitci ki nipahikotc cota okimawa, kaie ki ki wepakonawaw nete kice okimak, Pilate ka icinikasoritci, misawatc wir Pilata e iteritamirispana kitci pakitinaritci.

¹⁴ Ki ki wepakonawaw anahwe Ka Kitcitwawisitc, kaie mocak icikowisk ka itatisitc. Meckotc tca ki ki nataweritamawawaw Pilate, kirawaw otci, kitci pakitinatc iriniwa ka ki manohoritci, kipohotowikamikok e tacikerispana.

¹⁵ Ekoni ka ki totamekw. Ki ki nipahawaw anaha ka miriwetc pimatisiwiniw. Aric Kice Manito ki apitcipahew. Ni ki wapamanan ninan tipirawe!”

¹⁷ “Aci aric ni kiskeriten, niwitcicanak, aka e ki otci nisitotamekopanen anihe ka ki totamekw ka wepakonekw Cecoc, kaie wirawaw kokimamiwawok aka e ki otci nisitotakik.

¹⁸ Aric ekoni wetci ki totak Kice Manito tapwe kitci otcitciparinik aniheriw weckatc ka ki itespan kitci ici tipatatamiritci kaskina iriniwa ka nikan tipatcimoritci ka ki pe iciticohwatc. Ki meka itepan, acteriw kitci nekatcitaritci anihi ke pe iciticohwatc ota askik kitci akwacimiweritci.

¹⁹ Kweskatisikw tca, kaie natcikapowictawakw Kice Manito kitci nosanehwekw, kitci ki tca kasihamatakw ka ki ici pactatiekw.

²⁰ Ki ka tca mirikowaw Teperitciketc kitci arwepiekw kitehiwak, kirika ki ka pe iciticahamakowaw Cecoca, anihi aci weckatc ka ki nikan orapamaspan kitci pe iciticohwatc ota askik kitci akwacimitakw.

²¹ Aric anotc, pitama ni, wakwek tacikew anaha Cecoc Krist, nac kitci otcitciparinik aniheriw e kicikarik Kice Manito kitci wecitatc kaskina kekociciriw, mia ocki kitci iteritakonik. Enkweriw meka mia aci weckatc ka ki ici witamakerispana anahweriw onikan tipatcimo irinima e kitcitwawisiritci, weckatc ka ki pe iciticohwatc kitci tipatcimoritci wir otci.

²² Moïse meka ki itepan: ‘Teperitciketc Kikice Manitomiwaw ki ka pe iciticahamakowaw peikw ke nikan tipatcimoritci mitowi nin. Ekota neta ke otcitc, ka otciekw. Ki ka natotawawaw kaskina ke ititakw.

²³ Kaskina awik aka ke natotawatcik anihi ke nikan tipatcimoritci, nama awocamec kata iteritakosiwok Kice Manito otirinima, kaie kata nipahakaniwiwok.’ Deutéronome 18.15-16,18-19

²⁴ Kaskina ka ki pe nikan tipatcimotcik, esko Samuer, nac kaskina kotakihik ka iti pe nikan tipatcimotcik, kaskina aiackotc kaie wirawaw ki pe tipatatamok ohweriw anotc mekwata e isparinik.

²⁵ Kaie kirawaw aci ki pe mirikowinawaw aniheriw ka ki ici nespi tapwetc Kice Manito, ka ki miratc anihi ka ki pe nikan tipatcimoritci kitci witamakeritci. Peikon kaie kirawaw otci aniheriw acotamakewiniw Kice Manito ka ki itactatc kirika kitaniskotape kimocomiwariw, e ki itatc Abrahama: ‘Ke totak kotaniskotape kosimak, ni ka otci cawerimawok kaskina iriniwok e otenwesitcik ota askik.’ Genèse 22.18; 26.4

²⁶ Ekoni wetci kirctamiwaw ki ki pe iciticahamatakw Kice Manito otarotakana kitci natawapamitakw. Ki ki pe iciticahamakowaw kitci cawerimitakw, e wi witcihitakw kitci wepinamekw kipactatowiniwawa, tato neta e taciekw.”