Ka ki aitotiskeritci Cecoc otarotakana 28 - Kice Manito Ocki Omirwatcimowin

Pwar ka iciwepasitc Malte minictikok

¹ Ka ickwa wikotcihoak neta, aka erowek wiec e ki otci ispariak, ni ki witamakowinan, Malte e icinikatek anihe minictikw.

² Ni ki micta miro mihikonanak aniki neta ka taciketcik. E micarik kotowaniw ki ocitawok, osam aci e iti takaiarikipan, acitc e kitcipectanikipan. Kaskina ni ki wicamikonan kitci pe nta awasoak kaie ninan.

³ Pwar ki mawotcitaw nipara otikoniw e wi motcictewepinak. Kinepikwa ki pe sakapikeparihoriw osam e kiciterik. Ki makomiko otcitcik, aka e pakitimikotc.

⁴ Kaskina aniki neta ka taciketcik ka wapamatcik anihi kinepikwa, e akokeritci Pwar otcitcik, aititowakopan: “Anahwe iriniw ketcinatc ki manohotake. Nama meka iterimakaniwiw kitci pimatisitc, kotc e iteritamiritci anihi icpimik ka tacikeritci, icikowisk totamowiniw ka pakitinamiritci, misawatc anotcikwetc kitcikamik e ki otci ocimohitisotc.”

⁵ Pwar ki manapikeparihew kinepikwa neta ickotek. Tekaci nama kiskeritam kitci akositc.

⁶ Aniki kotakihik ka tacikewaspan iteritamwakopan: “Anotcikwetc kata pakicin, kekotc keskat kata nipo.” E ickwa kinowec pehotcik, wapamewakopan aka wiec e ispariritci. Ki meckotci iteritamok, acitc aitewok: “Manitowiw anahwe!”

⁷ Nakewar takonikopan otaski anahwe ka tiperitak neta minictikok. Publius icinikasopan. Mireritamopan e wapamimitc. Nicto kickwa ni ki tacikewanan omikiwamik.

⁸ Publius otawiwa mackociniripan e akosiritci, e kisiswapineritci kaie e sapisowapineritci. Pwar ki natawapamepan anihi iriniwa. Ki aiamihectamawew, e takinatc, acitc e kikehatc.

⁹ Ka ickwa iciwepak, kotakihik akosikanak neta ka tacikewaspan ki pe icawok kaie wirawaw acitc ki kikehakaniwiwok.

¹⁰ Kaskina ni ki wapatahikonan e ici kicterimimitc, acitc apitc ka otcitciparik kitci posiak kitci matcehoak, ni ki mirikonan kaskina kekocic ke apatcitaiak e mekwa maciak.

Rome otenak e takocik Pwar

¹¹ Nicto pisimwa nte ka ickwa tacikeiak neta minictikok, ni ki matcehonan micta tcimanik. Anihe micta tciman icinikatepan “Manitowok ka nicocaniwitcik.” Nte otactanopan Alexandrie otenak, nte e ki piponiciak Malte minictikok.

¹² Ni ki takocatohonan Syracuse otenak. Ekota nta ka tacikeiak nicto kickwa irikik.

¹³ Minawatc kiapatc ni ki matcehonan, e iti rarewaciak nac nete e takocatowak Reggio otenak. Minawatc kecikak ki iti cawonorawew. Nicwo kickwa ni ki tacikenan kitci takocatohoak neta Pouzzoles otenak.

¹⁴ Neta otenak ni ki miskawananak kotakihik iriniwok ka tapwerimatcik Cecoca. Ni ki wicamikonanak kitci witci tacikemakitcik peikwo manactakana irikik. Ekoni ka iciwepasiak, nac ka takociniak Rome otenak.

¹⁵ Iriniwok ka tapwerimatcik Cecoca neta Rome otenak ka taciketcik ki petakewok aci e takociniak. Ki tca pe icawok e pe nta nakickowiamitc, atita neta otenacik Marché d'Appius ka icinikaterik e ki pe ototetcik. Kotakihik neta ki pe ototewok Trois-Auberges otenak. Kotc ka wapamatc Pwar, ki naskamew Kice Manitowa, e sosokerimotc.

¹⁶ Minawatc ka ickwa takociniak neta Rome otenak, ki pakitinakaniwiw Pwar tipan kitci taciketc. Peikw cimakanica nanakatcihikopan.

Pwar e kakeskwetc Rome otenak

¹⁷ Ka ickwa nicto kickokarik, Pwar ki wicamew omikiwamik cota okimawa, Rome otenak ka nikaniwiritci. Ka ickwa mawotcihitotcik, ki itew: “Niwitcicanak! Nama wiec ni ki otci ici matci totawawok kiwitci cota irininiwok, acitc nama pitoc ni ki otci toten kitci iteritcikatek aka kitci kicteritcikatek e ici pimatisiwakopanen kitaniskotape kimocominowok acitc e ici kicteritamwakopanen. Aric ni ki makonikowin Jérusalem otenak, kaie ni ki iciwirikowin kitci kipohwitcik Romain iriniwok.

¹⁸ Ni ki kokwetcimikok, minawatc nataweritamopanak kitci pakitinitcik. Nama meka ki otci miskamopanak ke ki otci anwerimitcik kitci nipahikoian.

¹⁹ Aric cota iriniwok nama ki otci nahitatowok kitci pakitinikowian. Otcitakotc tca ni ki nataweriten kitci icaian Kice Okimak César kitci nta aciteian e wi nanakaskohitisoan. Nama aric ni ki otci wi itactahorawok niwitci cota iriniwok.

²⁰ Ekoni wetci ki wicamitakok kitci pe natawapamiekw kaie kitci aimihitakok. E acotapikasowan piwapiskwapiw, osam meka e ki aiarimomimak anihi ka asperimotcik Israël iriniwok.”

²¹ Aci naskamawewok Pwara aniki cota okimawok: “Nama ni ki otci otitikonan masinahikan Judée askik kitci otciparik kir e arimomikoin. Nama otci peikw kiwitci cota iriniminok neta e ototetc ki otci pe icaw kitci pe nta icimitc ka ici patakockorisk kekotc kitci marerimisk.

²² Aric ni ta mireritenan kitci petatak kitci witamawiak e aiteritaman. Ni kiskeritenan meka kaskina wiec e mareritcikatek anihe ka ici tapweritaman.”

²³ Ki oreritamok kiapatc nikotin e kicikarik kitci nakickowatcik Pwara. Ani apitc ka otcitciparinik aniheriw e kicikarik kirawe ki mitcetiwok e pe natawapamatcik neta e ici tacikeritci. Kape kickwa nac e iti otakocinik Pwar wewerita arimotamowepan ohweriw. Kice Manitowa Okimawiniw tipatcimoctawepan, kaie natowi totamopan kitci cakosimatc kitci tapweritamiritci kaskina e tapwemakanik e ici tipatcimakaniwiritci Cecoca, e mikawasimatc e itasinaterik Moïsa otaiamihe irakonikewinik kaie weckatc ka ki pe nikan tipatcimoritci ka ki ici masinahamiritci.

²⁴ Atita ki cakosimikowok e iteritci, aric aniki kotakihik nama ki otci wi tapwetawewok.

²⁵ Nama ki otci kackitawok kitci nahitatoritci. Ekoni ka ici kitciparitcik e tetipanickatcik. Pwar ki itew ohweriw tepirak: “Miro Manito tapwekopan ka ici witamawaspan kitaniskotape kimocominowa, e ki miratc anihi ka nikan tipatcimoritci Ésaïe kitci witamawatc, tan ke itekw ka nikaniwitcik.

²⁶ Tapwe wirata ki itepan: ‘Matca nta witamawik aniki iriniwok: Ki ka miro petenawaw, nama aric ki ka nisitotenawaw. Ki ka miro kanawapatenawaw, nama aric ki ka wapatenawaw.

²⁷ Otehiwaw meka aniki iriniwok mackawariw. Ki kipitokenitisowok, ki pasakwapiwok, aka tca kitci ki wapatakik, kaie aka kitci ki petakik, aka kitci ki nisitotakik kekociciriw otehiwak, kaie aka kitci ki pe itactimikapowictawitcik, kitci ki tca kikehakik,’ itew Kice Manito.” Ésaïe 6.9-10

²⁸ Kiapatc itew Pwar: “Ni nataweriten tca kitci kiskeritamekw, aci Kice Manito ki iciticahamawew otipatcimowin iriniwa aka ka cota iriniwiritci kaie wirawaw kitci akwacimakaniwiritci. Kata natotamok!” [

²⁹ Ka ickwa itetc aniheriw Pwar, cota iriniwok ki matcawok e micta kikawotakik wirawaw tipirawe.]

³⁰ Minawatc Pwar tekaci nicwo pipona irikik ki tacikew neta mikiwamik ka ki ici awihasotc. Ki mireritam e pitakahatc omikiwamik kaskina ka pe natawapamikotc.

³¹ Ki pa tipatatam Kice Manitowa Okimawiniw, acitc ki kiskinohamakew kaskina ka ki aiciwiritci Teperitcikeritci Cecoc Krist. Mictahi sokerimopan, kaie nama awiriwa otcihikopan.