Ka ki aitotiskeritci Cecoc otarotakana 27 - Kice Manito Ocki Omirwatcimowin

Rome otenak e iciticohwakaniwitc Pwar

¹ Ka ickwa oreritcikatek kitci nta positcimeak napikwan tcimanik, nete Italie askik kitci itahorikoiak, peikw cimakanic ka nikaniwitc ki mirakaniwiw kitci mihatc anihi Pwar kaie atita kotakihi ka kipohwakaniwiritci iriniwa. Julius icinikasopan anahwe cimakanic ka nikaniwitc. Tiperimepan cimakanica, “Romain Kice Okimaw ocimakanicima” ka icinikatakaniwiritci.

² Ni ki positcimanan micta tciman, nte e pe otickak Adramytte otenak, nete e icitcimeiak otenak rarewak kitcikamik Asie askik. Peikw iriniw ka icinikatakaniwitc Aristarque ni ki pe witcewikonan. Nte Thessalonique otenak otcipan, nete askik Macédoine ka icinikaterik.

³ Minawatc kecepawok, ni ki takocatohonan neta Sidon otenak. Anahwe ka tiperimatc cimakanica, Julius, mocak e wi miro totawaspan anihi Pwara, ki pakitinew kitci natawapamaritci okwimesiriw neta ka tacikeritci, kitci ki mirikoritci ke irapatcitaritci.

⁴ Minawatc kiapatc ni ki nta positcimanan, nete e ki ici matcehoak, nac nete e ici macakaiak minictikok Chypre ka icinikatek, rarewak e ici tipinowak, osam e nanikepacihak.

⁵ Minawatc nete ni ki ici acohenan kitcikami pecotcik Cilicie askik, kaie Pamphylie. Ekota nete ka ici takocatohoak otenak Myra ka icinikatek, Lycie askik itekera.

⁶ Minawatc cimakanic ki miskam tcimaniw, nte e otactanik Alexandrie otenak. Anihe tciman nte ici matceactanopan Italie askik. Ni ki posihikowinan.

⁷ Mitceto kickwa pekatc ni ki macinan. Ni ki micta arimisinan kitci natakahamak pecotcik neta otenak, Cnide ka icinikatek. Mictahi rotinopan meka, ni nanikepacitan nte kitci ki ici matceaciakipan. Ekota nta ka iti itaciak matciteak, Salmoné ka icinikatek, nac nete e ki ici tipinowecimoroak Crète minictikok.

⁸ Mictahi ni ki arimisinan kitci takocatohoak e rarewaciak, nac nete e ici takocaciniak otenak ka icinikatek Bon-Ports, pecotcik neta Lasée otenak.

⁹ Mictahi ni ki otimikanan, osam kinowec e tacikeiak, kaie eckam iti koctatikonopan kitci ki awocamec matcehoak, aci meka takociparinopan ani e asitaiak kitci micta mamatci kicikak, aci meka e ki ickwa otcitciparinik Israël iriniwok e aiamihe roskosotcik e takwakinik otci. Ekoni wetci ki nakasomatc Pwar anahweriw kotakihi ka tacikeritci, e itatc:

¹⁰ “Nikwimesak, ni wapaten ohwe ke matcaikw kitci micta koctatikok. Ohwe tciman kaie kaskina ka ki positakaniwok ota kata pikotin. Kaie tca kata koctatikon kirano tipirawe kitci nipoikw!”

¹¹ Aric anahwe cimakanic Romain nama ki otci pamotawew Pwara ka ki itikotc. Kirawe aniheriw ki asperimototawew anihi ka mitaritci micta tcimaniw ka ki iteritci kaie anihi ka tiperitamiritci.

¹² Neta Bon-Ports ka tacikeiak nama mirwacinokopan kitci piponicinaniwok. Ekoni wetci mitcet iriniwok ka ki posiwaspan ki oreritamok tecikotc kitci matcehoak, e nataweritakwapan kitci kokwe macakaiak neta otenak Phénix ka icinikaterik, rarewak e ici takonik aniheriw otenariw neta minictikok Crète ka icinikaterik, nte e iciketinik itekera cawonok-wapanok, kaie tca kiwetinok-nekapehonok. Ekota neta wa ici piponiciwakopanen.

E micta matci kicikak kitcikamik

¹³ Minawatc pekatc ki iti opirawew, nte e otcirowek cawanok. Ki iti iteritamok wikockatc kitci takocikik nete Phénix otenak. Ki okitcipitamok matcikwapisoniwapiriw e tca matcehotcik, micta pecotcik e iti rarehotcik aniheriw minictikoriw Crète ka icinikaterik.

¹⁴ Ka iti matcehotcik, e acohakik, ki micta rotiniw, nte matinak minictikok e otcirowerik kiwetinok acitc wapanok.

¹⁵ Ki matceactan anihe tciman. Nama ki otci kackitawok kitci otcickwekitotatcik. Ekoni ka ici pakitinakik arotcikotc kitci ici matceacitcik.

¹⁶ Nte ni ki ici matceacinan cawanok nimictikocik Cauda ka icinikatek, memantcic e tipinowak. Takonopan tcimanicic e otapetakotatcik otananik micta tcimanik. Ni ki micta arimihikonan anihe tcimanicic kitci ki maminopitamak, peikwaw ka ickwa kackitaiak kitci minopitamak.

¹⁷ Ka mitatcik tcimaniw ki okitcipitamok e posipatakik micta tcimanik. Ekoni ka ici takopitakik anaheriw tcimaniciciriw e ki acotapikatakik neta okitc micta tcimanik. Ki meka koctamok micta tcimaniw kitci itapoterik e manawokarik e micta koctatikonik ote itekera askik Libye ka icinikaterik. Ekoni ka ici itapikenakik omatcikwapikasowiniwaw e ki pakitinakik arotcikotc kitci ici matceacitcik.

¹⁸ Nama ki otci acterawew e micta aiatackahawikoiak, nac minawatc kecepawonik ka mitatcik micta tcimaniw ki kapepinamok e ici mohotawaspan.

¹⁹ Minawatc kecikak wirawaw tipirawe ki kapepinamok e irapatanik neta micta tcimanik.

²⁰ Mitceto kickwa nama ki otci nokosiw kicikaw pisimw, nama kaie wawatc atcikocak, kaie mocak kiapatc e micta rotikipan. Kek ni ki iteritenan, nama wiskat aci ki ka kackihonano.

²¹ Aci weckatc nama mitcisopanak neta tcimanik ka taciketcik. Ekoni ka ici pasikotc Pwar nikanik e icikapowitc neta e ici tacikeritci, e itatc: “Ki ta ki natotawinawaw, nikwimesak. Nama ki ta ki otci nakatenano ohwe minictikw Crète ka icinikatek. Nama ki ta ki otci onitano anahwe kaskina kekocica ka ki pakopepinikatek, nama kaie ki ta ki otci arimihikono.

²² Aric anotc ki wicamitinawaw kitci sokerimoekw. Nama meka peikw ani e taciekw kata nipo. Tepirak kitcimanino kata pikowahotew.

²³ Tapwe wirata ka tipiskarik, Kice Manito, anahwe ka tiperimitc kaie ka atoskectawak, ki pe iciticahwew otacerima kitci pe natawapamimitc,

²⁴ e pe iteritci: ‘Aka koctatci, Pwar! Otcitakotc ki ka natawapamaw Kice Okimaw tipaskonikewikiwamik. Kaie Kice Manito, e micta mirotehetc, ki mirikw aka kitci nipotcik kaskina iriniwok ka tcimiskik.’

²⁵ Sokitehekw tca, nikwimesak. Nit asperimototawaw meka Kice Manito tapwe kitci isparinik kaskina ka ki pe icitc.

²⁶ Aric nte ki ka iciwepahikono rarewak peikw minictikocik.”

²⁷ Aci mitato acitc new tipiskwa kiapatc e micta rotikipan ni ki matcactamihikonan Méditerranée kitcikamik. Wiec e iti apita tipiskak, iriniwok ka mitatcik tcimaniw iteritamopanak matci pot kekatc kitci pecowapatamak aski.

²⁸ Ki iciwepinamok cectokwapiriw e akokiterik e kosikonik e nta kiskeritakik tan e asitatamarik. Ki kiskeritamok wiec mitato mitana acitc nicitana tato askositemakan. Minawatc nakewar kiapatc ki nta kiskeritamok, eckam iti pakwaw, cakitato mitana asitatimaw e ici tipahikaniwok ici askositemakan.

²⁹ Ki koctamok kitci tawapiskahatcik, ekoni wetci ki pakopepinakik matcikwapisoniwapiriw e newonik otananik, kirika e nakasitcik e petatcik kitci pe sakasikeritci pisimwa.

³⁰ Aric aniki ka mitatcik tcimaniw natowi totamwakopan kitci ocimotcik, e nitapikenakik tcimaniciciriw. Ki kiraskiwok, aniheriw e itetcik: “Ni ka nta pakitapikenenan matcikwapisoniwapi nikanik micta tcimanik.” Aric wi kimotci ocimowakopan.

³¹ Pwar ki itew anihi Romain cimakanica ka nikaniwiritci kaie ocimakanicimiriw: “Kecpin matcatawe aniki iriniwok, nama ki ka ki wikotcihikowinawaw.”

³² Aniki cimakanicak, ekoni ka ici kickicakik cectokwapiriw tcimaniciciriw ka matcikowapitcikaterik. Ekoni ka ici matceactanik.

³³ Epwamoci pe sakasiketc pisimw, Pwar wicamihew kaskina kitci pe nta mitcisoritci, e itatc: “Aci anotc mitato acitc new kickwa esko pehoekw, aka kekocic e mitciekw, ota e tacikeiekw.

³⁴ Ki wikosimitinawaw kitci mitcisoekw, aci e actek kitci mitcisoekw kirawe kitci mackawisiheiekw. Nama wawatc peikw nta e tatik kirisisiwaw ki ka onitanawaw.”

³⁵ Ka ickwa itetc aniheriw Pwar, ki otapinew pakwecikana, mikwetc e itatc Kice Manitowa, kaskina nta e tacinaniwonik e wapamikotc. Minawatc ki pakwepitew anihi pakwecikana e tca mowatc.

³⁶ Kaskina nta ka taciketcik ki sokerimowok, kaie wirawaw e mitcisotcik.

³⁷ Nicwaw mitato mitana acitc nicowaso mitana acitc nikotwaso ni ki tacinan mamo ka positcimeak neta tcimanik.

³⁸ Ka ickwa kaskina mitcisotcik e tipiparitcik, ekoni e iciwepinatcik mirominockwa kitcikamik, kirawe kitci rakacitcimetcik.

Ka kosapehakotcik

³⁹ E iti waseapanik iriniwok ka mitatcik tcimaniw wapatamok askiriw. Nama aric ki otci nisitowinamok neta mia e ititawokopanen. Ki wapatamok e wacakamarik e micta mirwanakarik rarewak. Ki iteritamok kitci natakahakik.

⁴⁰ Ki apikonamok matcikwapisoniwapiriw e ki nakatakik neta kitcikamik. Ki apikonewok kaie apowia ka ki ominihikanatikotcik, kaie ki tcimatawok micta rakasimonekiniw nikanik otcimaniwak, kitci ki matceacitcik, rarewak e itacitcik.

⁴¹ Nte ni ki ici takocatohonan e manawokak nipik. Nictowitc e mitciwok, ekota neta ka ici nespitcihomakak tciman, e ki seskahokohak nictamitakok tciman, e ki kotcitawoparik rekak. Minawatc otananik micta tcimanik tekaci ki pikahotew e apitc ki soki mitcahak.

⁴² Cimakanicak wi nipahewakopan anahweriw iriniwa ka ki kipohwakaniwiritci, aka otci peikw e taciritci kitci ocimoritci kitci matcaiatakaritci.

⁴³ Anahwe Romain cimakanic ka nikaniwitc nama nataweritamopan kitci nipahakaniwiritci Pwara. Ki otcihiwew aka kitci totamiritci e ici nataweritamirispana. Ki itew kaskina anahweriw ka kackitaritci e matakaritci kitci pakope kwackotiritci kitci itatakaritci askik.

⁴⁴ Minawatc ki itew anihi kotakihi aka ka kackitaritci e matakaritci kitci matcikwaskoritci e pihowoterik tcimaniw. Ekoni kaskina ka totakik kitci ki takocikik askik.