Ka ki aitotiskeritci Cecoc otarotakana 26 - Kice Manito Ocki Omirwatcimowin

Pwar e nanakaskohiketc, okimawa Agrippa e tipaskonikotc

¹ Minawatc okimaw Agrippa itew Pwara: “Ki miritin kitci arimwein kitci aciteiein e nanakaskohikein.” Aci Pwar icpiniskeriw, e nanakaskohiketc, e itetc:

² “Okimaw Agrippa, ni mireriten e ki mirikoian anotc e pe mi kicikak, kitci nanakaskohikeian ota e tacikein kitci petaman e ici itactahoritcik cota iriniwok.

³ Wewerita meka ki kiskeritam e ici pimatisitcik cota iriniwok acitc e ici arimotakik. Ki pakoserimitin tca kitci ciciperitaman e natotawiin.”

⁴ “Kaskina cota iriniwok kiskeritamok e ici pimatisiwak, esko ka ocki pimatisian, nte wetcian, kaie nete Jérusalem otenak ka pe pimatisian.

⁵ Aci weckatc ni otci kiskerimikok. Kecpin iteritakawe, matci ki ka witamakok, e ki mocak wewerita nosanetawak Pharisien iriniwok ka ici kicteritakik. Ki kiskeritenano Pharisien iriniwok kirawe wirawaw wewerita e nosanetatcik cota aiamihe irakonikewiniw patok kotakihik cota iriniwok.

⁶ Minawatc anotc ni taci tipaskonikowin, osam e asperimototaman aniheriw ka ki ici nespi tapwetak Kice Manito kitci totak nitaniskotape nimocominana otci.

⁷ Aniki e mitato acitc nicwo otenwesitcik niwitci cota iriniwok ici asperimowok kitci wapatakik e takociparinik Kice Manitowa ka ki ici nespi tapweritci kitci totamiritci, tato kickwa kaie tato tipiskwa e atoskectawatcik e irikokotehetcik. Ekoni tca wetci itactahoritcik cota iriniwok, Okimaw, aniheriw otci ka ici asperimotcik.

⁸ Aric kirawaw ka cota iriniwiekw, kekwan wetci aka tekaci kackitaiekw kitci tapwetamekw Kice Manito e kackitatc kitci apitcipahatc ka niporitci?”

⁹ “Nin tipirawe, ni ki iteritetai kitci natowi aitotaman kitci ki nakanaman e asperimototawakaniwitc Cecoc, Nazareth ka otcitc.

¹⁰ Ekoni ka totamapan Jérusalem otenak. Cota makatewokorewok ka tiperitakik ni ki mirikok tiperitamowiniw ani kitci ki totamwotc. Mitcet iriniwok ka tapwetowatcik Cecoca ni ki iciticohwawok kipohotowikamikok. Ka anwerimakaniwitcik kitci nipahakaniwitcik, kaie nin ni ki ici naheriten.

¹¹ Mocak e pa icaiapan cota aiamihe mikiwamiskak ni totetai kitci kicakonakaniwitcik kaie ni wi cakosimataik kitci itetcik aka awocamec kitci tapwerimatcik Cecoca. E apitc nataweritamapan kitci ponitatcik e nosanehwatcik, ni nosanehwataik kotakihik askik e pa nekatcihakwapan.”

Pwar e atisokatak ka ki isparitc ka kweskatisitc

¹² “Okimaw Agrippa, ekoni kiapatc e pe totamapan, nte ka icaian Damas otenak, cota makatewokorewok ka tiperitakik ka ki acotamawispan kitci totamwak, otiperitamowiniwaw kaie e ki pe miritcik.

¹³ Mekwata e pimoteiapan, aci e apita kicikakipan, ka wapataman e pe wactek icpimik e otactek, kirawe e micta sokactek patok kicikaw pisimw e asitci sokasiketc, e waskackakoak kaie aniki ka ki pe witcewitcik.

¹⁴ Kaskina ni ki pakicininan motcik e taciak. Kek ni ki peten arimwewin e itikoian, araméen arimwewin e ici arimwaniwok: ‘Saul, Saul, kekwan wetci nekatcihiin? Kekwan wetci anweritaman kitci pakitinitisoin kitci mihitan? Mia awesis e totaman ka kokwetcitatc kitci takickatatc anihi ka wi mihikotc.’

¹⁵ Ni ki kokwetcimaw: ‘Awin na kir, Teperitcikein?’ Ni ki itikw Teperitciketc: ‘Nin Cecoc ka nekatcihiin.

¹⁶ Pasiko! Nanipowi tca! Ni pe nokohitison kitci witamatan e orapamitan kitci atoskectawiin. Ki ka arimotamowawok kiwitc iriniwok anotc e ki wapamiin, kaie ki ka witamawawok ke miritan nanake kitci wapataman.

¹⁷ Ki ka pe nta wikotcihitin, aka wiec kitci totatakok kiwitci cota iriniwok kaie kotakihik iriniwok.

¹⁸ Ki ka iciticohotin kitci natawapamatcik, kitci ki nta witcihatcik kitci miro wapatakik, kitci ki witcihatcik iriniwok ka tipiskatisitcik kitci tca waseatisitcik, aka aci kitci tiperimikotcik Matci Manitowa, Kice Manitowa kitci tiperimikotcik. Tapwerimitawe, opactatowiniwaw kata kasihamawakaniwiwok, kaie ni ka mirawok kaie wirawaw nitirinimak kitci iteritakositcik.’”

Pwar e arimotak otamirowin

¹⁹ Minawatc kiapatc Pwar ki witamawew anihi okimawa Agrippa, e ki itatc: “Nama ni ki otci anweriten ka ki icinaman, icpimik e ki otciparik.

²⁰ Nictam ni ki nta kakeskwan nete Damas otenak kaie Jérusalem otenak e aimihakik, kaie nta kaskina e irikokwak Judée askik, kaie mitcet iriniwok ka papikan taciketcik, e ki wikosimakik kitci meckotatisitcik, kitci itactimikapowictawatcik Kice Manitowa kitci nosanehwatcik, kaie kitci wapatahiwetcik tapwe pitoc e itatisitcik.

²¹ Ekoni wetci ki makonitcik cota iriniwok, neta e tacikeiapan kitci aiamihe mikiwamik, ekoni kaie wetci ki kokwetcitatcik kitci nipahitcik.

²² Aric Kice Manito mocak ni ki nanakatcihikw, wawatc anotc ka pe kicikarik. Ekoni ota wetci tacikeian kaskina e witamatakok e ici kiskeritaman, kaskina awik e witamawak, iriniwok ka kicteritakositcik kitci petakik kaie aniki ka iterimakaniwitcik ‘nama kicteritakosiwok.’ Kaskina ka aiteian, ekoni peikon e ici witakik weckatc ka ki pe nikan tipatcimotcik kaie wir Moïse ka ki witak kitci pe iciwepanik:

²³ kitci pe nekatcitatc anahwe ke pe iciticohwakaniwitc ota askik kitci akwacimitokw, kaie wirctam kitci apitcipatc, acitc kitci wactenamowatc cota iriniwa kaie kaskina kotakihi papitoc askik ka tacikeritci, kitci tca akwacimakaniwiritci.”

Pwar e wicamatc okimawa kitci tapwetamiritci

²⁴ Mekwata Pwar e taci arimwetc e itactahorakaniwitc e tca nanakaskohiketc, Festus ki itew kitci ponitaritci, e kakiciwekitowatc, e itatc: “Ki kiwockwatisin, Pwar! Osam ki ki micta kiskinohamason. Enko ni ka kiwockweritamihikowin!”

²⁵ Pwar naskamawew, e itatc: “Nama ni kiwockweriten, Nokimam. Anahwe kaskina ka iteian, tapwe icinakon, mia kaie icinakon.

²⁶ Okimaw Agrippa ki nta kiskeritam kaskina aniheriw e isparinik. Nama tca ni cakwerimon kitci arimotamowak aniheriw. Ni ketcinaweriten e kiskeritak kaskina aniheriw. Nama meka ki otci katakaniwoniw ka iciwepanik.”

²⁷ Minawatc Pwar itew anihi okimawa: “Okimaw Agrippa, ki tapweten ia aniheriw ka ki ici tipatatakik ka ki pe nikan tipatcimowaspan? Ni kiskeriten e tapwetaman!”

²⁸ Anahwe Agrippa itew Pwara: “Kit iteriten ia kitci cakosimiin tecikotc kitci tapwerimak Cecoc?”

²⁹ Aci itew Pwar: “Misawatc tecikotc, matci kaie kinowec kitci tacikikatek, ni pakoserimaw Kice Manito kitci asperimototawotc Cecoc, mitowi nin. Nama aric tepirak kir, kaskina kaie kirawaw ka natotawiekw anotc ka mi kicikarik kitci asperimototawekw! Nama aric nit aiamihan kitci arikoiekw kipohotowikamikok mitowi nin!”

³⁰ Aci anahwe okimaw kaie kice okimaw acitc anahwe iskwew Bérénice kirika kaskina ka tacikewakopanen tecikotc ki pasikowok.

³¹ E matcatcik, aititowok: “Anahwe iriniw nama kekociciriw ki otci totam ka maratanik kitci kackitamatisotc kitci otci nipahakaniwitc kekotc ma kitci otci kipohwakaniwitc.”

³² Aci Agrippa itew Festusa: “Kecpin aka ki otci itetc anahwe iriniw e nataweritak kitci tipaskonikotc Kice Okimawa Césara, matci kata ki pakitinakaniwipan.”