Ka ki aitotiskeritci Cecoc otarotakana 25 - Kice Manito Ocki Omirwatcimowin

Pwar e nataweritak kitci tipaskonikotc Kice Okimawa

¹ E ickwa nicto kickokarik ka ickwa takocik anahwe ocki kice okimaw Festus kitci tiperitak neta Judée askik, nete ki otci matcaw Césarée otenak, Jérusalem otenak e icatc.

² Aci neta ki pe natawapamiko anahweriw cota makatewokorewa ka tiperitamiritci kaie kotakihi cota iriniwa ka kicteritakosiritci, kitci itactahoraritci Pwara. Ki nataweritamawewok aniki cota iriniwok

³ kitci pakitinakaniwitcik kitci pe iciwirakaniwiritci Pwara Jérusalem otenak. Aci meka ki ickwa nisawitawakopan kitci keskipitakaniwiritci Pwara meskanak, kitci nipahakaniwiritci keska e pe iciwirakaniwiritci.

⁴ Aric anahwe Festus ki itew: “Nete ici kipohwakaniwiw Pwar Césarée otenak. Nin tipirawe aci kekatc ni ka ican.”

⁵ Minawatc itew: “Kata miroparinopan atita kokimamiwawok kitci witcewitcik nete Césarée otenak kirika kitci itactahoratcik anihi iriniwa Pwar, kecpin tapwe ka matci totamokwen.”

⁶ Wiec nicwaso kekotc mitato kickwa ki tacikew anahwe Festus neta Jérusalem otenak, minawatc ki kiwew nete Césarée otenak. Minawatc kecikarik ki icaw tipaskonikewikamikok e nta tipaskoniketc. Ki itew kitci pe iciwirakaniwiritci Pwara.

⁷ Ka takociwirakaniwiritci, cota iriniwok nte ka ki pe ototetcik Jérusalem otenak ki waskakapowictawewok kitci itactahoratcik, e aitetcik mitcetwaw e ki matci totamiritci kaie e ki micta maratanik. Nama aric ki otci kackitawok kitci wapatahiwetcik tapwe e icinakonik ka ici itactahoratcik.

⁸ Aric Pwar ki nanakaskohikew, e aitetc: “Nama ni ki otci pikotawan cota iriniwok otaiamihe irakonikewiniwaw. Nama kaie ni ki otci matciparitan kitci aiamihe mikiwamik. Nama kaie wiec ni ki otci ici marerimaw Kice Okimaw César.”

⁹ Festus wi mireritamihekopan anahweriw cota iriniwa. Ki tca itew Pwara: “Ki nataweriten ia kitci icain Jérusalem otenak kitci nta orakonitan, nin tipirawe kitci oreritaman ka totamowonen tapwe anihe ka itactahorikoin?”

¹⁰ Pwar ki naskamo, e itetc: “Aci nit icikapowin ota ke ki ici tipaskonimitc Kice Okimaw otarotakana. Ekota ota e actek kitci ici tipaskonikoian. Nama kekocic ni ki otci matci totawawok cota iriniwok. Aci ki miro kiskeritenatake kaie kir tipirawe.

¹¹ Kecpin tapwe ka matci totamowanen ka ici itactahorikoian, kirika kecpin tapwe ka matci totamowanen kitci kackitamatisoan kitci ki otci nipahikoian, ni kiskeriten aci e iteritakosian kitci nipoan. Kecpin aric aka e icinakonokwen anihe ka ici itactahorikoian, nama acteriw awik kitci iciwiritc cota irinik kitci tipaskonikoian. Ni natawerimaw wir tipirawe Kice Okimaw César kitci tipaskonitc.”

¹² Minawatc anahwe Festus ka ickwa aimihatc anihi otirinima, ka arimotamawatc ke isparinik, itew anihi Pwara: “Ki nataweriten kitci tipaskonisk Kice Okimaw César. Ekote tca nete ke icain.”

Okimaw Agrippa acitc Bérénice e wi wapamatcik Pwara

¹³ Ani apitc wiskata, okimaw Agrippa kirika ocima Bérénice ka icinikasoritci ki takociniwok neta otenak Césarée e pe kiwotamatcik anihi Festus.

¹⁴ Mitceto kickwa ki tacikewok. Mekwata nete e taciketcik, Festus ki arimotamawew anihi okimawa e iciwepasiritci Pwara, e itatc: “Taw ota peikw Félix e ki nakatatc kipohotowikamikok.

¹⁵ Ka takocinian ota Jérusalem otenak, cota makatewokorewok ka tiperitakik kaie cota aiamihe okimawok ki pe takociniwok kitci itactahoratcik anihi iriniwa, e nataweritakik kitci anwerimakaniwiritci.

¹⁶ Ni ki itawok, aka wiskat e tipaskonakaniwitc awik, Romain tipaskonikewikamikok, kecpin aka moci e nakickakotc anahweriw iriniwa ka itactahorikotc kaie e mirakaniwitc kitci ki miro nanakaskohiketc.

¹⁷ Ni ki tca pe witcewikok ota aniki cota iriniwok ka itactahoriwetcik. Minawatc kecepawok tecikotc ni ki ican tipaskonikewikamikok e nta apian, e tca iteian kitci pe iciwirakaniwitc anahwe iriniw.

¹⁸ Ki pe nta witcikapowictako anahweriw ka ki itactahorikotc. Nama aric ki otci itactahorewok e ici maratanik ka totamiritci, e ici pehakwapan.

¹⁹ Nitowatc tepirak ki arimotamowewok aniheriw otaiamihewiniwaw, kirika anihi otci peikw iriniwa ka icinikasoritci Cecoc, aci ka ki poni pimatisiritci. Aric Pwar ki itew kiapatc e pimatisiritci.

²⁰ Nin nama ni ki otci kiskeriten ke ki oreritaman. Ni ki tca nataweritamawaw anahwe Pwar kitci icatc Jérusalem otenak kitci nta tipaskonakaniwitc aniheriw otci.

²¹ Aric ki natawerimew Kice Okimawa César tipirawe kitci oreritamiritci ke iciwepasitc. Ni ki tca itawok cimakanicak kitci kanawerimatcik anihi Pwara kipohotowikamikok, nac kitci ki iciticohwak Kice Okimak.”

²² Minawatc Agrippa ki itew anihi Festus: “Ni ta mireriten nin tipirawe kitci petawak anahwe iriniw.” Aci itew Festus: “Wapake ki ka petawaw.”

²³ Minawatc kecikarik okimaw Agrippa kaie Bérénice ki takociniwok e micta mirwaspisotcik, e mitcetinaniwonik neta e ici pimotetcik e ki pe nta kanawapamakaniwitcik. Ekoni e ici pitaketcik neta ka micarik arimwewikamikok, kaie cimakanicak ka tiperitakik acitc mitcet ka kicteritakositcik neta otenak kaie wirawaw. Aci Festus ki itew kitci natcipahakaniwiritci anihi Pwar.

²⁴ Minawatc Festus itew: “Okimaw Agrippa kaie ota kaskina kirawaw ka tacikeiekw: enko ohwa iriniw, kaskina cota iriniwok ka ki pe icatcik kitci itactahoratcik. Ki icawok neta Jérusalem otenak e pe natawapamitcik. Peikon kaie ota ki pe icawok, e pe micta kakiciwetcik, e itetcik: ‘Nama acteriw kitci pimatisitc anahwe iriniw!’

²⁵ Nin tipirawe nama ni ki otci miskamwan ka ki ici matci totak kitci kackitamatisotc kitci otci nipahakaniwitc. Aric wir tipirawe ki natawerimew Kice Okimawa kitci tipaskonikotc. Ni ki tca oreriten kitci iciticahamowak neta.

²⁶ Nama takoniw wewerita ke ki itasinamowak Kice Okimaw anihi iriniwa otci. Ekoni wetci ki wicamak kitci pe nta arimwetc ota e taciekw kirawaw kaskina. Kaie otcitakotc kir, okimaw Agrippa, kitci petawotc ke itetc, kitci kokwetcimatc ka ki ici matci totak, kitci ki kiskeritaman ke itasinahamowak Kice Okimaw.

²⁷ Waneritakon, nit iteriten, Rome otenak kitci iciticohwakaniwitc iriniw ka ki kipohwakaniwitc, kecpin aka wewerita e witcikaterik ka ici itactahorakaniwitc.”