Ka ki aitotiskeritci Cecoc otarotakana 24 - Kice Manito Ocki Omirwatcimowin

Pwar ka itactahorikotc cota iriniwa

¹ Ka ickwa niarano kickokarik, aci kitci makatewokorew, Ananias ka icinikatakaniwitc, ki takociniw neta Césarée otenak, e pe witcewatc atita cota aiamihe okimawa kaie peikw arimitakosi iriniwa ka icinikasoritci Tertullus. Ki natawapamewok kice okimawa Félix, e nta witamawatcik e ici itactahoratcik Pwara.

² Minawatc ki wicamewok Pwara. Anahwe arimitakosi iriniw Tertullus ki itactahorew Pwara, e itatc anihi Félix: “Nokimam, kir ota wewerita e mihiak, kinowec miroparihitonaniwon ota askik e irikokwak ka tiperitaman. E miro okimawiin, mitcetiwok kitirinimak pa pitoc e isparitcik kitaskik.

³ Mocak ki wi naskomitinan anihe otci. Micta mikwetc kit ititinan.

⁴ Nama aric kinowec ki wi otamihitin. Ekoni wetci pakoserimitan kimirotehewin memacic kitci natotawiin.

⁵ Ni ki nanakatcihanan anahwe iriniw Pwar e micta matciparitatc. Totam kitci ki matciparihitoritci kaskina cota iriniwa ota askik, kaie nikaniwiw aniki otci ka nosanehwatcik anihi Nazareth iriniwa.

⁶ Wawatc ki kotcitaw kitci matci aiamihaniwonik kitci aiamihe mikiwamik, aka awocamec kitci kitcitwaweritakonik kitci aiamihe mikiwamiriw. Ni ki tca makonanan. [Ni ki nataweritenan kitci tipaskonakitc e itactek aiamihe irakonikewinik cota iriniwok otaiamihewiniwak.

⁷ Aric anahwe ka nikaniwitc cimakanic ka icinikasotc Lysias ni ki pe nta maskamakonan, omackawisiwiniwaw e ki apatcitatc. Ni ki pe nta kaketcitcitcenamakonan.

⁸ Minawatc anahwe Lysias ni ki itikonan kitci pe natawapamitak, kitci pe nta witamatak e ici itactahorakitc anahwe Pwar.] Kecpin tca kokwetcimate anahwe iriniw, ki ka kiskeriten kir tipirawe e tapwemakanik kaskina aniheriw ka ici itactahorakitc.”

⁹ Cota iriniwok kaie wirawaw neta e tacitcik ki itewok kitci itactahorakaniwiritci anihi Pwara, e itetcik ekoni mia e icinakonik.

Pwar e nanakaskohiketc

¹⁰ Anahwe kice okimaw ki itohwew Pwara wirctam kitci arimweritci. Aci Pwar itew: “Ni kiskeriten aci mitceto pipona e tipaskoniwein ota askik. Nama tca ni cakwerimon kitci pe nta nanakaskohikeian e ici itactahorikoian.

¹¹ Kir tipirawe ki ka ki nta kiskeriten tapwe e icinakok ka iteian. Aci wiec mitato acitc nicwo kickwa ka takocinian neta Jérusalem otenak kitci pe nta kicterimak Kice Manito.

¹² Nama wiskat awik ni ki otci miskakok e kikamakik niwitc iriniwok kitci aiamihe mikiwamik. Nama ni ki otci toten kitci otci matciparitcik iriniwok. Nama kaie ni ki otci itotiskan kotakihi cota aiamihe mikiwamiskak, nama kaie kotak wiec otenak.

¹³ Ohki iriniwok nama ki ka ki wapatahikowok e tapwemakanik aniheriw ka ici itactahoritcik.

¹⁴ Aric anotc ki witamatin ohwe ka iteian e tapweian: ni nosanetan anihe ocki kiskinohamakewin, Teperitciketc Omeskanam, aniheriw aka ka tapweritakik aniki iriniwok. Aric kaie nit atoskectawaw Kice Manito, weckatc nitaniskotape nimocominanak ka ki atoskectawatcik. Kaskina kaie ni tapweriten e itasinatek aiamihe irakonike masinahikanik kaie ni tapweritamawan aniheriw ka ki ici masinahakik ka ki pe nikan tipatcimotcik.

¹⁵ Nit asperimototawaw Kice Manito, mitowi kaie wirawaw ka ici asperimototawatcik: kaskina iriniwok, ka miro iriniwitcik kaie peikon ka matci iriniwitcik kitci apitcipahakaniwitcik.

¹⁶ Ekoni wetci mantokasoan icikowisk kitci itatisian, kitci tca kiskeritaman nitehik aka e ki otci akohak Kice Manito, aka kaie e ki otci akohakik niwitc iriniwok.”

¹⁷ “Ni ki pe kiwan Jérusalem otenak, weckatc e ki nakataman, mitceto pipona e ki itanahoan, kitci pe iciwitaian coria ka ki mawotcitakaniwok niwitc iriniwok otci, kitci witcihakaniwitcik, kaie kitci pe nta aiamihe pakitinikeian Kice Manito otci.

¹⁸ Ekoni e taci totamapan neta kitci aiamihe mikiwamik ka miskawitcik. Aci ni ki ickwa aiamihe kisisipasotai. Nama mitcetipanak neta iriniwok ka witci tacikemiwaspan, nama kaie matciparihitonaniwonopan.

¹⁹ Aric atita cota iriniwok Asie askik ka otcitcik tacikepanak kaie wirawaw ani apitc. Pot wirawaw ki ta pe natawapamikok kitci ki itactahoritcik, kecpin tapwe e takonik ka wi ici itactahoritcik.

²⁰ Kekotc ma ki ta kokwetcimawok aniki iriniwok ota ka taciketcik, kekwariw mia ka ki ici anwerimitcik neta ka ici Kitci Tipaskonikaniwonik.

²¹ Pot ohweriw ni wi itactahorikok, e ki micta kiciwekitowakik, neta nikanik e icikapowictawakik: ‘Ki tipaskoninawaw anotc ka mi kicikak, osam e tapweritaman kitci apitcipatcik ka nipotcik!’”

²² Anahwe kice okimaw Félix wewerita miro kiskeritamokopan ka ici kiskinohamakaniwonik Teperitcikeritci Omeskanamiriw. Ki itew aka tecikotc kitci oreritak ke totawakaniwiritci anihi Pwara, e itatc anahweriw ka itactahoritci: “Takocike anahwe cimakanic ka nikaniwitc Lysias, ni ka oreriten ke totaman ka pe ici nta kokwetcimiekw.”

²³ Ki itew anihi cimakanica ka nikaniwiritci kitci kanawerimaritci anihi Pwara, kiapatc kitci kipohwakaniwiritci, aka aric kitci takopitakaniwiritci, kaie kitci pakitinakaniwiritci okwimesa kitci natawapamikotc kitci atoskectakotc.

Pwar e wicamikotc Félix a kirika Drusill a

²⁴ Ani apitc wiskata kice okimaw Félix ki pe icaw kirika owiwa, Drusille ka icinikasoritci. Anahwe iskwew cota iskwewikopan. Félix ki iciticahwew kitci natcipahakaniwiritci Pwara, e wi natotawatc e iteritci e arimotamiritci e asperimototawakaniwiritci Cecoca.

²⁵ Aric apitc Pwar ka iti aiarimotak mocak icikowisk kitci ici pimatisinaniwonik, kitci miro nanakatcihitisonaniwonik kaie kitci otcitciparinik e tipaskonikaniwonik, anahwe Félix ki kokwarisikitawew, e itatc: “Ekoni! Aci ki ta matcan! Nikotin ickwa aikeiane ki ka wicamitin minawatc.”

²⁶ Asperimokopan kaie kitci mirikotc Pwara coriariw. Ekoni meka mocak wetci ki wicamatc kitci pe natawapamikotc.

²⁷ Minawatc ka ickwa nicwo piponikarik peikw iriniw ka icinikatakaniwitc Porcius Festus ki tapickawew anihi Félix e kice okimawiritci. Anahwe Félix ki nakatew kipohotowikamikok Pwara, e wi mireritamihatc cota iriniwa.