Ka ki aitotiskeritci Cecoc otarotakana 23 - Kice Manito Ocki Omirwatcimowin

¹ Pwar tipickotc ki kanawapamew anahweriw cota iriniwa Ka Kitci Tipaskonikeritci, e itatc: “Niwitcicanak, ni kiskeriten nitehik mocak icikowisk e ki icinakok ka totaman, Kice Manito e atoskectawak, nac ohweriw e kicikarik.”

² Ka ickwa itetc aniheriw, Kice makatewokorew Ananias ki itew anahweriw iriniwa neta pecotcik ka tacikeritci Pwara e ici nanipowiritci kitci otamitonehwakaniwiritci.

³ Minawatc Pwar ki itew: “Kice Manito ki ka otamohokw, kir ka micta kiskeritamikasoin! E icinakosiin, mia mitowi ka opimetakak ka ki wapekahikatek aka kitci nokok e ometciwok! Kit apin neta kitci tipaskoniin, e iterimitisoin, ‘ni nosanetan aiamihe irakonikewin,’ aric ki pikotan anihe irakonikewin e ki itein kitci otamohokoian.”

⁴ Aniki ka witcikapowictawatcik Pwara itewok: “Ki papirotowaw kitci makatewokorew, Kice Manitowa ka atoskectawatc!”

⁵ Pwar itew: “Niwitcicanak, nama ni kiskerimatai e kitci makatewokorewitc. Tapwe wirata itemakan Kice Manito Omasinahikanik: ‘Nama ki ka papirotowaw ka nikaniwitc kitaskiwak.’”

⁶ Pwar kiskerimepan anahweriw cota iriniwa ka apiritci neta, Ka Kitci Tipaskonikeritci ka icinikatakaniwiritci, atita neta e taciritci e Sadducéen iriniwiritci, kaie anahweriw kotakihi e taciritci e Pharisien iriniwiritci. Ekoni wetci tepwetc Pwar, e sokitakositc, kaskina neta ka tacikeritci e itatc: “Niwitcicanak, kaie nin ni Pharisien iriniwin. Peikon kaie wir notawi Pharisien iriniwiw. Wetci tca ki pe iciwiriekw kitci tipaskoniekw, osam tepirak e asperimoan ka nipotcik kitci apitcipatcik.”

⁷ Ka ickwa itetc aniheriw, Pharisien iriniwok kaie aniki Sadducéen iriniwok ki aimihitowok. Ki iti kikatowok.

⁸ Pharisien iriniwok meka tapwetamok ka niporitci kitci apitciparitci. Tapwetamok kaie e taritci aceriwa kaie matci manitowa. Minawatc aniki Sadducéen iriniwok nama otci peikw aniheriw tapwetamok.

⁹ Ki micta kakiciwewok e aimihitotcik, eckam mocak e iti kiciwekitatotcik. Atita ka kiskinohamaketcik aiamihe irakonikewiniw ka Pharisien iriniwitcik ki pasikowok aka e mirotowatcik, e itetcik e micta kiciwetcik: “Nama kekocic ni miskenan e ici maratanik anahwe iriniw Pwar ka itactahorakaniwitc. Manitowa kekotc aceriwa pot ki aimihikotake!”

¹⁰ Nac ki iti micta matcipariwok e kikatotcik. Anahwe ka tiperimatc cimakanica ki koctam kitci tetipanirakaniwiritci anihi Pwara. Ekoni wetci ki itatc ocimakanicima kitci icaritci nte e ici taciketcik makatewokorewok, kitci tca maskamakaniwiritci anihi Pwara, kitci iciwirakaniwiritci neta cimakaniciwikiwamik.

¹¹ Minawatc e tipiskak, Pwar ki pe natawapamiko Teperitcikeritci, e itikotc: “Sokitehe! Ki ki tipatcimin ota Jérusalem otenak, ekoni kaie e actek kitci nta totaman Rome otenak.”

Cota iriniwok e natowi totakik kitci nipahakaniwiritci Pwara

¹² Kecepawonik atita cota iriniwok ki oreritamok ke totcikaterik kitci nipahakaniwiritci Pwara. Kaie kaskina tapickotc ki nespi tapwewok aka kitci mitcisotcik, aka kaie kitci minikwetcik, nac kitci ickwa nipahakaniwiritci Pwara.

¹³ Aniki ka ki itetcik, nemitana awocamec taciwakopan.

¹⁴ Ki natawapamewok cota makatewokorewa ka tiperitamiritci kaie cota aiamihe okimawa, e nta itatcik: “Ni ki nespi tapwanan aka kekocic kitci mitciak nac kitci ickwa nipahakaniwitc Pwar.

¹⁵ Kirawaw kaie kaskina aniki cota iriniwok Ka Kitci Tipaskoniketcik, nataweritamawakw anahwe cimakanic ka nikaniwitc kitci pe iciwirakaniwiritci Pwara ota e ici apiekw. Ki ta itekasonawaw kirawe e wi nta kiskeritamekw kekwariw e ici itactahorakaniwitc. Ninan tipirawe, aci nit ickwa werictanan kitci totamak kitci nipahakaniwitc epwamoci takocik ota.”

¹⁶ Aric peikw otawacima Pwar, omisa anihi okosiriw, ki petam e arimweritci anahweriw iriniwa aci e ki oreritamiritci ke totamiritci. Ki icaw neta cimakaniciwikiwamik neta e ici kanaweritakosiritci Pwara. E pitaketc, ki natawapamew, kaskina e ki witamawatc ka ki ici petak.

¹⁷ Minawatc Pwar ki wicamew peikw cimakanica ka mihikotc, e itatc: “Iciwiri ohwa ockinikiw kokimamik. Takoniw kekociciriw ke witamawatc.”

¹⁸ Cimakanic ki matcewirew anihi ockinikiwa, e iciwiratc kitci cimakanicik, e itatc: “Anaha iriniw ka kanawerimak, Pwar, ni ki wicamikw kaie ni ki itikw kitci pe iciwirak ohwa ockinikiw. Kekociciriw ki wi witamakw.”

¹⁹ Anahwe cimakanic ka nikaniwitc ki otapiniskenew anihi ockinikiwa, wircikewaw e iti matcekapowitcik, e kokwetcimatc: “Tan wa iciin?”

²⁰ Aci itiko: “Cota iriniwok ki ici nahitatowok kitci nataweritamatakw kitci iciwirekw Pwar wapake neta ka ici mawotcihitoritci makatewokorewa Ka Kitci Tipaskonikeritci. Ki nahitatowok kitci itetcik: ‘Aniki Ka Kitci Tipaskoniketcik nataweritamok kirawe wewerita kitci nta kiskeritakik ka ki totamiritci.’

²¹ Aka aric tapwetowik! Awocamec nemitana kata taciwok iriniwok ke kasotcik kitci makonatcik nimocomeca. Ki nespi tapwewok kaskina e tacitcik aka kekociciriw kitci mitcikik kaie aka kitci minikwetcik, nac kitci ickwa nipahakaniwiritci nimocomeca. Petawok tepirak kitci itein, ‘Ehe.’”

²² Aci anahwe ka nikaniwitc cimakanic ki itew anihi ockinikiwa aka awiriw kitci witamawaritci ka ki pe nta witamiritci. Ekoni ka ici itatc kitci kiweritci.

Pwar e iciticohwakaniwitc kice okimak, Félix ka icinikatakaniwiritci

²³ Minawatc anahwe cimakanic ka nikaniwitc ki wicamew nicw ocimakanicima, e itatc: “Mawotcihakok nicwaw mitato mitana cimakanicak, kaie nicowaso mitana kotakihik cimakanicak ka okitapitcik otitikomiwak, kaie nicwaw mitato mitana kotakihik cimakanicak ka takonatcik ocimakanimiwawa. Kaskina ickwa nisawikw kitci icaiekw nete otenak Césarée cakitato tipahikaneake ke otakocik.

²⁴ Nisawihakok kaie atikok ke miwiratcik Pwara. Nete ki ka iciwirawaw kice okimak Félix, aka wiec kitci iti iciwepasitc.”

²⁵ Ki tca masinaham masinahikaniw, ohweriw e itacterik:

²⁶ “Kwei, kir kice okimaw ka kicteritakosiin, Félix. Nin Claude Lysias ka masinahamatan.

²⁷ Cota iriniwok ki makonewok ohweriw iriniwa ka pe iciticohwamiki. Ki iteritamok kitci nipahatcik. Aric ka witamakoian Romain askik e ici masinasotc, ni ki icanan kirika nicimakanicimak neta ka ici kanawerimakaniwispan e ki wikotcihakitc.

²⁸ Ni ki nta kiskeritenan tan e ici itactahoratcik cota iriniwok. Ni ki tca iciwiraw anahwe Pwar neta ka ici mawotcihitoritci ko cota makatewokorewa acitc Pharisien iriniwa, ka Kitci Tipaskoniketcik.

²⁹ Ni ki itikok e itactahoratcik Pwara e ki pikotaritci otaiamihe irakonikewiniwaw. Aric nama kekociciriw ki otci matci totam kitci kackitamasotc kitci ki otci nipahakaniwitc kekotc kitci ki otci kipohwakaniwitc.

³⁰ Minawatc ni ki witamakowin cota iriniwok e ki nikan werictatcik kitci nipahatcik. Tecikotc ni ki iteriten kitci pe iciticohwak kitci natawapamisk, kaie ni ki itawok aniki ka ki itactahoratcik kir tipirawe kitci pe natawapamiskik, kitci witamaskik e ici itactahoratcik.”

³¹ Minawatc aniki cimakanicak ki totamok ka ki itakaniwitcik kitci itotisketcik. Mekwata e tipiskarik ki matcewirewok anihi Pwara, nete e iciwiratcik otenak Antipatris ka icinikaterik.

³² Kecepawonik cimakanicak ka motci pimotetcik ki koski kiwewok nete cimakaniciwikiwamik. Ki pakitinewok kotakihi cimakanica ka okitapiritci otitikomiwarik kitci takociwiraritci nete e iciwiratcik Pwara.

³³ Kotc e ickwa takocikik neta Césarée otenak, aniki cimakanicak ki mirewok masinahikaniw kice okimawa, kaie e itatcik: “Ohwa iriniw Pwar ka icinikasotc, aci kir ki tiperimaw.”

³⁴ Ki tapwatam aniheriw masinahikaniw anahwe kice okimaw. Ki kokwetcimew Pwara kekw askik wetciritci. Ki itiko: “Cilicie askik.”

³⁵ Minawatc anahwe kice okimaw ki itew: “Kecko nanake kiapatc ki ka kokwetcimitin, takocikawe ka itactahoriskik.” Ki itew ocimakanicima kitci kanawerimaritci Pwara neta kice okimawikiwamik Hérode.