Ka ki aitotiskeritci Cecoc otarotakana 22 - Kice Manito Ocki Omirwatcimowin

¹ “Niwitcicanak kirika otawiwok, natotacikw ohwe anotc ka wi iteian e wi nanakaskohikeian.”

² Ka petawatcik araméen e ici arimweritci, aci kirawe iti pekatisiwok. Aci Pwar itew:

³ “Ni cota iriniwin ni. Nete ni ki taci nitawikin Tarse otenak, Cilicie askik itekera. Aric ota ni ki taci matcekin Jérusalem otenak. Gamaliel ka ki kiskinohamawitc. Wewerita ni ki kiskinohamakw kitci nosanetawak aniheriw cota aiamihe irakonikewiniw tapickotc kitaniskotape kimocominowok ka nosanetawaspan. Ni ki mantokason kitci atoskectawak Kice Manito, mitowi kaskina kirawaw anotc.

⁴ Ni ki itotiskan kitci nekatcihakaniwitcik mitcet iriniwok kaie iskwewok ka nosanetawaspan Teperitcikeritci Omeskanamiriw, mitcet tca kitci nipahakaniwitcik.

⁵ Kice makatewokorew kirika aiamihe okimawok neta ka ici Kitci Tipaskonikaniwok kata ki witamok tapwe anihe ka iteian. Wirawaw tipirawe ki masinahamowepanak owitci cota makatewokorewawa nete ka tacikerispana Damas otenak e witamawatcik awin nin. Ni ki iciwitan anihi masinahikana nete Damas otenak, e ki icaian nete kitci makonakik iriniwok ka nosanehwawaspan Cecoca nete, kitci iciwirakik Jérusalem otenak kitci kicakonakaniwitcik.”

Pwar e tipatcimotc ka isparitc ka kweskatisitc

⁶ “Mekwata meskanak e pimoteiapan kirika aci e iti pecowapataman Damas otenaw, aci wiec iti apita kicikapan. Kek keskat ki pe wactew e micta sokactek, wakwek e pe otactek, e waskackakoan.

⁷ Ni ki pakicinin motcik kirika ni ki peten e itikoian: ‘Saul, Saul, kekwan wetci nekatcihiin?’

⁸ Ni ki itan: ‘Awin ni kir, Teperitcikein?’ Ni ki itikw: ‘Nin Cecoc, Nazareth ka otcitc, ka nekatcihiin.’

⁹ Aniki ka pe witcewiwaspan wapatamopanak e pe wacterik, nama aric ki otci petamok e aimihikoiwak.

¹⁰ Aci ni ki kokwetcikemon: ‘Tan ke totaman, Teperitcikein?’ Aci Teperitciketc nit itikw: ‘Pasiko. Ica nete Damas. Ekota neta ke witamakoin kaskina ka ici nataweritak Kice Manito kitci totaman.’

¹¹ Nama ni wapitai, e apitc osam sokactek anihe e wactek. Niwitcewakanak ni ki otapiniskenikok kirika ni ki iciwirikok neta Damas otenak.”

¹² “Tapan neta peikw iriniw, Ananias icinikasopan. Miro aiamihawatisipan kaie nosanetapan kitirakonikewininariw, kirika kaskina cota iriniwok nete Damas otenak kicterimepanak.

¹³ Ni ki pe natawapamikw. Pecotcik pe nanipowiw, kirika ni ki itikw: ‘Saul, niwitcican, ki witamatin kitci koski wapiin.’ Tecikotc ni ki mirwatisin. Ni ki tca wapamaw.

¹⁴ Kiapatc Ananias ki itew: ‘Kice Manito, anihi kitaniskotape kimocominowok ka nosanehwawaspan, ki ki nikan orapamikw kitci kiskeritamowotc otiteritamowin, kitci wapamatc anahwe wircike icikowisk ka iteritakositc, kirika kitci petawotc e arimwetc wir tipirawe.

¹⁵ Ki ka tipatcimon meka wir otci, kitci witamawotcik kaskina iriniwok anihe ka ki ici wapataman kirika ka ki ici petaman.

¹⁶ Anotc tca, kekwan wetci pehoin kiapatc? Pasiko. Sikahataso kirika pakoserim Teperitciketc kitci nataweritamawotc kitci kisisiparisk, kitci tca kasihikatek kipactatowin.’”

Pwar e tipatcimotc e ki iciticohwakaniwitc kitci nta tipatcimoctawatc aka ka cota iriniwiritci

¹⁷ “Minawatc ni ki kiwan Jérusalem otenak. Mekwata e taci aiamihaiapan neta kitci aiamihe mikiwamik, kekocic ni ki itapataman.

¹⁸ Ni ki wapamaw Teperitciketc kirika e icitc: ‘Tactapi, wipatc orowi neta Jérusalem otenak. Aniki meka neta ka taciketcik nama ni kata tapwetamok ke itein, nin ke ici tipatcimiin.’

¹⁹ Ni ki itwan: ‘Teperitcikein, kiskeritamok e icaiapan ko cota aiamihe mikiwamiskak kitci makonakwapan kirika e totamapan kitci macikowakaniwitcik aniki ka tapwerimiskik.

²⁰ Kaie ka nipahakaniwitc Étienne, anahwe ka tipatcimospan kir otci, kaie nin ni tacikatai neta. Kaie nin ni ki ici naherimawok aniki ka ki nipahatcik, kaie ni ki kanaweritamawawok okapotowaniwawa wirawaw otci.’

²¹ Aric ni ki itikw Teperitciketc: ‘Matca! Warawik meka ki ka iciticohotin, kitci natawapamatcik aniki aka ka cota iriniwitcik.’”

Pwar acitc ka tiperimatc Romain cimakanica

²² Aniki iriniwok e mitcetitcik natotawepanak Pwara, nac aniheriw ka ickwa iteritci kitci iciticohwakaniwitc kitci natawapamatc aka ka cota iriniwiritci. Aci nta micta tepitepwewok, e tca itetcik: “Matca nipahakw anaha iriniw, aka kitci nokositc! Nipahakw! Nama wawatc tipi asiteritakosiw kitci pimatisitc ota askik!”

²³ Nanotakosipanak. Manipatamopanak okapotowaniwaw, kirika icpimik iciwepinamopanak mirikosiriw.

²⁴ Aci ka tiperimatc Romain cimakanica ki itew kitci pitakahakaniwiritci Pwara neta cimakaniciwikiwamik, kirika kitci pasakactehwakaniwiritci, nac kitci witamiritci kekwariw wetci nanotakosinaniwanik.

²⁵ Aric ka ickwa takopitakaniwitc aci kitci pasakactehwakaniwitc, Pwar itew anihi cimakanica ka nikaniwiritci neta: “Actew ia ni kitci pasakactehwekw awik e Romain iriniwitc, aka moci wewerita e ki otci tipaskonakaniwitc?”

²⁶ Ka ickwa petak aniheriw, anaha cimakanic ka nikaniwitc ki nta witamawew anihi ka tiperimikotc, e nta itatc: “Tan ke totaman? Romain iriniwiw anahwe!”

²⁷ Anaha ka tiperimatc cimakanica pe natawapamew Pwara e kokwetcimatc: “Witamaci, tapwe ia kir ki Romain iriniwin?” Pwar itew: “Ehe.”

²⁸ Aci itew anaha ka tiperimatc cimakanica: “Ni ki kicikason micta nipara coria kitci ki Romain iriniwian.” “Nin tca,” itew Pwar, “ni Romain iriniwin esko ka nitawikian.”

²⁹ Tecikotc aikatekapowiwok aniki ka wi pasakactehwawaspan kitci arimweritci. Kaie wir sekisiw anaha ka tiperimatc cimakanica, aci e kiskerimatc Pwara e Romain iriniwiritci, wir e ki itespan kitci takopitakaniwiritci, piwapiskwapiriw kitci totcikaterik.

Pwar e iciwirakaniwitc neta ka ici mawotcihitoritci cota iriniwa Ka Kitci Tipaskonikeritci

³⁰ Ka tiperimatc cimakanica wi nanto kiskeritamopan kekwariw mia cota iriniwok ka ici itactahoratcik Pwara. Ekoni wetci kecepawonik ki itetc kitci maninamowakaniwiritci opiwapiskwapimiriw, kirika ki itew anahweriw cota makatewokorewa ka tiperitamiritci kaie anihi kaskina cota iriniwa Ka Kitci Tipaskonikeritci kitci mawotcihitoritci. Minawatc ki iciwirew neta Pwara. Ki nanipowihew nikanik.