Ka ki aitotiskeritci Cecoc otarotakana 21 - Kice Manito Ocki Omirwatcimowin

Pwar e icatc Jérusalem otenak

¹ Ka ickwa nakatitoak e micta kackeritamakipan, ni ki matcehonan, nete tca icikowiskw ni ki icitcimanan minictikok Cos ka icinikatek. Kecepawok minawatc nete ni ki ici takocatohonan kotak minictikok, Rhodes ka icinikatek. Minawatc neta e otci matcaiak, nte ni ki itahorikowinan Patara otenak.

² Minawatc ni ki petakanan e takonokopanen neta micta tciman, nete e icitcimemakak Phénicie askik. Ni ki positcimanan e matcehoak.

³ Pecotcik Chypre minictikok ni ki iti takocatohonan, e miro wapatamak. Cawonok tca itekeanakak ni ki icitcimaninan, nete Syrie askik itekera e icaiak. Tyr otenak ni ki ici macakanan, ekota e ici kapanasonaniwok.

⁴ Ni ki miskawananak neta ka tapwerimatcik Cecoca. Peikorakanan tca irikik ni ki witci tacikemananak. Miro Manitowa ki itikopanak aniki iriniwok kitci witamawatcik Pwara aka kitci icaritci Jérusalem otenak.

⁵ Aric ka ickwa peikwo manactakanakak, aci minawatc ni ki matcanan. Kaskina e tacitcik acitc owiwawa kaie onitcaniciwawa ni ki nosanehikonanak, nac esko otenawonik. Neta rarewak kitcikamik ni ki nipiskonan e aiamihaiak.

⁶ Minawatc ka ickwa kaskina mamitcitc matcacikatoak, ni ki positcimanan micta tcimanik. Wirawaw tca ki kiwewok omikiwamiwak.

⁷ Tyr otenak ni ki otci matcehonan, nete Ptolémaïs otenak e ici takocatohoak. Ni ki arimikowananak neta ka taciketcik ka tapwerimatcik Cecoca, kirika peikwo kickwa ni ki witci tacikemananak.

⁸ Minawatc kecepawok ni ki matcanan. Nte ni ki ici takocininan Césarée otenak. Ni ki pitakewanan neta Pirip omikiwamik. Enko anahwe ka pa tipatcimospan ko Cecoca otci. Ekota ka ki tacikewakitc omikiwamik. Anahwe Pirip, enko kaie peikw neta e nicowatciritci ka ki orapamakaniwaspan iriniwok neta Jérusalem otenak, aniheriw kitci irapatisitcik kitci mitatcik mitcimiriw, kirawe kitci witcihakaniwiritci cikawa.

⁹ Newiripana otanisa aka e nipowiritci ka nikan tipatcimorispana ko Kice Manitowa otci.

¹⁰ Aci mitceto kickwa ni tacikatan neta. Kek ki pe takociniw neta peikw iriniw ka nikan tipatcimotc ko, Judée e pe ototetc, Agabus icinikasopan.

¹¹ Ni ki pe natawapamikonan. Ki maninamawew Pwara opokotehoniw. Ekoni ka ici takopititisotc, ositik kaie otcitcik, aniheriw pokotehona e ki apatcihatc, kirika ki itew: “Enko ohweriw ka ki itetc Miro Manito: ‘Anahwe iriniw ka opokotehonitc ohweriw, ekoni ke itapikatikotc cota iriniwa nete Jérusalem otenak, minawatc kata iciwiriko nte wiec aka ka cota iriniwiritci kitci tipaskonikotc.’”

¹² Ka ickwa petawakitc ni e itetc, ninan kirika aniki ka tapwerimatcik Cecoca neta Césarée ka taciketcik, kaketin ni ki itanan Pwar aka kitci icatc nete Jérusalem otenak.

¹³ Aric ki itew: “Kekwan wetci matoiekw kirika tca wetci natowi totamekw kitci atweritcikeian? Aci meka nit ickwa aikan aka tepirak kitci takopitikoian, aric kaie matci kitci nipoian nete Jérusalem otenak, anihe otci e atoskectawak Teperitciketc Cecoc.”

¹⁴ Aric aka e ki otci cakosimakitc, ni ki ponimanan kaie ni ki itanan: “Teperitciketc otiteritamowin kitci icinakonik!”

¹⁵ Ka ickwa tacikeiak neta memacic, ni ki nisawinan kirika ni ki matcanan, Jérusalem otenak kitci icaiak.

¹⁶ Atita ka tapwerimatcik Cecoca neta ka tacikewaspan Césarée otenak ni ki witcewikonanak. Ni ki iciwirikonanak nte ke tacikehikoiak, anahwe omikiwamik Mnason ka icinikasotc. Anahwe iriniw nte otcipan Chypre minictikok. Aci weckatc tapwerimepan Cecoca.

Pwar e nta kiwotamatc Caka

¹⁷ Ka takociniak neta Jérusalem otenak, aniki ka tapwerimatcik Cecoca ki micta mireritamok e wapamimitcik.

¹⁸ Minawatc kecepawonik ni ki witcewikonan Pwar e nta kiwotamatc Caka. Ekota e ici mawotcihitowaspan kaskina ka nikaniwitcik aniki otci ka tapwerimatcik Cecoca.

¹⁹ Pwar ki arimikawew kirika wewerita ki tipatcimoctawew kaskina ka ki aitotamiritci Kice Manitowa e ki iciticohikotc kitci natawapamatc aka ka cota iriniwiritci.

²⁰ Ka ickwa petawatcik, ki mirwatcimewok Kice Manitowa. Minawatc ki itewok Pwara: “Niwitcicanan, ki wapaten ia tca, mictahi mitcetiwok cota iriniwok aci anotc ka tapwerimatcik Cecoca, aric kiapatc kaketin nosanetawok aiamihe irakonikewiniw.

²¹ Ki itakaniwiwok e kiskinohamawotcik kaskina cota iriniwok nte ka taciketcik ka ici tacikeritci aka ka cota iriniwiritci, kitci wepakonakik Moïse otaiamihe irakonikewiniw, kirika aka kitci kicawatocwakaniwiritci okosiwawa, kaie aka kitci nosanetatcik ka ki ici pimatisiritci weckatc otaniskotape omocomiwawa ka cota iriniwirispana.

²² Tan tca ke ki totamokw? Kata meka ketcinatc petakewok e ki pe takociniin.

²³ Ninan nit iteritenan ohwe kitci totamopan. Tawok ota new iriniwok e ki nespi tapwetcik kitci itotisketcik kekociciriw Kice Manitowa otci.

²⁴ Ki ka matcewirawok aniki iriniwok. Nta aiamihe kisisipasotawe, ekoni kaie kir ke totaman. Acitc kicikamowik irikik ke itakitakonik. Ekoni kitci ki kackipatakik octikwaniwaw kitci kiskeritakositcik tapwe e ki itotisketcik ka ki itetcik Kice Manitowa otci. Ekota tca kaskina ke otci kiskeritakik aka e tapwaniwonik aniheriw ka ki ici arimomikoin, aric tca kaie kir e sapitaman otirakonikewin Moïse.

²⁵ Minawatc aniki aka ka cota iriniwitcik ka ki iti nosanehwatcik Cecoca, ni ki masinahamowananak e ki witamawakitcik tan ka ki ici oreritamak: aka kitci mitcikik aniheriw wiasiriw awesisa ka ki ickwaswakaniwiritci e pakitinikaniwonik manitokana otci, kirika aniheriw wiasiriw awesisa ka ki nakwatakaniwiritci, kaie aka kitci mitcikik awesisa omikoriw, kaie aka kitci pacikwatisitcik.”

²⁶ Aci Pwar ki witcewew anihi e newiritci iriniwa, kirika minawatc kecepawonik kaskina ki aiamihe kisisipasowok, kotc ka itacterik kitci totcikaterik aka kitci iteritakositcik ometciwok cota aiamihewinik itekera. Minawatc ki icaw kitci aiamihe mikiwamik kitci tipatcimotc tan apitc mia kecikarik ke ickwaparinik kiapatc kitci iteritakositcik ometciwiwok, aci tca kitci ki aiamihe pakitinikaniwonik wirawaw otci, tato neta e tacitcik.

Pwar e makonakaniwitc kitci aiamihe mikiwamik

²⁷ E iti ickwa nicowaso kicikokarik, cota iriniwok Asie askik ka otcitcik ka wapamatcik Pwara neta kitci aiamihe mikiwamik, ki cikimewok kaskina iriniwa neta kitci kiciwasiritci. Ki makonewok anihi Pwara,

²⁸ e tepitepwetcik e itetcik: “Israël iriniwok, pe nta witcihicinan! Enko ohwe iriniw kaskina wiec ka pa kakeskwetc, kaskina kaie awiriwa e witamawatc aka kitci kicterimaritci Israël iriniwa, aka kaie kitci kicteritcikaterik Moïse otaiamihe irakonikewiniw kaie ohweriw kitci aiamihe mikiwamiriw. Aci tca anotc, wawatc ki pitakewirew aka ka cota iriniwiritci ota kitci aiamihe mikiwamik. Aniheriw tca e ki totak, ki ometciwotaw ohweriw kitci aiamihe mikiwamiriw ka kitcitwaweritakonik!”

²⁹ Wetci itewakopanen aniheriw, osam e ki wapamawaspan Pwara e pa witcewaritci peikw iriniwa, Trophime icinikasoripana. Nama cota iriniwiripan. Nte otciripan Éphèse otenak. Iteritamwakopan tca, Pwar ki pitakewirew neta kitci aiamihe mikiwamik.

³⁰ Kek kaskina wiec neta otenak micta matciparin. Kaskina wiec pe otcipatawok iriniwok. Makonewok Pwara e orowipitatcik kitci aiamihe mikiwamik. Ekotca tecikotc e ici kipahakik micta ickwatemiriw.

³¹ Natowi totamopanak kitci nipahatcik Pwara, nac ki pe witamawakaniwiw anahwe ka tiperimatc Romain cimakanica e micta matciparinik kaskina wiec neta Jérusalem otenak.

³² Tecikotc ki matcewirew anahweriw cimakanica ka nikaniwiritci kirika otirinima, kaie ki ispatawok neta e ici mitcetinaniwonik. Iriniwok ka wapamatcik anihi cimakanica ka nikaniwiritci kirika kotakihi cimakanica ki ponihewok e macikowatcik Pwara.

³³ Aci naha ka nikaniwitc pecotcik ki natawapamew Pwara. Ki itew kitci makonakaniwiritci kirika kitci takopitakaniwiritci, nicw piwapiskwapiriw kitci totcikaterik. Minawatc ki kokwetcimew, awiriwa ni anihi kirika tan ka ki totamiritci.

³⁴ Aric neta e mitcetinaniwonik, papitoc aitewok e tepitepwetcik, atita peikw kekociciriw e aitetcik, kotakihik kotakeriw kekociciriw aitewok. Anaha ka nikaniwitc nama nisitotam, osam papitoc e aiteritci iriniwa. Nitowatc ki itew kitci iciwirakaniwiritci Pwara nete cimakaniciwikiwamik.

³⁵ E iti takocikik iskwatowakanik neta cimakaniciwikiwamik, cimakanicak arimatc ki iti miwirewok, osam e apitc kiciwasitcik iriniwok. Kaketin kokwepickowewok.

³⁶ Kaskina meka nosanehwepanak, e tepitepwetcik e tca aitetcik: “Kitci nipahakaniwiritci!”

Pwar e arimitakositc

³⁷ Apitc ka iti pitakahakaniwitc Pwar neta cimakaniciwikiwamik, aci itew anihi ka nikaniwiritci: “Matci ia ki witamatin kekocic?” Ka nikaniwiritci itiko: “Ka! Grec arimwewin iani kit arimwan!

³⁸ Namaiew tca kir anahwe Égypte iriniw, aka weckatc ote ka ki micta matciparitwatc kirika ka ki matcewiratc newaw kice mitato mitana tato iriniwa, nte e ki iciwiratc neta askik ka ici cipewatawokarik?”

³⁹ Pwar itew: “Nin, ni cota iriniwin. Nete ni ki taci nitawikin Tarse otenak. Anihe otenaw micta kicteritakon, nete Cilicie askik itekera. Ki pakoserimitin kitci pakitiniin kitci aimihakik iriniwok.”

⁴⁰ Ki pakitiniko anihi ka nikaniwiritci kitci arimwetc. Aci Pwar iskwatowakanik taci nanipowiw kirika icpitcitceriw aka kitci kitoritci iriniwa. Tekaci nama kitonaniwoniw. Aci arimwew Pwar, araméen arimwewiniw e ici aiarimwetc: