Ka ki aitotiskeritci Cecoc otarotakana 2 - Kice Manito Ocki Omirwatcimowin

Miro Manito ka pe nta pitciteheckowatc iriniwa ka tapwerimaritci Cecoca

¹ Apitc ka takociparik e mirwatcitcikatek cota makocan, Pentecôte e icinikatek, aci kaskina tapickotc mawotcihitowakopan iriniwok ka tapwerimatcik Cecoca neta peikw mikiwamik.

² Keskat kekociciriw ki petamok, icpimik e otcitakonik, mia e micta rotinik, e pitakeroweparinik neta mikiwamik e ici apiwakopanen.

³ Ki wapatamok kekociciriw e pe nokonik, mia ickoteriw e icinakonik. Ki tatipanipariniw, papeikw okitc octikwaniwak ki ispariniw aniki iriniwok ka taciketcik.

⁴ Kaskina ki mockineckakowok Miro Manitowa otehiwak, kaie kotakeriw arimwewiniw ki iti arimwewok, kotc ka ki ici mirikotcik Miro Manitowa kitci kackitatcik e arimwetcik.

⁵ Neta Jérusalem otenak mitcetiwakopan cota iriniwok mocak ka aiamihawakopanen, mitcet pitoc askik e ototewakopanen.

⁶ Ka petakik aniheriw, kaskina ki pe nta mawotcihitowok. Ki micta kockopariwok e petawatcik anihi iriniwa ka tapwerimaritci Cecoca e kackitaritci e arimweritci kaskina otarimwewiniwaw wirawaw tipirawe, misawatc papitoc e ici arimwetcik.

⁷ Ki micta kockowapamohikowok kaie ki kicterimewok, e itetcik: “Aniki iriniwok ka aiarimwetcik, kaskina Galilée askik otciwok, taina?

⁸ Kekwariw wetci kackitatcik e ici arimwetcik kaskina kirano papeikw ota e taciikw e ici arimweikw?

⁹ Atita nta e taciikw ototewok askik ‘des Parthes’ ka icinikatcikatek, atita kaie nta Médie, Élam acitc Mésopotamie. Kotakihik ototewok Judée askik kaie Cappadoce, Pont acitc nte Asie askik.

¹⁰ Kiapatc kotakihik otciwok Phrygie, Pamphylie, acitc Égypte, Libye itekera pecotcik otenak Cyrène. Kaie tawok otenak Rome e ototetcik,

¹¹ kaie Crète e otcitcik acitc Arabie askik. Atita nta e taciikw cota iriniwiwok esko ka nitawikitcik. Kotakihik kaie ki kweski aiamihawok kitci cota iriniwitcik. Peikon kaskina ki petawananowok e ici arimwetcik kirano tipirawe papitoc e ici arimweikw, e atisokatakik Kice Manitowa otamirowiniw e kice mirwacinik!”

¹² Kaskina tca micta mamiskateritamwakopan. Nama tca kiskeritamwakopan ke ki iteritakik. Atita aititowakopan: “Kekwan anihe wetci isparik?”

¹³ Aric kotakihik papirotawewakopan anahweriw ka tapwerimaritci Cecoca, e itatcik: “Micta kiwockwepiwok.”

Pien e aiarimwetc

¹⁴ Aci pasiko Pien kirika anihi kotakihi mitato acitc peikw e taciritci Cecoc otarotakana. Ki aiarimwew e micta kiciwetc, e itetc: “Kirawaw, niwitci cota iriniwok, kaie kirawaw kaskina Jérusalem otenak ka tacikeiekw, wewerita natotamokw ohwe ke ititakok, kirika kokwetcitakw kitci kokwe nisitotamekw ohwe ka pe iciwepak.

¹⁵ Ka iterimekok aniki iriniwok ‘kiwockwepiwok,’ nama ni ata kiwockwepiwok. Pitcerak meka tepirak cakitato tipahikaneaw e kicepawok.

¹⁶ Aric enko ni aci e isparik weckatc ka tipatatakipan peikw ka nikan tipatcimospan, Joël ka icinikasospan,

¹⁷ ‘Enko ohwe ke iti aisparik mamitcitc kicikake, ki itew Kice Manito. Ni ka pe iciticohwaw Nimiro Manitom, kaskina iriniwok otci. Kikosiwawok kaie kitanisiwawok kata iti nikan tipatcimowok. Aniki nta e taciekw ka ocki pimatisitcik ni ka mirawok ke icinakik, kitci ki tca aimihakik; Aniki nta e taciekw ka kiceatisitcik ni ka mirawok kitci wecipatatakik. Ekota neta ke otci witamawakik wa itakik.

¹⁸ Tapwe, kaskina iriniwok kaie iskwewok ke atoskectawitcik ani apitc, ni ka mirawok Nimiro Manitoma, kaie kata nikan tipatcimowok.

¹⁹ Ni ka itotiskan kitci micta mamiskasinakok icpimik wakwek, kaie ni ka mata kackitan ota askik. Miko kata nokon, kaie ickote, kirika akwapite.

²⁰ Nama kata wasikew kicikaw pisimw, kirika tipiskaw pisimw kata mikosiw, mia miko kitci icinakositc. Kaskina anihe kata otcitciparin ni kitci isparik epwamoci otcitciparinik okicikom Teperitciketc, aniheriw ke kicikarik ke micta kicteritakonik kaie e icperitakonik.

²¹ Aci tca nta, kaskina awik ke pakoserimatc Teperitcikeritci kitci witcihikotc kata akwacimakaniwiw.’” Joël 3.1-5 (2.28-32)

²² “Kirawaw Israël iriniwok, natotamokw ohwe ke ititakok: Cecoc, Nazareth otenak ka ki otcitc, ki pe miriko Kice Manitowa tiperitamowiniw, kaskina wiec kitci ki mata kackitatc wir otci kaie kitci matawi aitotisketc mekwata ka witci tacikemitakw, mia e ici kiskeritamekw kirawaw tipirawe.

²³ Anaha iriniw, Cecoc, ki ki mirikowinawaw mia ka ki ici oreritakipan Kice Manito kaie ka ki ici nikan itactaspan kitci pe iciwepanik. Ki ki nipahawaw, e ki totamekw tcipaiatikok kitci tciskaskowatikotc iriniwa aka ka kiskerimaritci Kice Manitowa.

²⁴ Aric Kice Manito ki apitcipahew. Nipowinik ki otci wikotcihew, neta ka ici micta nekateritakaniwonik. Nama meka ki cakotcihiko nipowiniw.

²⁵ Weckatc meka Tapit ki arimomepan Cecoca, e ki itatc: ‘Aspinikotc ni wapamatai Teperitciketc e nikanickowitc. Ni witcewikw, aka kitci nikiparian e koctatcian.

²⁶ Ekoni wetci micta mireritaman nitehik, kaie e micta mirwatcimak. Ni ka arwepin e asperimototawak.

²⁷ Nama meka ki ka pakiterimin, Teperitcikein, neta ka ici taciketcik ka nipotcik. Nama ki ka pakitinin, nin mocak ka ki nosanehitan, kitci pakickiritian matikowocik.

²⁸ Ki ki wapatahin meskanaw, pimatisiwinik ka iticimok. Ni micta mireriten e witci tacikemitan.’” Psaumes 16.8-11

²⁹ “Niwitcicanak, ni ki mirikoin wewerita kitci arimotamatakok kitaniskotape kimocomino Tapit: ki nipo, kaie ki rikwaskatakaniwiw. Omatikowoc kiapatc anotc takoniw ota ka ici tacikeikw.

³⁰ Aric nikan tipatcimo iriniwipan, kaie kiskeritamopan Kice Manitowa e ki nespi tapweritci kitci miraritci peikw otaniskotape osima kitci okimawiritci, mia wir tipirawe ka ki okimawitc.

³¹ Ki nikan wapatam anahwe Tapit ke iti isparinik. Ki tca arimotam kitci apitciparitci anihi ka ki pehokopan kitci pe iciticohwakaniwiritci ota askik kitci akwacimimitokw. Ki itew meka anahwe Tapit: ‘Nama ki otci pakiterimakaniwiw nipowinik neta ka ici tacikeritci ka niporitci, kirika owiaw nama ki otci onataniw matikowocik.’ Psaumes 16.10

³² Anahwe Cecoc ka arimomak ki apitcipahiko Kice Manitowa. Kaskina kaie e taciak ni ki wapamanan.

³³ Ki ici opickowakaniwiw Kice Manitowa onihiwinik, kaie Kotawinowa ki miriko Miro Manitowa, kotc ka ki ici nespi tapweritci. Kaie kirano ki ki mirikowinano anahwe Miro Manito. Enko anihe ka ici wapatamekw kaie ka petamekw anotc.

³⁴ Nama meka wir tipirawe ki otci ocpickaw anahwe Tapit, aric ki itew: ‘Teperitciketc Kice Manito ki itew anihi Ka Tiperimimitc: Pe nta api ninihiwinik,

³⁵ nac kitci tepahakik ka cikerimiskik, tekaci kir kitci tiperimatcik.’ Psaumes 110.1

³⁶ Enko tca ohweriw ke ketcinaweritakik kaskina iriniwok Israël askik ka taciketcik: anahwe Cecoc ka ki tcictaskatekw tcipaiatikok, enko anihi Kice Manito ka ki okimawihatc kitci tiperimimitokw, kaie ka ki itespan kitci pe iciticohwatc ota askik kitci akwacimimitokw!”

³⁷ Ka petakik aniheriw, ki micta cakotaskahowok. Ki kokwetcimewok Piena kirika anihi kotakihi Cecoca otarotakaniw: “Niwitcewakananak, tan tca e actek kitci itotiskeiak?”

³⁸ Ki itikowok Piena: “Kweskatisikw kirika kaskina papeikw e taciekw sikahatasokw, Cecoc Krist oticinikasowin e apatcitaiekw, kitci ki tca kasihamakoiekw kipactatowiniwawa. Ekoni tca ke mirikoiekw Miro Manitowa, Kice Manito ocaweritcikan.

³⁹ Kice Manito ki nespi tapwew kitci totak aniheriw kirawaw otci kirika kinitcaniciwawa otci, matci kaie kaskina anihi otci kecko ke pe pimatisiritci, kaskina ke wicamatc Teperitciketc Kikice Manitomino.”

⁴⁰ Kinowec kiapatc ki aimihew Pien anahweriw iriniwa e wi cakosimatc kirika wikosimatc kitci tapwerimaritci Cecoca, e itetc: “Otapinamokw ohwe ka mirikoiekw kitci akwacimikoiekw, aka tca kitci oniciniekw mia kotakihik ota iriniwok.”

⁴¹ Mitcet ki natotawewok e arimweritci Piena, kaie ki sikahatasowok. Aniheriw e kicikarik wiec nictowaw kice mitato mitana taciwakopan ka ki pe tapwerimatcik Cecoca.

E ici pimatisiwaspan aniki ka tapwerimatcik Cecoca

⁴² Wewerita natotamwakopan e ici kiskinohamakeritci Cecoca otarotakaniw, kaie mocak witcewitowakopan, tapickotc e witci mitcisomitowakopan, kaie mamowi aiamihawakopan.

⁴³ Kaskina aniki iriniwok ka tapwerimatcik Cecoca mamiskateritamwakopan, osam meka anahweriw Cecoc otarotakana mitcet kekociciriw e totamirispana e mata kackitaritci.

⁴⁴ Kaskina aniki ka tapwerimatcik Cecoca mamowi tacikewakopan kaie mamowi tetawonamatowakopan kaskina e ici tatakik.

⁴⁵ Atawewakopan e ici tatakik kaie e irapatcitatcik. Aniheriw tca coriariw ki tetawonamatowok, e witcihitotcik kotc wa ici apatcitatcik kekociciriw.

⁴⁶ Tato kickwa mocak mawotcihitowakopan kitci aiamihe mikiwamik, kaie witci mitcisomitowakopan omikiwamiwak. Mireritamwakopan kirika mirotehewakopan.

⁴⁷ Mirwatcimewakopan ko Kice Manitowa kaie kaskina awiriwa kicterimikowakopan. Tato kickwa, Teperitciketc eckam ki rikihew iriniwa kitci akwacimakaniwiritci.