Ka ki aitotiskeritci Cecoc otarotakana 19 - Kice Manito Ocki Omirwatcimowin

Pwar Éphèse otenak

¹ Mekwata Apollos e tacikespan Corinthe otenak, Pwar ki capotoweckam aniheriw askiriw ka matinawonik Asie Mineure askik itekera. Nte ki ici takociniw Éphèse otenak. Ki miskawew neta atita iriniwa ka tapwerimaritci Cecoca.

² Ki kokwetcimew, e itatc: “Apitc ka tapwerimekw Cecoc, ki ki mirikowinawaw ia Miro Manito?” Ki itewok: “Nama wirawatc ni ki otci petakanan e takopanen Miro Manito.”

³ Aci Pwar kokwetcimew: “Kekw sikahatakewin ka ki pe otitikoiekw?” Aci itewok: “Capatis osikahatakewin.”

⁴ Pwar itew: “Capatis sikahatowepan iriniwa ka wi kweskatisiritci, kirika itepan Israël iriniwa kitci tapwerimaritci anihi minawatc ke pe takociniritci ickwa pimotete wir, Cecoca ni ka wi arimomaspan.”

⁵ Ka ickwa petakik aniheriw, ki sikahatasowok Teperitcikeritci Cecoca oticinikasowiniw e apatcitatcik.

⁶ Pwar ki takinew e aiamihectamowatc. Ki tca mirakaniwiwok Miro Manitowa. Aci ki kackitawok ocki arimwewiniw kitci arimwetcik aka ka kiskeritakonik, acitc kitci witakik ka ki ici mirikotcik Kice Manitowa kitci itetcik.

⁷ Wiec mitato acitc nicw taciwakopan aniki iriniwok.

⁸ Mekwata nete ka tacikespan Éphèse otenak Pwar, icapan ko cota aiamihe mikiwamik. Nicto pisimwa irikik e tacikespan, mocak aiarimwepan tekaci e sokerimotc. Arimotamopan ko Kice Manito Okimawiniw, kirika natowi cakosimepan anahweriw ka natotakotc.

⁹ Aric mitcet mackoctikwanewakopan. Nama wi tapwetamwakopan kirika e mitcetinaniwonik papirotamwakopan Omeskanamiriw Teperitcikeritci. Aci Pwar ki nakatew. Ki matcewirew anahweriw ka tapwerimaritci Cecoca kirika tato kickwa ki nta aimihew neta okiskinohamatowikamikok, Tyrannus ka icinikasokopanen okiskinohamatokiwam.

¹⁰ Ekoni ka totak nicwo pipona irikik, nac kaskina neta ka tacikewaspan Asie askik, cota iriniwok kaie aka ka cota iriniwitcik, ki petamwakopan Teperitcikeritci otitewiniw.

Scéva okosa

¹¹ Kice Manito ki mirew Pwara kitci mata kackitaritci wir otci e mamiskateritakonik.

¹² Ekoni wetci iciwitowakaniwiwakopanen ka akositcik mocweriw kekotc owikasimiriw, Pwara e ki apatcitaritci, e ki takickakoritci. Kikehikowakopan tca aniheriw e ici akositcik, kaie aniki ka ki pitciteheckakotcik matci manitowa orowirikopan.

¹³ Tapanak kaie neta ani apitc atita cota iriniwok ka pa icawakopanen wiec kitci matceticahamowatcik matci manitowa ka ki pitciteheckowaritci ka akosiritci. Kakotcitawakopan kaie kitci apatcitawatcik oticinikasowiniw Teperitcikeritci Cecoca e orowiticohwatcik matci manitowa. Itewakopan anahweriw matci manitowa: “Kit ititinawaw kitci orowiekw, Cecoc oticinikasowin otci, anihi ka tipatcimatc Pwar.”

¹⁴ Ekoni e itotiskerispana anahweriw e nicowatciritci okosa kitci makatewokorew Scéva e icinikasospan.

¹⁵ Aric peikwaw e kicikarik matci manitowa ki itikowok: “Ni kiskerimaw Cecoc kaie ni ki petakan e arimomakaniwitc anaha Pwar. Aric kirawaw, awin ni kirawaw?”

¹⁶ Anihi iriniwa ka ki pitciteheckakoritci matci manitowa, ekoni e ici kwackototakotcik, kirawe kaie mackawisiriw patok kaskina wirawaw. Ki micta nekatcihikowok. Ki kisiskapitikowok, kirika ki kectasipisonepitakaniwok. Ki tca ocimowok, tekaci e cacakarikatepatatcik kaie e apinehwakaniwitcik.

¹⁷ Kaskina Éphèse otenak ka taciketcik, cota iriniwok kaie aka ka cota iriniwitcik, ki petakewok ka ki isparinik. Kaskina ki sekisiwok kirika ki micta kicteritamok oticinikasowiniw Teperitcikeritci Cecoca.

¹⁸ Mitcet neta ka ki iti tapwerimatcik Cecoca ki pe nta witamok ka ki ici matci totakik, kitci petawakaniwitcik e mitcetinaniwonik.

¹⁹ Mitcet neta e tacitcik ka ki matci apatcitatcik matawosiwiniw e ki opimitemihatcik owitc iriniwawa ki petawok omasinahikaniwawa neta ka ki otci kiskinohamasowaketcik aniheriw kitci ici kackitatcik. Ki tca ickwasamok aniheriw omasinahikaniwawa, e wapamakaniwitcik e mitcetinaniwonik. Ki akitcikateriw irikik ka ki itakitakonik aniheriw masinahikaniw: niarano mitana tatwaw kice mitato mitana tatowapiskw ki itakitakoniw.

²⁰ Ekotca ni wetci eckam iti mitcetipanak iriniwok ka ki petakik Teperitcikeritci otitewiniw kirika eckam kirawe mitcetipanak ka ki tapweritakik.

E matciparik Éphèse otenak

²¹ E ickwa aniheriw aiciwepanik, Pwar ki oreritam kitci capotoweckak Macédoine kirika Achaïe askiriw, nete tca kitci icatc Jérusalem otenak. Ki itew: “Ickwa icaiane nete, kaie actew kitci icaian nete Rome otenak.”

²² Aci ki iciticahwew nicw iriniwa ka witcihikospan, Timothée kirika Éraste, nete kitci icaritci Macédoine askik. Aric wir tacikepan kiapatc memacic neta Asie askik.

²³ Ani apitc micta iti arimipariwakopan aniki ka nosanetawaspan Teperitcikeritci Omeskanamiriw.

²⁴ Tapan neta peikw iriniw, e ocitaspan ko kekociciriw ka mirwacinik, coriawapiskoriw e apatcitaspan. Démétrius icinikasopan. Mikiwamikaniciciriw ocitapan e keskinowapatak otaiamihe mikiwamiriw anihi manitokana iskwewa Artémis ka icinikatawaspan. Micta coriakewakopan anahwe Démétrius kirika otamiro irinima, aniheriw e ocitatcik.

²⁵ Ki mawotcihew anahweriw otamiro irinima kirika kotakihi iriniwa aniheriw mitowiriw ka ici otamiroritci, e itatc: “Niwitc iriniwok, ki kiskeritenawaw nipara e kanewiikw ohwe ka ici otamiroikw.

²⁶ Aric ki petakanawaw kaie ki wapatenawaw e isparik: anahwe iriniw Pwar ki cakosimew iriniwa aka kitci kicterimaritci manitokana iriniwok ka ki ocihatcik. Ki tca paskewirew mitcet iriniwa, nama kaie tepirak ota Éphèse otenak, aric kekatc kaskina wiec neta Asie askik itekera.

²⁷ Kata mareritcikatew tca kotamirowinino. Nama kaie tepirak anihe, kaie kata mareritcikateriw otaiamihe mikiwam anaha ka micta kicteritakositc manitokan Artémis. Nama tca aci wewerita kata kicterimakaniwiw, misawatc ata e micta kicterimatcik kaskina aniki ka taciketcik neta Asie askik, kaie nte kaskina e irikokoskamikarik!”

²⁸ Iriniwok ka ickwa petawatcik ani e iteritci anahweriw Démétrius, ki micta kiciwasiwok kirika ki tepitepwewok, e itetcik: “Micta kicteritakosiw anahwe Artémis, Éphèse iriniwok ka kicterimatcik!”

²⁹ Aci iti matciparin neta kaskina otenak. Kek iriniwok ki makonewok Gaïusa kirika Aristarqua, Macédoine iriniwok aniki e nicitcik, enko anihi Pwar ka witcewikotc e pa pimatisitc. Nte ki iciwirewok wiec ko ka nta ici mawotcihitonaniwonik.

³⁰ Pwar wi icapan neta e mitcetinaniwonik. Aric aniki kotakihik ka tapwerimatcik Cecoca otcinehwepanak Pwara aka neta kitci icaritci.

³¹ Atita ka nikaniwitcik neta Asie askik ka okwimesimikospan Pwar, irin kotc ki pe iciticahamako masinahikaniw e pe otcihikotc aka kitci icatc neta ka ici mawotcihitonaniwonik.

³² Mekwata aniki ka ki mawotcihitotcik taci micta matciparitawakopan. Atita nanotakosiwakopan kekociciriw otci, peikon kaie kotakihik enkoni kaie wirawaw e totakik, kirika mitcet neta e tacitcik nama wirawatc ki otci kiskeritamwakopan kekwariw wetci ki mawotcihitonaniwonik.

³³ Tapan neta peikw cota iriniw, Arikisan icinikasopan. Cota iriniwok nikanik ici okonewok anihi Arikisana kitci nta aiarimweritci. Atita neta ka tacikewaspan tepitepwewok e witamawatcik tan e isparinik. Aci Arikisan icpitcitceriw, e wi arimwetc neta e mitcetinaniwonik, kitci itetc aka kekociciriw e ki matci totamiritci cota iriniwa.

³⁴ Aric aniki ka taciketcik e mitcetinaniwonik ka kiskerimatcik anihi Arikisana e cota iriniwiritci, kaskina tapickotc ki tepitepwewok, peikonok e itetcik, wiec nac nicwo tipahikan irikik e tepitepwetcik: “Kicteritakosiw Artémis, Éphèse iriniwok ka kicterimatcik!”

³⁵ Kek peikw iriniw, mocak ko ka masinahak e ici orakonikaniwonik e mawotcihitonaniwonik e irapatisitc, ki kackihew iriniwa kitci natotamiritci, e itatc: “Éphèse iriniwok, kaskina awik kiskeritam kirano ka mitawokw aniheriw otaiamihe mikiwam anaha ka kicteritakositc Artémis kirika anihi asiniwa ka kicteritakosiritci, icpimik ka ki otcipariritci, neta e ici masinasotc Artémis.

³⁶ Tapwe ni anihe, kaskina awik kiskeritam. Ke iti totamekopanen tca, ki ta pekatisinawaw kaie aka totamokw kekocic ke ki otci cikeritamekw nanake.

³⁷ Ki ki pe iciwirawawok aniki iriniwok kitci itactahorakaniwitcik, misawatc aka e ki otci pa kimotitcik aiamihe mikiwamiskak, kaie aka e ki otci marerimatcik anihi kikice kimanitomino Artémis.

³⁸ Kecpin Démétrius kirika otamiro irinima wi itactahoratawe awiriwa, takoniw ke ki icatcik kitci tipaskonikaniwonik, kaie tariwa tipaskonike iriniwa. Ekote ke ici nta mamicikemotcik!

³⁹ Kecpin e takonokwen kotak kekocic e wi arimotamekw, ki ka orictanano kitci mawotcihitonaniwok, mia e itactek irakonikewin kitci totcikatek.

⁴⁰ Matci pot ki ka itactahorikowinano e ki kokwe cakotcihokw kice okimaw anihe otci ka ki isparik okacikak. Ceckwat meka kata iteritakon wetci ki mawotcihitoikw kitci tca matciparihitonaniwok. Kaie nama ki ka kackitanano kitci nanakaskotamokw wetci ki ici mawotcihitoikw.”

⁴¹ Ka ickwa aitetc aniheriw, minawatc ki itew iriniwa kitci matcaritci.