Ka ki aitotiskeritci Cecoc otarotakana 18 - Kice Manito Ocki Omirwatcimowin

Pwar ka iciwepasitc Corinthe otenak

¹ Minawatc Pwar ki matcaw neta Athènes otenak, nete e icatc Corinthe otenak.

² Tapan neta peikw cota iriniw, Aquilas icinikasopan. Nte Pont askik otcikopan. Nama weckatc ki pe takocinikopan, Italie askik e ki pe ototetc acitc owiwa, Priscille icinikasoripana. Anahwe meka Kice Okimaw Claude ki itekopan kaskina cota iriniwa kitci nakatamiritci aniheriw otenariw Rome. Pwar ka takocik neta, ki natawapamew anihi Aquilas kaie owiwa.

³ Ki tacikew omikiwamiwarik kirika ki witci otamiromewok, tapickotc meka ici otamiropanak kaie wirawaw. Ocitapanak rakasimoniw.

⁴ Tatwaw e arwepi kicikarik, Pwar nta aiarimwepan cota aiamihe mikiwamik kirika kotcitapan kitci cakosimatc cota iriniwa kaie Grec iriniwa kitci tapwerimaritci Cecoca.

⁵ Tekocikik neta Silas kirika Timothée, Macédoine askik e ki pe ototetcik, Pwar aspinikotc kakeskwepan, e witamawatc cota iriniwa: Cecoc, tapwe wir anihi ka ki itespan Kice Manito kitci pe iciticohwatc ota askik kitci akwacimiweritci.

⁶ Aric cota iriniwok nama ici naheritamopanak kirika marerimepanak. Aci Pwar ki powititaw e mirikosiwonik owikasim, e itatc: “Kecpin oniciniekwe, kirawaw tipirawe kitotamowiniwaw! Namaiew ni nin ka totaman. Aci ni ka natawapamawok aka ka cota iriniwitcik kitci witamawakik ohweriw tipatcimowiniw.”

⁷ Ekoni tca ka ici matcatc neta cota aiamihe mikiwamik. Nte ki icaw mikiwamik, opimera cota aiamihe mikiwamik e acterikipan. Iriniw ka omikiwamitc icinikasopan Titius Justus. Kicterimepan Kice Manitowa.

⁸ Tapan kotak iriniw, Crispus icinikasopan. Tiperitamopan neta cota aiamihe mikiwamik. Ki tapwerimew Teperitcikeritci, kaie kaskina ka witci tacikemikotc omikiwamik. Mitcet Corinthe iriniwok ka petawawaspan Pwara e kakeskweritci, kaie wirawaw ki tapwerimewok Cecoca kirika ki sikahatasowok.

⁹ Peikwaw e tipiskarik, Pwar ki miriko Teperitcikeritci kitci icinak, neta e itikotc: “Aka sekisi! Kiapatc mocak tipatcimo. Aka ponita e tipatcimowin.

¹⁰ Ki witci tacikemitin meka. Nama awik ki ka ki matci totakw. Mitcetiwok meka nitirinimak neta otenak.”

¹¹ Peikwo pipona acitc apita ki tacikew Pwar neta Corinthe otenak, e kiskinohamawatc kaskina iriniwa Kice Manitowa otitewiniw.

¹² Ani apitc peikw iriniw kice okimawipan Romain iriniwa otci neta Achaïe askik, Gallion ka icinikasospan. Cota iriniwok ki mamo witcihitowok e wi cakotcihatcik Pwara. Ki makonewok kirika ki iciwirewok neta e ici tipaskoniwaniwonik,

¹³ e itetcik: “Anahwe iriniw natowi totam kitci cakosimatc iriniwa pitoc kitci ici kicterimaritci Kice Manitowa, aka e itacterik irakonikewiniw kitci totcikaterik.”

¹⁴ Aci Pwar wi nta arimwepan. Aric anahwe kice okimaw Gallion ki itew cota iriniwa: “Kecpin tapwe ki pikotatc irakonikewiniw anahwe iriniw, kecpin ki micta matci totak, ki ta natotatinawaw, kirawaw ka cota iriniwiekw.

¹⁵ Aric tepirak e aiarimotamekw kirawaw tipirawe kitaiamihe irakonikewiniwaw, kekocic e aicinikatamekw kekotc awik e icinikatakaniwitc, kirawaw tipirawe ki ta oreritenawaw ke totcikatek. Nama nin ni ka tipaskoniwan anihe otci!”

¹⁶ Ki tca matceticahwew neta arimitakosiwikiwamik.

¹⁷ Aci kaskina ki makonewok peikw iriniwa, Sosthène icinikasoripana. Anahwe iriniw tiperitamopan cota aiamihe mikiwamik. Ekotca e ici macikowatcik neta nikanik arimitakosiwikiwamik. Aric Gallion nama ki otci pamerimew.

Pwar e kiwetc Antioche otenak

¹⁸ Kinowec kiapatc ki tacikew Pwar neta Corinthe otenak. Minawatc ki nakatew iriniwa neta ka tapwerimaritci Cecoca, kirika ki positcimew, Syrie askik e icitcimetc, anahweriw Priscille kaie Aquilas e witcewikotc. Aric epwamoci positcimetc ki itepan kitci kackipatcikaterik octikwan nete Cenchrées otenak, kekociciriw meka e ki nespi tapwetc kitci itotisketc Kice Manitowa otci, ekoni wetci ki totak.

¹⁹ Ki macakawok neta Éphèse otenak. Ekota neta Pwar ka nakatatc anahweriw Priscille kirika Aquilas. Nte ki icaw cota aiamihe mikiwamik kirika ki aimihew cota iriniwa.

²⁰ Nataweritamawepanak Pwara aniki cota iriniwok kirawe kinowec kitci tacikeritci, nama aric ki otci ici naheritam Pwar.

²¹ Ki nakatew, e itatc: “Nikotin ki ka pe kiwe natawapamitinawaw, kecpin Kice Manito ici nataweritake.” Minawatc ki matceho neta Éphèse otenak.

²² Ka takocatohotc nete Césarée otenak, nte ki icaw Jérusalem otenak e nta arimikowatc neta ka mawotcihitoritci kitci aiamiharitci ka tapwerimaritci Cecoca. Minawatc Antioche otenak ki icaw.

²³ Memacic ki tacikew neta. Minawatc ki matcaw. Ki capotoweckam Galatie askiriw, minawatc Phrygie askiriw, e witcihatc kitci mackawisiritci e asperimoritci kaie kitci sokiteheritci kaskina anihi ka tapwerimaritci Cecoca.

Ka ki iciwepasitc Apollos neta Éphèse kirika Corinthe otenak

²⁴ Ani apitc, peikw cota iriniw, Apollos e icinikasospan, ki takocinipan neta Éphèse otenak. Nte otcipan Alexandrie otenak. Anahwe iriniw mirotakosipan e aiarimwetc kirika wewerita miro kiskeritamopan Kice Manitowa Omasinahikaniw.

²⁵ Ki miro kiskinohamasopan Teperitcikeritci Omeskanamiriw. E irikokotehespan tipatcimopan kaie wewerita kiskinohamakepan, Cecoca e tipatcimatc. Aric tepirak aniheriw kiskeritamopan ka ki ici sikahatakeritci Capatisa.

²⁶ Aci sokeritamopan e aiarimwespan neta cota aiamihe mikiwamik. Ka ickwa petawatcik Priscille kirika Aquilas, ki wicamewok kitci pe icaritci omikiwamiwak kirika tca kirawe wewerita ki witamawewok Kice Manitowa omeskanamiriw e icinakonik.

²⁷ Minawatc anahwe Apollos wi icapan Achaïe askik. Ka tapwerimatcik Cecoca ki wikosimewok kitci icaritci. Kirika ki masinahamawewok neta ka tacikeritci ka tapwerimaritci Cecoca kitci miro miharitci anihi Apollos. Tekocik neta Apollos, ki micta witcihew kaskina anihi iriniwa aci e ki mirakaniwiritci Kice Manitowa omirotehewiniw kitci otci tapwerimaritci.

²⁸ Kaketin meka ki aimihew cota iriniwa, neta e ici mitcetinaniwonik, wewerita e naskamowatc e wapatahatc e ici onipariritci. Ki wapatahew neta e ici masinaterik Kice Manito Omasinahikanik, aniheriw ka itemakanik, Cecoc tapwe wir anihi ka ki itespan Kice Manito kitci pe iciticohwatc ota askik kitci akwacimiweritci.