Ka ki aitotiskeritci Cecoc otarotakana 17 - Kice Manito Ocki Omirwatcimowin

Pwar kirika Silas Thessalonique otenak e icatcik

¹ Minawatc Pwar kirika Silas nte ki iti capotoweckamok Amphipolis kaie Apollonie otenak. Nte tca Thessalonique otenak ki ici takociniwok. Takonipan neta peikw cota aiamihe mikiwamiriw.

² Ekoni mocak e totakipan Pwar kaskina tato otenak e icatc. Ki pitakew neta cota aiamihe mikiwamik, nac nictowaw e arwepi kicikarik irikik. Ki arimotam Kice Manito Omasinahikaniw kirika anihi iriniwa neta ka tacikeritci.

³ Ki wawitamawew kaie ki wapatahew kaskina nte e ici masinaterik otcitakotc e itacterik anihi Kice Manito ka ki itespan kitci pe iciticohwatc, kitci nekatcitaritci, kitci niporitci, kaie kitci apitciparitci. Kirika ki itew: “Anahwe Cecoc ka arimomak, enko anahwe weckatc ka pehokw kitci pe iciticohikotc Kice Manitowa ota askik kitci akwacimitokw.”

⁴ Atita neta e tacitcik cota iriniwok ki tapweritamok. Ki tca nosanehwewok Pwara kirika Silasa, peikon kaie wirawaw mitcet Grec iriniwok ka kicterimawaspan Kice Manitowa kirika kaie wirawaw mitcet iskwewok ka kicteritakositcik.

⁵ Aric kotakihik cota iriniwok ki otcinawekeritamok. Ki mawotcihewok atita iriniwa ka matcatikosiritci, meskanak ka ki miskawatcik. Ki tca micta matciparitawok aniki matci iriniwok neta e mitcetinaniwonik, kaie ki totamok neta otenak kitci micta matciparinik. Ki ispatawok nte peikw mikiwamik, Jason icinikasopan anahwe iriniw aniheriw omikiwam, e nantowapamatcik Pwara kirika Silasa, e wi iciwiratcik nte e ici mitcetinaniwonik.

⁶ Aric aka e miskawatcik, ki otcipitewok anihi Jasona kirika kotakihi atita iriniwa ka tapwerimaritci Cecoca e iciwiratcik nte e ici tacikeritci ka nikaniwiritci neta otenak, kaie e tepitepwetcik, e itetcik: “Ohki iriniwok ki matciparitawok kaskina wiec askik! Aci tca anotc ota ki pe takociniwok!

⁷ Jason tca ki pitakewirew omikiwamik! Kaskina aniki iriniwok nama nosanetawok Kice Okimawa César otirakonikewiniw. Itewok meka e taritci kotak Kice Okimaw, Cecoc e icinikasoritci.”

⁸ Ka petakik aniheriw aniki ka nikaniwitcik neta otenak kaie aniki kotakihik iriniwok e mitcetitcik, orina ki arimeritamohikok.

⁹ Ki itakaniwiwok anahwe Jason kirika aniki kotakihik iriniwok ka ki makonakaniwiwaspan kitci kicikasotcik coriariw, kitci miratcik anihi ka nikaniwiritci, minawatc tca kitci pakitinakaniwitcik.

Pwar kirika Silas Bérée otenak e icatcik

¹⁰ Kotc e iti tipiskarik, iriniwok ka tapwerimatcik Cecoca ki witcihewok Pwara kirika Silasa kitci matcaritci, nete kitci icaritci Bérée otenak. Ka takociniritci neta, ki pitakeriwa cota aiamihe mikiwamik.

¹¹ Aniki wirawaw Bérée iriniwok kirawe kicteritamwakopan Kice Manitowa otitewiniw patok aniki Thessalonique otenak ka taciketcik. Wewerita natotamopanak e micta mamitoneritakik. Tato kickwa wewerita tapwatamopanak Kice Manito Omasinahikaniw kitci ki nta kiskeritakik e apitc ma tapwe aniheriw Pwara ka aiteritci.

¹² Aci mitcet neta ka tacitcik ki iti tapweritamok. Kirika e tacitcik neta Grec iriniwok mitcetipanak neta iskwewok ka kicterimakaniwitcik kaie mitcet iriniwok kaie wirawaw ki iti tapweritamok.

¹³ Aric aniki cota iriniwok nete Thessalonique otenak ka taciketcik, ka petaketcik kaie nete Bérée otenak Pwara e tipatcimoritci Kice Manito otitewiniw, ki pe icawok. Ki pe nta matciparihewok anahweriw Bérée iriniwa e mitcetiritci.

¹⁴ Aric aniki ka tapwerimatcik Cecoca neta ka taciketcik ki itewok Pwara tecikotc kitci matcaritci, nte kitci icaritci kitcikamik itekera. Aric Silas kirika Timothée kiapatc ki tacikewok neta Bérée otenak.

¹⁵ Atita iriniwok ki witcewewok Pwara. Nte asko ki iciwirewok Athènes otenak. Minawatc tca ki pe kiwewok Bérée otenak, e witamawatcik anahweriw Silasa acitc Timothéewa, Pwar e ici nataweritak wipatc kitci pe natawapamikotc nete.

Pwar Athènes otenak

¹⁶ Mekwata Pwar e pehaspan Timothéewa kirika Silasa neta Athènes otenak, ki micta cikeritam e wapatak neta otenak e apitc mitcetiritci manitokana.

¹⁷ Ki icaw cota aiamihe mikiwamik e nta arimotakik aniheriw kirika aniki cota iriniwok kaie aka ka cota iriniwitcik ka kicterimatcik Kice Manitowa. Tato kickwa kaie ki icaw Pwar neta e ici mitcetinaniwonik, e aimihaspan iriniwa neta ka tacikeritci.

¹⁸ Atita kiskinohamake iriniwok aka ka cota iriniwitcik ki iti kikamiko Pwara. Atita neta e tacitcik Épicuriens kaie kotakihik icinikatakaniwiwok Stoïciens. Atita kokwetcikemopanak: “Tan wa itetc anahwe ka arawotcimotc?” Minawatc kotakihik itepanak: “Kotakihi ni icka kice manitowa ka tipatcimatc.” Ki meka petawewakopan Pwara e kakeskweritci e arimomaritci Cecoca kaie kitci apitciparitci ka ki poni pimatisiritci.

¹⁹ Aci ki matcewirewok anihi Pwara, nete e iciwiratcik Aréopage matinacik, neta ka ici mawotcihitoritci ka nikaniwiritci otenamiwak, kitci kokwetcimikoritci. Aniki ka nikaniwitcik ki itewok: “Ni wi kiskeritenan kekw ocki kiskinohamakewin ka aiarimotaman.

²⁰ Ni mamiskasitenan meka anihe ka aitein kirika tca ni wi kiskeritenan tan wa itemakak.”

²¹ —Tapwe wirata, kaskina Athènes iriniwok kirika mantewa ka witci tacikemikowaspan aspinikotc ko tepirak wi natotamwakopan kirika wi arimotamwakopan ocki ko ka iti tipatcimonaniwonik.—

²² Pwar taci nanipowiw tetawitc neta ko ka nikaniwiritci ka ici tacikeritci, Aréopage ka icinikaterik, kirika ki itew: “Athènes iriniwok, ni kiskeriten mocak e micta aiamihatisiekw.

²³ Tapwe wirata, ka pa aicaian kotenamiwak kirika ka pa kanawapataman nte ko e ici tatcik kimanitomiwawok, wawatc ni ki misken peikw nte e masinatek: ‘Anahwe otci manito aka ka kiskerimakaniwitc.’ Aric anahwe ka kicterimekw aka e kiskerimekw, nin ni ki pe ican kitci pe nta arimotamatakok!

²⁴ Enko anahwe Kice Manito ka ki kiceritak askiriw kirika kaskina e ici takonik neta, wir Ka Tiperitak wakwek kaie askik, kaie nama tacikew aiamihe mikiwamik wiec iriniwok e ki ocitatcik.

²⁵ Kecpin e atoskectakotc iriniwa, nama ni osam e noteparitc kekociciriw. Wir meka tipirawe mirew pimatisiwiniw kaskina iriniwa, kaie kitci rereritci, kirika kaskina wa ici miriwetc.

²⁶ Kaskina iriniwa ki kicerimew, kotc e aicinakosiritci, tepirak peikw iriniwa e ki otci pe kitciparitc, kaie ki mirew kitci tacikeritci kaskina wiec ota askik. Epwamoci tatcik iriniwok aci kotc ki ickwa itactapan apitc mia ke pimatisiritci kirika nte mia ke ici aitacikeritci.

²⁷ Wetci ki totak aniheriw, kitci ni nanto kiskerimikotc kirika matci kitci nantowapamikotc, pot matci nikotin kitci natcikapowictakotc, kitci tca miskakotc kaie kitci ki kiskerimikotc. Aric ma tapwe, Kice Manito nama warawik tacikew papeikw e taciikw e ici tacikeikw.

²⁸ Itwaniwon meka: ‘Wir ka ki kicerimitokw, ka ki miritokw kitci pimatisiikw, kaie kitci taikw.’ Peikon kaie atita kiwitc iriniwawok ka nakamotcik ki itewok: ‘Kaie kirano onitcanica.’

²⁹ Kirano tca onitcanica, nama ki ta iterimano Kice Manito mia manitokan e osawo coriawapiskowitc, kekotc ma e coriawapiskowitc kekotc ma e asiniwitc, iriniw e ki iteritak ke icinakohatc.

³⁰ Kice Manito nama aci pameritam weckatc iriniwa aka kekociciriw e ki otci kiskeritamirispana. Aric anotc itew kaskina iriniwa kaskina wiec ota askik tekaci kitci kweskatisiritci.

³¹ Tapwe wirata, aci ki ickwa itactaw peikwaw e kicikarik apitc ke tipaskonatc kaskina iriniwa e irikokoskamikarik, icikowisk iteritamowiniw kitci apatcitatc. Aci ki ickwa orapamew anihi peikw iriniwa ke tipaskoniweritci wir otci. Aci kaie ickwa wapatahew kaskina awiriwa tapwe kitci icinakonik, e ki apitcipahatc anihi iriniwa!”

³² Iriniwok ka petawatcik Pwara e arimotamiritci apitcipawiniw, atita papirotowepanak, kotakihik tca itepanak: “Kecko minawatc ki ka natotatinan anihe ka arimotaman.”

³³ Ekoni Pwar e iti nakatatc.

³⁴ Aric atita aci iti nosanehwepanak anihi Pwara, kirika tapwerimepanak Cecoca. Neta e taciwaspan, tapan neta peikw iriniw, Teni icinikasopan. Kaie wir apipan neta ka ici apitcik ka nikaniwitcik, Aréopage ka icinikaterik. Kirika peikw iskwew, Damaris e icinikasospan, kaie wir ki tapwetawew, kirika kotakihik kiapatc.