Ka ki aitotiskeritci Cecoc otarotakana 16 - Kice Manito Ocki Omirwatcimowin

Timothée e witcewatc Pwara kirika Silas a

¹ Pwar ki pe takociniw Derbe otenak, minawatc Lystre otenak. Tapan neta iriniw e tapwerimaspan Cecoca. Timothée icinikasopan. Okawiwa cota iskweripana aci e tapwerimaritci Cecoca, minawatc otawiwa grec iriniwiripana.

² Kotakihik ka tapwerimatcik Cecoca neta ka taciketcik Lystre kirika Iconium otenak mirwatcimepanak anihi Timothéewa.

³ Pwar natawerimepan kitci pa witcewikotc. Ki tca matcewirew. Ki itew kitci kicawatocwakaniwiritci kotc e itemakanik cota aiamihe irakonikewinik kitci totcikaterik, kitci kicterimaritci e ici pimatisitcik niheriw cota iriniwa neta ka tacikeritci. Kaskina meka kiskeritamwakopan aka e cota iriniwiritci otawiwa.

⁴ E iti pimotewaspan otenaskak, iti witamawepanak anahweriw ka tapwerimaritci Cecoca, aniheriw ka ki ici oreritakwaspan aniki Cecoc otarotakana kirika ka nikaniwitcik nete Jérusalem otenak, kaie nataweritamawepanak kitci sapitamiritci aniheriw ka ki ici oreritcikaterik.

⁵ Aci aniki ka mawotcihitotcik kitci aiamihatcik e tapwerimatcik Cecoca eckam kirawe iti sokitehepanak e asperimotcik kaie eckam kirawe iti mitcetipanak tato kickwa.

Pwar e icinak kekociciriw nete Troas otenak

⁶ Pwar kirika ka witcewikotc ki iti capotoweckamok kaskina Phrygie kaie nte Galatie askik itekera. Wi nta tipatcimowakopan Kice Manitowa otitewiniw nte Asie askik, aric Miro Manitowa ki otcinehokowok aka kitci icatcik.

⁷ Ka takocikik neta pecotcik askik Mysie ka icinikaterik, ki kokwetcitawok kitci icatcik nete Bithynie askik, aric Cecoc Omiro Manitoma nama ki otci pakitinikowok.

⁸ Ki tca capotoweckamok aniheriw Mysie askiriw, nete e icatcik otenak, Troas ka icinikaterik, rarewak kitcikamik ka ici takonik.

⁹ E mekwa tipiskarik, Pwar kekociciriw ki icinam. Ki wapamew peikw iriniwa, nte Macédoine askik e otciritci, e pe nanipowiritci e ici pakoserimikotc, e iteritci: “Pe ica ota Macédoine askik kitci pe nta witcihiak!”

¹⁰ Tecikotc e ickwa icinak ohweriw Pwar, ni ki nisawinan kitci matcaiak, nete Macédoine askik kitci icaiak. Ni ketcinaweritetan meka Kice Manito e ki icimitc kitci nta tipatcimoctawakitcik Mirwatcimowiniw ka taciketcik neta askik.

Iskwew, Lydie ka icinikasospan, ka otapinak kitci tapwerimatc Teperitcikeritci

¹¹ Ni ki positcimanan neta Troas, nete tca tecikotc e icaiak minictikok Samothrace. Minawatc kecepawanik ni ki acohenan, e icaiak Néapolis otenak.

¹² Ekota neta ka otci kapaiak, e icaiak nete otenak Pirip ka icinikatek. Nte ici takon anihe otenaw Macédoine askik itekera, Romain iriniwok e ki ocitatcik, wirawaw e mitatcik. Mitceto kickwa ni ki tacikanan neta otenak.

¹³ Minawatc e arwepi kicikak, ni ki orowinan neta otenak, nte e icaiak rarewak sipik, e iteritamakipan kitci miskamak nte wiec ko e ici nta aiamihatcik cota iriniwok. Ni ki apinan kitci aimihakitcik iskwewok ka ki mawotcihitotcik neta.

¹⁴ Peikw neta iskwew, Lydie icinikasopan, nte otcipan Thyatire otenak. Atawepan ko ka micta mirwekanik pakiwaniciriw e mikwekacinik, kirika tca micta sakihepan Kice Manitowa. Ni ki natotakonan anahwe Lydie. Teperitcikeritci tca ki witcihiko kitci miro nisitotak e aiteritci anihi Pwara, kitci tca tapweritak.

¹⁵ Ki sikahataso, kaie anihi kaskina ka tacikeritci omikiwamik. Minawatc ni ki wicamikonan, e itetc: “Kecpin tapwetowiekwe, tapwe e tapwerimak Teperitciketc, pe nta tacikekw nimikiwamik.” Otcitakotc ni ki wicamikonan. Ni ki tca icanan.

Pwar kirika Silas e kipohwakaniwitcik neta Pirip otenak

¹⁶ Peikwaw e kicikak nte nit icatan ka ici aiamihaniwok, peikw arotakan ickwecic ni ki mekwackowanan. Matci manitowa ki pitciteheckakopan. Witcihikopan kitci ki nikan witak ke iti aisparinik. Micta tca coriakowekopan ka tiperimikotc, e nikan witakipan ke isparinik.

¹⁷ Minawatc ni ki pa witcewokonan, Pwar acitc tca ninan, e tca tepitepwetc: “Aniki iriniwok atoskectawewok Kice Manitowa ka mawotci icperitakosiritci! Ki ka witamakowawok aniheriw meskanariw ke nosanetaiekw kitci ki akwacimikoiekw.”

¹⁸ Mitceto kickwa ni ki pa witcewokotan kiapatc e pa tepitepwetc. Kek Pwar cakaterimew. Ki kiwekapowiw e itatc anihi matci manitowa: “Cecoc Krist oticinikasowinik otci, kit ititin kitci orowiin neta!” Tecikotc ki orowiriwa anihi matci manitowa.

¹⁹ Aci aniki ka tiperimatcik anihi arotakan ickweca ka wapatakik aka aci awocamec kitci ki coriakakotcik, ki makonewok Pwara kirika Silasa, kaie ki otcipitewok, e iciwiratcik nte e ici tacikeritci anahweriw ka nikaniwiritci otenacik, neta ko e ici mitcetinaniwonik.

²⁰ Ki iciwitowewok anahweriw Romain okimawa, e itetcik: “Ohki iriniwok matciparitawok ota kotenaminak. Cota iriniwok ni,

²¹ kirika kiskinohamakewok kekociciriw kirano e Romain iriniwiikw aka ka itactek kitirakonikewininak kitci otapinamokw kaie aka kitci itotiskeikw.”

²² Ekoni kaie wirawaw e mitcetitcik neta kotakihik iriniwok e ici kitciparitcik e nekatcihatcik anahweriw Pwara kirika Silasa. Ka tiperitakik itewok kitci kectasipisonepitakaniwiritci kaie kitci pasakactehwakaniwiritci.

²³ E ickwa micta mitcetwaw otatamohwakaniwitcik, kipohotowikamikok ki iciwepinakaniwiwok, kirika ki itakaniwiriwa anihi ka kanaweritamiritci kipohotowikamiriw wewerita kitci nanakatcihakaniwitcik.

²⁴ Kotc ka ickwa itakaniwitc aniheriw, anahwe ka kanaweritak kipohotowikamiriw, tekaci kikitak e askotakarik kipohotowikamiriw ki ici arew kirika e ki acitapikatamowatc micta notimitokoriw ositirik.

²⁵ Wiec e iti apita tipiskarik, Pwar kaie Silas aiamihapanak kirika nakamopanak e mirwatcimatcik Kice Manitowa. Kotakihik ka kipohwakaniwitcik natotawepanak.

²⁶ Kek keskat ki micta kowikoniw. Ki aiatcipariniw askiriw neta ka ici acterik aniheriw kipohotokiwamiriw. Tecikotc kaskina ickwatema ceparino kirika apikopariniw opiwapiskwapimiwawa kaskina aniki ka kipohwakaniwitcik.

²⁷ Anahwe ka kanaweritak kipohotowikamiriw ki kockosiw. Ka wapatak tca ickwatemiriw kipohotokiwamik e cetinik, ki korokopitam omicta omokoman kitci nipahitisotc. Iteritamokopan meka e ki ocimoritci anahweriw ka kipohwakaniwiritci.

²⁸ Aric Pwar kaketin e asitewetc tepwew: “Akawir akohitiso! Kaskina ota ni tacikanan!”

²⁹ Aci anaha ka kanaweritak kipohotowikamiriw ki nataweritam wactenamakaniw kitci pitakaniwonik neta. Ki ispataw neta aricapicicik, neta ko ka ici kipaskohwakaniwiritci ka kipohwakaniwiritci. E tca ninikiparitc e micta sekisitc, ki otcipariho ositiwarik Pwara kirika Silasa.

³⁰ Minawatc ki orowitirew, kirika e kokwetcimatc: “Nokimamak, tan e actek kitci totaman kitci ki akwacimikoian?”

³¹ Ki itewok: “Tapwerim Teperitciketc Cecoc, ki ka tca akwacimikowin, kir kirika kaskina ka witci tacikemiskik kimikiwamik.”

³² Minawatc ki witamawewok Teperitcikeritci otitewiniw, wir kirika kaskina ka witci tacikemikotc omikiwamik.

³³ Anahwe ka kanaweritak kipohotowikamiriw ki matcewirew Pwara kirika Silasa, enko aniheriw peikon tepiskarik, kirika ki kisisipatawew ka ki ici namehwakaniwiritci. Minawatc tecikotc ki sikahataso, kaie anihi kaskina ka witci tacikemikotc omikiwamik.

³⁴ Ki pitakahew omikiwamik Pwara kirika Silasa, kaie ki acamew. Anaha iriniw kirika kaskina ka witci tacikemikotc omikiwamik ki micta mireritamok, aci e ki tapwerimatcik Kice Manitowa.

³⁵ Minawatc e kicepawonik, aniki ka tiperitakik Romain iriniwok iciticohwepanak otirinimiwawa kitci nta itaritci anihi ka kanaweritamiritci kipohotowikamiriw: “Pakitinik aniki iriniwok.”

³⁶ Aci anahwe ka kanaweritak kipohotowikamiriw pe nta witamawew anihi Pwara, e itatc: “Ka tiperitakik ki pe itewok kitci pakitinikoiekw. Matci tca ki ka ki matcanawaw. Nama wiec ki ka totakowinawaw.”

³⁷ Aric Pwar itew ka tiperitamiritci otirinimiwawa: “Ki itewok kitci pasakactehikoiak nte e mitcetinaniwonik, aka tca wawatc e ki otci tipaskonikoiak wewerita, ninan e Romain iriniwiak! Minawatc kipohotowikamikok ni ki iciwepinikonanak. Anotc tca aci nataweritamok kimotc kitci orowitiramitcik? Nama! Wirawaw tipirawe ni ta pe nta orowitarikonanak!”

³⁸ Aniki ka tiperitakik ki pe nta witamakowok anahweriw otirinimiwawa. Aci ki sekisiwok e petaketcik e Romain iriniwiritci anahweriw Pwara kirika Silasa.

³⁹ Ka tiperitakik ki pe natawapamewok, e pe nta witamawatcik e cikeritakik e ki kipohwatcik. Minawatc ki orowitarewok kipohotowikamik kirika e nataweritamawatcik kitci matcaritci neta otenak.

⁴⁰ E ickwa orowitcik kipohotowikamik Pwar kirika Silas, nte ki icawok Lydie omikiwamirik. Ka ickwa wapamatcik anahweriw kotakihi ka tapwerimaritci Cecoca, kirika e ki sosokimatcik, ki matcawok.