Ka ki aitotiskeritci Cecoc otarotakana 15 - Kice Manito Ocki Omirwatcimowin

Ka mawotcihitonaniwok Jérusalem otenak

¹ Atita iriniwok nte ki pe ototewok Judée askik itekera, e pe icatcik Antioche otenak. Ohweriw iti ici kiskinohamawewakopan anahweriw iriniwa ka tapwerimaritci Cecoca: “Nama ki ka ki akwacimikowinawaw kecpin aka kaie kirawaw kicawatacokoiekwe, aniheriw Moïse otirakonikewin ka itacterik kitci totcikaterik.”

² Pwar kirika Barnabas nama ici mireritamopanak. Ki tca micta kikatowok kirika aniki iriniwok aniheriw otci. Aci Pwar kaie Barnabas kirika atita Antioche iriniwok ki orapamakaniwiwok kitci icatcik nete Jérusalem otenak, kitci nta arimotamawatcik Cecoca otarotakaniw kaie kotakihi ka nikaniwiritci neta ka tapwerimatcik Cecoca.

³ Aci ki witcihikowok anihi ka tapwerimaritci Cecoca Antioche otenak kitci miro matcatcik. Ki capotoweckamok Phénicie kaie Samarie askiriw. Ki iti nanokickawok otenaskak e iti tipatcimotcik ohweriw: aci kaie wirawaw aka ka cota iriniwiritci e ki kweskatisiritci, aci e nosanehwaritci Cecoca. Kaskina aniki ka tapwerimatcik Cecoca ki micta mireritamok aniheriw otci.

⁴ Ka takocikik Pwar kaie Barnabas kirika anihi ka witcewikotcik neta Jérusalemik, ki miro mihikowok anahweriw ka tapwerimaritci Cecoca kaie otarotakana kirika ka nikaniwiritci neta ka tacikeritci, acitc ki witamawewok kaskina ka ki ici mirikotcik Kice Manitowa kitci ici kackitatcik e atoskectawatcik.

⁵ Aric atita Pharisien iriniwok, nta e tacitcik aci ka tapwerimatcik Cecoca, ki pasikowok e itetcik: “Acteriw kaie wirawaw kitci kicawatocwakaniwitcik aniki ka tapwerimatcik Cecoca aka ka cota iriniwitcik, kaie kitci itakaniwitcik kitci sapitakik Moïse otirakonikewiniw.”

⁶ Cecoc otarotakana kirika ka nikaniwitcik ki mawotcihitowok wewerita kitci mamitoneritakik acitc kitci arimotakik aniheriw ka ki itwaniwonik.

⁷ Kinowec ka ickwa aimihitotcik, aci Pien pasiko, e itetc: “Niwitcicanak, ki kiskeritenawaw aci weckatc Kice Manito e ki orapamitc ota e taciikw, kitci witamawimaki Mirwatcimowiniw anihi aka ka cota iriniwiritci, kitci ki otci petakik acitc kitci tapweritakik.

⁸ Kice Manito tca, e miro kiskerimatc kaskina iriniwa tan mia e iteritamiritci, ki wapatahiwew aci e otapinatc anahweriw aka ka cota iriniwiritci kitci otirinimitc, e ki miratc Miro Manitowa mia kirano.

⁹ Nama pitoc ki otci iterimew aka e cota iriniwiritci kaie kirano e cota iriniwiikw. Ki meka mirwinakotaw otehiwariw, osam e ki tapwerimikotc.

¹⁰ Anotc tca, kekwan wetci wi kokwetcihekw Kice Manito, e wi mirekok aniki ka tapwerimatcik Cecoca kekociciriw ka micta kosikonik kitci miwotatcik, kitci nosanetatcik cota aiamihe irakonikewiniw, aka tca wawatc kaie kirano e ki otci kackitaikw kitci nosanetaikw? Wawatc kaie wirawaw kitaniskotape kimocominapanak nama ki otci kackitawok!

¹¹ Ni tapweritenan pitoc e otci akwacimikoikw, tepirak Teperitciketc Cecoc omirotehewin wetci akwacimikoikw, peikon tca kaie wirawaw aka ka cota iriniwitcik ka otci akwacimakaniwitcik.”

¹² Aci kaskina ka ki mawotcihitotcik neta nama kitowok, kirika natotawewok anahweriw Barnabas kirika Pwara e tipatcimoritci kaskina ka ki ici mata kackitaritci, e ki mirikoritci Kice Manitowa kitci ici kackitaritci, nete ka ici tacikeritci anahweriw aka ka cota iriniwiritci.

¹³ Ka ickwa arimwetcik, aci Cak itew: “Niwitcicanak, natotacikw!

¹⁴ Simo ki tipatatam ohweriw: tan ka ki totak Kice Manito, ickotok ka kitciparitc e mihatc anihi iriniwa aka ka cota iriniwiritci kitci ki orapamatc neta e taciritci ke otirinimitc.

¹⁵ Enkweriw tca ni mia ka ki itewaspan weckatc ka ki pe nikan tipatcimotcik. Masinatew meka Kice Manito Omasinahikanik:

¹⁶ ‘Teperitciketc itew, “Kecko nanake minawatc ni ka koski takocinin, kitci koski orekahikiwamaneian Tapit orakasimonikiwam ka ki pakitinik. Ni ka koski orekahikewan kaskina ka ki oraparinik, kaie minawatc kiapatc ni ka tcimatawan.

¹⁷ Aci tca kaskina kotakihik iriniwok kata nantowapamewok Teperitcikeritci, kaskina kotc e aicinakositcik ota askik ka ki orapamakik kitci nosanehwitcik!” Ekoni ka itetc Teperitciketc,

¹⁸ aci weckatc ka kiskeritamihiwetc aniheriw!’ ” Amos 9.11-12

¹⁹ Kiapatc itew Cak: “Ekoni wetci actek, nin e iteritaman, aka kitci arimihikok aniki aka ka cota iriniwitcik aci ka itactimikapowictawatcik Kice Manitowa kitci nosanehwatcik.

²⁰ Aric ki ta masihamowanowok kitci witamawikok aka kitci mitcikik aniheriw wiasiriw awesisa ka ki ickwaswakaniwiritci e pakitinikaniwonik manitokana otci. Kaie ki ta itananowok aka kitci pacikwatisitcik, kaie aka kitci mitcikik wiasiriw awesisa ka ki nakwatakaniwiritci, kaie aka kitci mitcikik awesisa omikoriw.

²¹ Aci meka micta weckatc otci kakeskwewok iriniwok otenaskak, e arimotakik aiamihe irakonikewiniw, Moïse ka ki mirakaniwispan. Tapwatcikatew kaie kaskina cota aiamihe mikiwamiskak tatwaw e arwepi kicikak.”

E masinahamowakaniwitcik iriniwok ka tapwerimatcik Cecoca aka ka cota iriniwitcik

²² Aci aniki Cecoc otarotakana kirika ka nikaniwitcik kaie kaskina kotakihik ka tapwerimatcik Cecoca ki oreritamok kitci orapamatcik atita neta e tacitcik ke iciticohwatcik nete Antioche otenak, kitci witcewaritci anahweriw Pwara kirika Barnabasa. Nicw iriniwa ki orapamewok: Jude —peikon kaie Barsabbas ka icinikatakaniwitc—, acitc Silas. E nicitcik aniki iriniwok kicterimikopanak kotakihi ka tapwerimaritci Cecoca.

²³ Ki tca mirakaniwiwok kitci miwotatcik masinahikaniw, ohweriw e itasinaterik: “Ninan Cecoc otarotakana kirika ka nikaniwiak, kiwitcicaniwawok e iteritakosiak, tapickotc e nosanehwokw Cecoc, kit arimikatinan, kirawaw niwitcicananak aka ka cota iriniwiekw, nete ka tacikeiekw Antioche otenak, kirika Syrie kaie Cilicie askik itekera.

²⁴ Ni ki petakanan iriniwok e ki icatcik kititacikewiniwak e ki natawapamitakok, nitacikewininak e ototetcik, e ki nta matcipititakok kirika e ki arimeritamihitakok ka ki ici aimihitakok. Namaiew aric ninan ka ki itakitcik aniheriw kitci totakik.

²⁵ Ekoni wetci ki oreritamak kaskina kitci ici naheritamak kitci orapamakitcik iriniwok kitci natawapamitakok. Kata witcewewok nimiro nikwimesinana, Pwara acitc Barnabasa,

²⁶ kekatc ka ki nipahakaniwiritci e atoskectawaritci anihi Ka Tiperimitokw Cecoc Krist.

²⁷ Kit iciticahamatinan tca ohki Jude kirika Silas wirawaw tipirawe kitci witamatakok aniheriw ota ka ki ici masinahamak.

²⁸ Miro Manito meka kirika ninan tipirawe ka ki ici oreritamak aka kitci miritak kekocic e kosikok kitci miwotaiekw, tepirak anihi otcitakotc ka itacteki kitci totcikatek:

²⁹ Aka kitci mitciekw wias, anihe wias awesisak ka ickwaswakaniwitcik e aiamihe pakitinikaniwonik manitokanak otci; aka kitci mitciekw miko; aka kitci mitciekw wias awesis ka ki nakwatakaniwitc; kirika aka kitci pacikwatisiekw. Ki ka miro totenawaw kecpin kaskina ohwe ekwamictomiekwe. Ekosani, matcacikw! Ninan.”

³⁰ Aniki ka ki orapamakaniwitcik ki iciticohwakaniwiwok nete kitci icatcik Antioche otenak. Tekocikik, ki mawotcihewok e taciritci neta ka tapwerimaritci Cecoca. Minawatc ki mirewok aniheriw masinahikaniw.

³¹ Ki tapwatamok kirika kaskina ki mireritamok e ki ici sosokimikotcik.

³² Jude kirika Silas, wirawaw tipirawe e nikan tipatcimo iriniwitcik, kinowec aimihepanak iriniwa neta ka tapwerimaritci Cecoca kitci sosokimatcik kaie kitci witcihatcik kitci sokiteheritci acitc kitci sokikapowiritci.

³³ Memacic ki tacikewok neta, minawatc ki matcacikakowok anahweriw owitciriniwa neta ka tapwerimaritci Cecoca, kitci miro pimotetcik aci e kiwe natawapamatcik anahweriw ka ki pe iciticohikotcik. [

³⁴ Aric Silas ki oreritam aka kitci matcatc, kitci tca taciketc neta.]

³⁵ Pwar acitc Barnabas kiapatc ki tacikewok neta Antioche otenak. Ki kiskinohamakewok kirika ki kakeskwewok Teperitcikeritci otitewiniw, mitcet kotakihi iriniwa e witcihikotcik.

Pwar acitc Barnabas e tatipan cakatcik

³⁶ E ickwa mitcet kickokarik, Pwar itew Barnabasa: “Kiwe natawapamatanak kiwitcicanowok otenaskak ka aitaciketcik, kitci pa kiwotamokok, nte kaskina otenak ka ki pe ici tipatcimoikw Teperitciketc otitewin, kitci nta kiskerimawikok tan e ici pimatisitcik.”

³⁷ Barnabas wi matcewirepan anihi Jean kitci witcewikotcik, —Mark kaie arica ka icinikatakaniwiritci—.

³⁸ Aric Pwar nama ki otci ici naheritam kitci matcewirakaniwiritci, osam e ki nakatikowaspan nete Pamphylie askik, aka kaie awocamec e ki otci pa witcewikotcik nac kitci kicitatcik ka wi itotiskewaspan.

³⁹ Ki micta kikamitowok Pwar kaie Barnabas, e tca tatipan cakatcik. Barnabas ki matcewirew anihi Mark. Ki positcimewok micta napikwan tcimaniw, Chypre minictikok e icatcik.

⁴⁰ Minawatc Pwar anihi ki orapamew Silas kitci witcewikotc. Ki matcawok, e ickwa aiamihectamakotcik anahweriw owitciriniwa neta ka tapwerimaritci Cecoca, e acotamawakaniwitcik Teperitcikeritci omirotehewinik kitci nakatawerimikotcik aniheriw otci.

⁴¹ Ki capotoweckamok Syrie kirika Cilicie askiriw, kaskina wiec e witcihatcik iriniwa ka mawotcihitoritci kitci aiamiharitci e tapwerimaritci Cecoca kitci sokiteheritci otcitcakociwarik itekera kaie kitci sokikapowiritci.