Ka ki aitotiskeritci Cecoc otarotakana 14 - Kice Manito Ocki Omirwatcimowin

Pwar kirika Barnabas Iconium otenak

¹ Pwar kirika Barnabas ka takocikik nete Iconium otenak, minawatc ki pitakewok neta cota aiamihe mikiwamik, kirika ki micta mirotakosiwok e aiarimwetcik. Mitcet tca cota iriniwa kirika aka ka cota iriniwiritci ki cakosimewok kitci tapwerimaritci Cecoca.

² Aric aniki cota iriniwok aka ka wi tapwetakik ki matciparihewok anahweriw aka ka cota iriniwiritci kirika ki cikimewok kitci matcerimaritci Cecoca otirinimiriw.

³ Pwar kirika Barnabas kinowec ki tacikewok neta Iconium otenak. Sokerimopanak e arimwetcik, e micta asperimototawewaspan Teperitcikeritci. Kakeskwepanak mocak e arimotakik Kice Manitowa omirotehewiniw. Ki tca mirikowok Kice Manitowa mackawisiwiniw kitci mata kackitatcik kaie kitci matawi aitotisketcik, kitci otci wapatahiwetcik tapwe aniheriw ka ici tipatcimotcik.

⁴ Iriniwok neta ka taciketcik otenak, ki nicwo tipanitisowok. Atita cota iriniwa ki nosanehwewok, minawatc kotakihik ki nosanehwewok Cecoca otarotakaniw.

⁵ Atita cota iriniwok kirika atita aka ka cota iriniwitcik, kaie ka tiperimikotcik, ki irakonikewok kitci nekatcihatcik anahweriw Pwara kirika Barnabasa, kirika kitci nipahatcik e pe mosinihatcik.

⁶ Aric aniki e nicitcik iriniwok, ka kiskeritakik, ki ocimowok, nete e wi icatcik otenak Lystre kirika Derbe ka icinikaterik, nete ka ici takonik, Lycaonie askik itekera, kaie neta waska ka takonik.

⁷ Ki tca iti tipatitamowok nete Mirwatcimowiniw.

Pwar kirika Barnabas Lystre otenak

⁸ Nete Lystre otenak, tapan neta peikw iriniw mocak e apispan. Niponesipan meka nte ositik. Ka nitawikitc ekoni ka icinakosikopanen. Nama wiskat otci kackitakopan kitci pimotetc.

⁹ Natotawepan e aiteritci anihi Pwara. Kek Pwar ki kanawapamew. Ki wapamew e asperimoritci kitci ki kikehakaniwiritci.

¹⁰ Aci itew e micta kiciwetc: “Pasiko! Wewerita nanipowi.” Aci anahwe iriniw pasikopataw kirika e iti pimotetc.

¹¹ Mitcetipanak iriniwok neta. Ka wapatakik aniheriw Pwara ka ki totamiritci, tepitepwewok e ici arimwetcik aniheriw ka ici arimwetcik, Lycaonie arimwewin, e itetcik: “Kice manitowok ni, ki icinakohitisowok mia irinik, icpimik wakwek ki pe ototewok e pe natawapamitokok!”

¹² Anihi Barnabas ki icinikatewok “Zeus.” Minawatc anihi Pwar, “Hermès” ki icinikatewok, mocak meka arimwepan Pwar, mia Hermès.

¹³ Tapan neta otenak makatewokorew ani e ici aiamihatc, e atoskectawaspan anihi Zeus. Kaie takonipan aiamihe mikiwamiriw anahwe otci Zeus, nte e pe pitakaniwonik otenak. Aci anahwe makatewokorew ki pecowew mitcet motcewotikwa e ki wecitcikanikatowatc acitc wapikoniriw e ki akopitamowatc okowiarik. Ki pecowew nte micta ickwatemik ka otci pitakaniwonik otenak. Nataweritamopanak kirika aniki iriniwok e mitcetitcik kitci ickwaswatcik motcewotikwa kitci aiamihe pakitiniketcik anihi otci Pwar kirika Barnabas.

¹⁴ Aric ka kiskeritakik aniheriw, Pwar kirika Barnabas ki pikopitamok owikasimiwaw, e wapatahiwetcik e apitc arimeritakik. Ki ispatawok nte e mitcetinaniwonik, e itetcik e ici tepwetcik:

¹⁵ “Nikwimesinanak, kekwan wetci totamekw anihe? Tepirak nit iriniwinan kaie ninan, mitowi kirawaw. Ki petatinan Mirwatcimowin, kaie e ititak kitci ponitaiekw e kicteritamekw arotc kekocic aka wiec ka irapatak, kirika kit ititinan kitci itactimikapowictawekw Kice Manito tapwe ka pimatisitc, anahwe ka ki kiceritak wakwek, askiriw, kitcikamiriw kirika kaskina e ici takonik neta, kaskina kaie e ici taritci.

¹⁶ Weckatc ki pakitinew kaskina iriniwa, kaskina wiec askik, kitci nosanetaritci wirawaw tipirawe omeskanamiwariw.

¹⁷ Aric peikon mocak ki totam kitci kiskerimakaniwitc ka ki ici miro totak: wakwek e ki otciparinik ki ki otci pe mirikowaw kitci kimiwonik, kaie kitci mirokinik kitikaniw, kitci mawotcitaiekw e ickwa nipinik e ickwa kicinitawikinik, kotc e asitakonik. Ki mirikowaw mitcimiriw kaie kitci micta mireritamekw kitehiwak.”

¹⁸ Misawatc ani e aitewaspan Pwar kirika Barnabas, micta arimisipanak kitci ki cakosimatcik anahweriw e mitcetiritci iriniwa aka kitci ickwaswaritci awesisa kitci aiamihe pakitinikeritci wirawaw otci.

¹⁹ Minawatc cota iriniwok ki pe ototewok Antioche otenak Pisidie askik itekera, kaie kotakihik Iconium otenak e pe ototetcik. Tekocikik neta Lystre otenak, ki cakosimewok iriniwa kitci nosanehikotcik. Ki pe mosinihewok anihi Pwara e wi nipahatcik, minawatc ki orowitapatewok neta otenak. Ki nakatewok neta, e iterimatcik “nipo.”

²⁰ Aric kotc aniki iriniwok ka tapwerimatcik Cecoca ka waskakapowictawatcik Pwara, ki pasikoriw. Ki koski pitakeriw neta otenak. Minawatc kecepawonik, ki matcawok Pwar kirika Barnabas, Derbe otenak e icatcik.

E kiwetcik Antioche otenak, Syrie askik itekera

²¹ Pwar kirika Barnabas ki tipatatamok Mirwatcimowiniw neta Derbe otenak. Mitcet iriniwa ki witcihewok neta kitci tapwerimaritci Cecoca. Minawatc ki kiwewok nete Lystre otenak, Iconium otenak kaie nete Antioche otenak, Pisidie askik itekera.

²² Ki witcihewok kotakihi ka tapwerimaritci Cecoca kitci sokiteheritci, kaie ki wikosimewok mocak kitci sokikapowitcik e asperimototawaritci Kice Manitowa, kirika e itatcik: “Mictahi arimisiwinik ki ka ici pimotanano kitci ki pitakeikw Kice Manito Okimawinik.”

²³ Papeikw ka ici mawotcihitoritci ka tapwerimaritci Cecoca, ki orapamewok ke nikaniwiritci. Minawatc ko e ickwa aiamihatcik kirika e ki roskosotcik, ki aiamihectamowewok, mocak kitci nanakatcihikoritci Teperitcikeritci, anihi ka ki asperimototawaritci.

²⁴ Minawatc ki capotoweckamok aniheriw Pisidie askiriw. Nte ki ici takociniwok Pamphylie askik itekera.

²⁵ Ki tipatcimoctawewok Kice Manitowa otitewiniw iriniwa neta ka tacikeritci Perge otenak, minawatc nete ki icawok Attalie otenak.

²⁶ Ekota neta ka otci matcehotcik, nete e icitcimetcik Antioche otenak, Syrie askik e ici takonik. Ekota ka ki otci matcawaspan weckatc, neta ka ki ici acotamawakaniwitcik Kice Manitowa omirotehewinik kitci nakatawerimikotcik aniheriw otci, kitci tca itotisketcik aci ka ki kictatcik.

²⁷ Ka ickwa takocikik neta Antioche otenak, ki mawotcihewok iriniwa ka tapwerimaritci Cecoca. Ki witamawewok kaskina ka ki aitotamiritci Kice Manitowa wirawaw otci, kaie tan ka ki aitotiskeritci kitci meskanakowaritci anihi aka ka cota iriniwiritci, ekoni kaie wirawaw kitci ki asperimototakotc.

²⁸ Kinowec ki witci tacikemewok neta anahweriw ka tapwerimaritci Cecoca.