Ka ki aitotiskeritci Cecoc otarotakana 13 - Kice Manito Ocki Omirwatcimowin

Barnabas kirika Saul e orapamakaniwitcik kitci pa nta tipatcimotcik

¹ Aniki ka tapwerimatcik Cecoca neta Antioche otenak ka tacikewaspan tapanak neta atita ka tipatcimotcik Kice Manitowa otci kirika atita ka kiskinohamaketcik: Barnabas, Simion —arica icinikatakaniwipan anahwe Makate Iriniw—, Lucius —Cyrène otenak otcipan—, kaie kotak iriniw, Manaën ka icinikasotc, —enko anahwe tapickotc ka ki nitawikihakaniwitcik acitc anihi okimawa Hérode, Galilée askik e tiperitamirispana—, kirika Saul.

² Peikwaw e kicikarik, mekwata e roskosowaspan kirika e karotamowaspan Teperitcikeritci, Miro Manitowa ki itikowok: “Tipan arakok aniki Barnabas kirika Saul, kitci ki tca totakik otamirowiniw ke mirakik, wetci ki wicamakik kitci nosanehwitcik.”

³ Ka ickwa roskosotcik kirika ka ickwa aiamihatcik, kaskina ki takinewok anihi Barnabasa kirika Saula e aiamihectamowatcik. Minawatc ki pakitinewok kitci matcaritci.

Barnabas kirika Saul e icatcik Chypre minictikok

⁴ Minawatc Barnabas kirika Saul, Miro Manitowa e ki iciticohikotcik, nete ki icawok Séleucie ka icinikaterik otenariw. Ekota neta ka otci matcehotcik, nete tca e icitcimetcik minictikok Chypre ka icinikaterik.

⁵ Ka ickwa takocikik nete otenak, Salamine ka icinikaterik, ki pa icawok cota aiamihe mikiwamiskak, Kice Manito otitewiniw e tipatatakik. Peikw iriniwa kaie witcewikopanak e witcihikotcik. Jean-Mark icinikasoripan.

⁶ Ki capotoweckamok aniheriw minictikoriw, nac Paphos otenak e ici takocikik. Ekota neta ka ki mekwackowatcik peikw iriniwa ka matci mata kackitaritci, Bar-Jésus ka icinikasoritci. Cota iriniwipan kaie ititisokopan e nikan tipatcimotc.

⁷ Atoskectawekopan anihi ka kice okimawiritci neta minictikok, Sergius Paulus ka icinikasoritci, ka kakitaweritamiritci. Anahwe okimaw ki wicamew Barnabasa kirika Saula kitci pe natawapamikotc, e nataweritamokopanen kaie wir kitci petak Kice Manitowa otitewiniw.

⁸ Aric anahwe ka mata kackitatc —matci ni kaie ko Élymas icinikatakaniwipan grec e ici arimwaniwok— wikokwe nakackowekopan Barnabasa kirika Saula, kaie natowi totamokopan anihi kice okimawa aka kitci tapwerimaritci Cecoca.

⁹ Aci Saul, —peikon Pwar e icinikasospan— e sokiteheckakotc Miro Manitowa, ki kanawapamew anihi Élymas,

¹⁰ kirika e itatc: “Kir ka micta wi wecikein, kaie ka wi matciparitain! Kir ka wi cakotcitain kaskina e ici mirwacik, kaie mia Matci Manito ka totak e totaman! Nama ani wiskat ki ka ponitan e wi matci totaman ka ici nataweritak Teperitciketc?

¹¹ Aci anotc, ki ka kiskeriten! Ki ka cakotcihikowan omackawisiwin Teperitciketc, aka kitci wapiin. Nama ki ka wapaten e waseak e kicikak, nac asko irikik wir Teperitciketc ke iteritamokwen.” Mia tecikotc e kockowonik e iti itapatamatc Élymas, nac memacic tekaci aka e wapitc, mia tekaci e kiski tipiskarik. Pa kakiwekapwiw, e nantonowatc awiriwa ke witcihikotc kitci takoniskenikotc.

¹² Anahwe kice okimaw ka wapatak aniheriw ka ki isparinik, ki tapwerimew Teperitcikeritci. Ki micta meka mamiskateritam aniheriw okiskinohamakewiniw.

Pwar kirika Barnabas e icatcik Antioche otenak, Pisidie askik itekera

¹³ Pwar kirika owitcewakana ki positcimewok neta Paphos otenak, neta Perge otenak e icitcimetcik, rarewak kitcikamik e ici takonipanen aniheriw otenariw nte Pamphylie askik itekera. Ka ickwa takocikik nete, ekota neta ka otci nakatikotcik anihi Jean-Mark, aci e kiweritci nete Jérusalem otenak.

¹⁴ Kiapatc minawatc ki matcawok, nete e ki otci matcatcik Perge otenak. Nete ici takociniwok Antioche ka icinikaterik otenariw, Pisidie askik itekera. Apitc e arwepi kicikarik, cota aiamihe mikiwamik ki pitakewok kirika ki apiwok.

¹⁵ Ka ickwa tapwatcikaterik aiamihe irakonikewin masinahikaniw kirika ka ki pe nikan tipatcimotcik omasinahikaniwariw, ka tiperitakik cota aiamihe mikiwamiriw ki iciticohwewok iriniwa kitci nta itaritci Pwara acitc Barnabasa: “Niwitcicananak, kecpin kekociciriw wa itewekwen ohki iriniwok ota ka ki mawotcihitotcik kitci ki sokimekok, matci aci ki ka ki arimwanawaw.”

¹⁶ Pwar ki pasiko. Ki icpiniskeriw kirika e itetc: “Israël iriniwok, kaie kirawaw kotakihik ka kicterimekw Kice Manito, natotacikw!

¹⁷ Kice Manito, Israël iriniwok Okice Manitomiwawa, ki orapamew kitaniskotape kimocominowa kitci otirinimitc. Ki witcihew kitci rikihoritci mekwata nete warawik ka tacikerispana Égypte askik. Minawatc ki witcihew kitci orowiritci neta askik, omackawisiwin e apatcitatc.

¹⁸ Nemitana tato pipona irikik ki ciciperitam, nete ka ici cipewatawokarik ka ici tacikerispana, misawatc aka mocak e ki otci natotakospan.

¹⁹ Minawatc ki cakotcihew iriniwa nicowasowik tacikewinik e tacikerispana Canaan askik itekera. Minawatc ki mirew aniheriw askiriw wir tipirawe otirinima kitci tiperitamiritci.

²⁰ Kaskina anihe ka ki pe iciwepak, wiec newaw mitato mitana acitc niarano mitana tato pipona irikik ki tacikikatew.” “Minawatc Kice Manito ki orapamew atita kitaniskotape kimocominowa, tipaskonike iriniwok kitci irapatisiritci kaie kitci nikaniwiritci, nac ka pe nikaniwitc peikw ka nikan tipatcimospan, Samuer ka icinikasospan.

²¹ Minawatc aniki Israël iriniwok ki nataweritamok kitci okimamitcik kitci tiperimikotcik. Aci Kice Manito ki orapamew peikw iriniwa, Saül ka icinikasoritci, kitci okimawiritci, Quich anihi okosa, Benjamin tca otaniskotape osima. Anahwe Saül nemitana tato pipona irikik ki okimawiw neta.

²² Minawatc Kice Manito ki wepakonew anihi Saüla. Minawatc Tapita ki mirew kitci okimawiritci. Arimomepan anihi Tapit, e itetc: ‘Aci ni ki miskawaw Tapit, Jessé anihi okosa, ka micta mirerimak. Kata itotiskew kaskina ke ici nataweritamawak kitci itotisketc.’ 1 Samuel 13.14; 16.12; Psaumes 89.21(20)

²³ Enko anihi peikw otaniskotape osima anahwe Tapit, Cecoca, anihi Kice Manito ka ki itaratc kitci akwacimaritci Israël iriniwa, kotc ka ki ici nespi tapwespan.

²⁴ Epwamoci Cecoc pe takocik, Capatis ki kakeskwepan e cikimaspan kaskina Israël iriniwa kitci kweskatisiritci kaie kitci sikahatasoritci.

²⁵ Apitc Capatis aci kekatc kitci ki iti kictatc otamirowin, kakeskwepan, e itetc: ‘Awin ni nin e iterimiekw? Namaiew ni nin anahwe ka pehekw. Aric natotamokw! Kata takociniw, ickwa kicitaiane notamirowin, kaie nama ni tipi miro iriniwin wawatc tepirak kitci ki apikonamowak omaskisin.’ ”

²⁶ Itew kiapatc Pwar: “Niwitcicanak, ki witamatinawaw kirawaw Abraham otaniskotape osima, kirika kirawaw aka ka cota iriniwiekw ka kicterimekw Kice Manito kaie kirawaw: kirano ni kaskina ka ki pe iciticahamakoikw ohwe tipatcimowin, e witamakoikw kitci akwacimikoikw.

²⁷ Tapwe wirata, aniki Jérusalem otenak ka taciketcik kirika okimamiwawa nama ki otci nisitotamok awiriwa anihi Cecoca, kaie nama ki otci nisitotamok aniheriw ka ki masinahamiritci ka ki pe nikan tipatcimoritci, tatwaw e arwepiw kickarik ka tapwatcikaterik. Apitc tca ka anwerimatcik Cecoca, tapwe ki otci otcitcipariniw ka ki masinahikaterik wir otci.

²⁸ Kaie misawatc aka e ki otci miskamowatcik kekociciriw kitci ki otci anwerimakaniwiritci Cecoca kitci nipahakaniwiritci, ki nataweritamawewok Pilata kitci totamiritci kitci nipahakaniwiritci anihi Cecoca.

²⁹ Ka ickwa isparinik kaskina ka itasinaterik neta Kice Manito Omasinahikanik Cecoc otci, aniki Cecoc owitcewakana ki nitirewok otcipaiatikomirik. Ki tca nahikowewok matikowocik.

³⁰ Aric Kice Manito ki apitcipahew.

³¹ Mitceto kickwa irikik Cecoc ki wapamiko anahweriw iriniwa ka ki pe witcewikospan ka pe matcatc Galilée askik nac Jérusalem otenak e ki pe icatc. Enko anahweriw ni anotc ka atoskectakotc kitci arimomikotc e aimiharitci Israël iriniwa.

³² Ninan tipirawe ki pe witamatinan ohwe Mirwatcimowin: aniheriw Kice Manitowa ka ki itikowaspan kitci itotiskeritci wirawaw otci aniki kitaniskotape kimocominowok,

³³ aci anotc ickwa itotiskew kirano otci, otaniskotape osimiwawa. Ki itotiskew ka apitcipahatc Cecoca. Itasinatew meka neta Mirwatatamo Nakamowin Masinahikanik, nicw ka masinatek: ‘Kir ni Nikosis. Aci anotc nin Kotawi.’ Psaumes 2.7

³⁴ Ki tipatcimopan kitci apitcipahatc aka minawatc kitci ki niporitci, aka kitci pakickaritinik owiawiriw. Enko ohweriw ka ki itespan: ‘Otcitakotc ki ka cawerimitinawaw anihi caweritcikewina ka kitcitwaweritakoki, ka ki itak Tapit kitci pakitinaman.’ Ésaïe 55.3

³⁵ Ekoni wetci kaie kiapatc ohweriw ki itasinatek: ‘Nama ki ka pakitinaw anahwe mocak ka ki nosanehwisk owiaw kitci pakickaritinik matikowocik.’ Psaumes 16.10

³⁶ Kaie wir meka Tapit ki atoskectawew Kice Manitowa mekwata e pe pimatisispan, minawatc ki poni pimatisiw. Ki nahikowakaniwiw neta ka ki ici rikwaskatakaniwiritci otaniskotape omocoma. Ki tca pakickaritiniw owiaw.

³⁷ Aric anihi Kice Manito ka ki apitcipahatc, Cecoca, owiawiriw nama ki otci pakickaritiniw.

³⁸ Aci tca, niwitcicanak, ki ta kiskeritenawaw ohwe: ki tipatcimoctakowinawaw e kasihikateki kaskina pactatowina osam wir Cecoc ka ki totak!

³⁹ Wir meka Cecoc ka ki itotisketc icikowisk kitci iteritakosiritci kaskina awiriw ka tapwerimikotc, aka tca kitci anwerimikoritci kaskina pactatowiniw, kaskina aniheriw ke ki otci anwerimikoritci Moïsa otirakonikewiniw.

⁴⁰ Aiekwamisikw tca aka kitci iciwepasiekw aniheriw ka ki ici masinahakik aniki ka ki pe nikan tipatcimotcik, e itemakanik:

⁴¹ ‘Kanawapatamokw, kirawaw iriniwok ka matcatikosiekw! Ki ka micta mamiskateritenawaw, minawatc ki ka onicininawaw. Ni ka meka toten kekocic mekwata ke pimatisiekw, ke apitc mamiskateritakok, nama ki ka tapwetenawaw kecpin awik atisokatakwe.’” Habacuc 1.5

⁴² Ka iti orowitcik neta Pwar kirika Barnabas cota aiamihe mikiwamik, ki kokwetcimakaniwiwok kiapatc kitci pe icatcik, minawatc arwepi kicikarike, kiapatc kitci pe nta arimotakik aniheriw.

⁴³ Ka ickwa mawotcihitonaniwonik, mitcet cota iriniwok kaie iriniwok ka ki ici kweskatisiwaspan cota aiamihewinik itekera mi nosanehwepanak Pwara kaie Barnabasa. Wirawaw tca aniki Pwar kirika Barnabas aimihepanak kirika wikosimepanak mocak kitci nosanetawaritci omirotehewiniw Kice Manitowa.

⁴⁴ Minawatc e iti arwepi kicikarik, kekatc kaskina e tacitcik iriniwok neta otenak ki mawotcihitowok cota aiamihe mikiwamik kitci petakik otitewiniw Teperitcikeritci.

⁴⁵ Aniki cota iriniwok ka nikaniwitcik ka wapamatcik e mitcetiritci iriniwa, ki micta otcinawekeritamok. Ki kikamewok anihi Pwara, e marerimatcik.

⁴⁶ Aci Pwar kirika Barnabas ki itewok, tekaci e sokeritakik: “Actepan nictam kirawaw ka cota iriniwiekw kitci witamakoiekw Kice Manito otitewin. Aric ki ki wepakonenawaw kirika kit iteritenawaw aka e tipi iteritakosiekw kitci mirikoiekw kakike pimatisiwin. Aci tca ni ka natawapamananak aniki aka ka cota iriniwitcik.

⁴⁷ Ohweriw meka ni ki itikonan Teperitciketc: ‘Kit itaritin mia wactenamakan kitci irapatisiin aka ka cota iriniwitcik otci, kitci ki pe natawapamatcik iriniwok kaskina e irikokoskamikak ka taciketcik kitci witamawotcik kitci akwacimakik.’” Ésaïe 49.6

⁴⁸ Ka petakik aniheriw e itwaniwonik aniki aka ka cota iriniwitcik, ki micta mireritamok. Ki mirwatatamok Teperitcikeritci otitewiniw. Kaie kaskina ka ki orapamakaniwitcik kitci mirakaniwitcik kakike pimatisiwiniw ki tapwerimewok Cecoca.

⁴⁹ Eckam kirawe ki iti mitcetiwok iriniwok ka ki tipatcimoctawakaniwitcik Kice Manitowa otitewiniw neta kaskina wiec askik.

⁵⁰ Aric cota iriniwok ki matciparitawok e cikimatcik atita iskwewa ka kicteritakosiritci kirika ka aiamihewatisiritci, peikon kaie iriniwa ka kicteritakosiritci neta otenak, kitci cikerimaritci Pwara kaie Barnabasa. Ki kackihewok iriniwa kitci nekatciharitci anahweriw Pwara kirika Barnabasa, kirika ki matceticohwewok neta otaskiwarik.

⁵¹ Pwar kirika Barnabas ki powititawok omaskisiniwaw e mirikosiwonik. Aci nete Iconium otenak ki icawok.

⁵² Aniki ka tapwerimatcik Cecoca neta Antioche otenak ka taciketcik micta mireritamopanak kirika mockineckakopanak Miro Manitowa.