Ka ki aitotiskeritci Cecoc otarotakana 11 - Kice Manito Ocki Omirwatcimowin

Pien e icatc Jérusalem otenak, e nta aimihatc anahweriw iriniwa ka tapwerimaritci Cecoca

¹ Cecoc otarotakana kirika kotakihik ka tapwerimatcik Cecoca neta Judée askik ka tacikewaspan ki petakewok kaie wirawaw anahweriw aka ka cota iriniwiritci e ki otapinamiritci Kice Manitowa otitewiniw.

² Ka takocik tca Pien neta Jérusalem otenak, aci aniki ka tapwerimatcik Cecoca ka cota iriniwitcik ki itactahorewok,

³ e itatcik: “Ki ki pitakewan omikiwamiwak iriniwok aka ka ki otci kicawatocwakaniwitcik kirika ki ki witci mitcisomawok!”

⁴ Aci Pien wewerita atisokawew kaskina ka ki isparinik. Ki itew:

⁵ “Nete ni tacikatai Jaffa otenak. Mekwata ni taci aiamihatai. Kek ohwe ni ki icinen, kekocic e pe raciparik, mitowi micta mitcisowakanekin e matcikonikatek nte e ici kikiekak, wakwek e pe otci raciparik, neta ka ici tacikeiapan.

⁶ Wewerita tca ni ki kanawapaten neta micta mitcisowakanekinik. Ni ki wapamawok mitcet awesisak, nakowi e icinakositcik: ka newokatetcik, kaie notcimik ka taciketcik, kinepikok acitc pirecicak, papitoc e aicinakositcik.

⁷ Aci ni ki peten e pe itikoian: ‘Pasiko, Pien! Nipahik aniki awesisak! Mowik tca!’

⁸ Aric ni ki itwan: ‘Teperitcikein, nama ni ka ki mowawok! Nama wiskat meka ni ki otci mitcin kekocic aka ka actek kitci mitcinaniwok, cota aiamihewinik itekera, kekotc ka iteritakok maratan otcitcakocinak itekera!’

⁹ Kiapatc ohwe ni ki peten e itikoian, wakwek e pe otewetak: ‘Akawir iterita maratan kekocic Kice Manito aci ka itetc mirwacin.’

¹⁰ Nictowaw anihe ekoni ka ki isparik. Minawatc kaskina ki kiwe icpiparin wakwek.

¹¹ Mia ani apitc, nicto iriniwok ki pe takocinipanak neta mikiwamik ka ici tacikeiakipan. Césarée otenak pe ototepanak aniki iriniwok e ki pe iciticohwakaniwitcik kitci pe natawapamitcik.

¹² Miro Manito ni ki itikw kitci nosanehwakik, aka kitci cakwerimoan. Aniki niwitcicanak e nikotwatcitcik kaie wirawaw ka ki pe icatcik ni ki witcewikok nete Césarée otenak. Kaskina e taciak ni ki pitakanan neta Corneille omikiwamik.

¹³ Anahwe Corneille ni ki atisokakonan e ki wapamatc aceriwa pitakamik omikiwamik, kirika e ki itikotc: ‘Iciticohik kitirinimak nete Jaffa otenak kitci natcipahatcik Simowa, Pien arica ka icinikatakaniwiritci.

¹⁴ Ki ka witamakw kekociciriw ke otci akwacimikoin, peikon kaskina kaie wirawaw aniki kimikiwamik ka taciketcik.’ Ekoni ka ki itikotc anihi aceriwa.

¹⁵ Minawatc ka iti aiarimweian, Miro Manitowa ki pe pitciteheckakowok iriniwok, mitowi kaie kirano nictam ka ki pitciteheckatokopanen.

¹⁶ Aci ni ki mikawin aniheriw Teperitciketc ka ki itespan: ‘Capatis ki sikahatakew, nipiriw e apatcitatc. Aric nanake ki ka sikahatasonawaw, Miro Manito kitci mirikoiekw.’

¹⁷ Kaie wirawaw aka ka cota iriniwitcik ki cawerimikowok Kice Manitowa, kaie peikon kirano, kotc ka tapwerimokw Teperitciketc Cecoc Krist! Tan tca ni nin e asiteritakosian kitci wikokwe nakackowak Kice Manito tan wa totak?”

¹⁸ Ka ickwa petakik aniheriw aniki cota iriniwok ka tapwerimatcik Cecoca, aci nama wiec ki otci iteritamok, kirika ki mirwatcimewok Kice Manitowa, e itetcik: “Tapwe Kice Manito ki mirew anahweriw aka ka cota iriniwiritci kitci ki matci kaie wirawaw kweskatisiritci kaie kitci mirakaniwiritci kakike pimatisiwiniw.”

Iriniwok Antioche otenak ka taciketcik

¹⁹ Ka ickwa nipahakaniwispan Étienne, mitcet iriniwok ka tapwerimatcik Cecoca ki nekatcihakaniwiwok. Ekoni wetci ki orackatcik papitoc otenaskak acitc askik e icatcik. Atita neta e tacitcik warawik ki ici matcawok, nte Phénicie askik, kotakihik Chypre minictikok kaie kotakihik Antioche otenak. Aric tepirak ni cota iriniwa arimotamowepanak Kice Manitowa otitewiniw e kakeskwetcik.

²⁰ Mekwata atita ka tapwerimatcik Cecoca nete ka otciwaspan Chypre minictikok kirika Cyrène otenak, ki icawok Antioche otenak. Aci aimihepanak iriniwa aka ka cota iriniwiritci e witamawatcik Mirwatcimowiniw Teperitcikeritci Cecoca otci.

²¹ Mirikopanak Teperitcikeritci kitci mackawisitcik. Mitcet tca iriniwok ki iti tapwerimewok Teperitcikeritci, kaie ki kweskatisiwok kitci nosanehwatcik.

²² Aniki ka tapwerimatcik Cecoca Jérusalem otenak ka tacikewaspan ki petakepanak aniheriw kaskina ka ki isparinik. Aci ki iciticohwewok Barnabasa nete Antioche otenak kitci icaritci.

²³ Barnabas ka takocik nete kirika ka wapatak Kice Manitowa e ki cawerimikotcik aniki ka tapwerimatcik Cecoca, ki micta mireritam kirika kaskina ki wikosimew e irikokotehetcik mocak kitci nosanehwatcik Teperitcikeritci.

²⁴ Tapwe ni wirata miro iriniwipan Barnabas. Mockineckakopan Miro Manitowa kaie asperimototawepan Kice Manitowa. Mitcet tca iriniwok ki oreritamok kitci tapwerimatcik Teperitcikeritci.

²⁵ Minawatc ki matcaw Barnabas, Tarse otenak e icatc, e nta nantowapamatc anihi Saula.

²⁶ Ka ickwa miskawatc, ki pecowew nete Antioche otenak. Tapickotc e nicitcik ki tacikewok neta, tekaci peikwo pipona irikik e witci tacikematcik neta ka tapwerimaritci Cecoca. Kirika ki kiskinohamawewok mitcet iriniwa kitci asperimototawaritci Kice Manitowa. Ekote nete Antioche otenak ickotok “Cecoc Krist otirinima” ka ki icinikatakaniwitcik aniki ka tapwerimatcik Cecoca.

²⁷ Ani apitc atita ka nikan tipatcimotcik Jérusalem otenak otci matcapanak, nete e icatcik Antioche otenak.

²⁸ Peikwaw kotc e kicikak, peikw neta iriniw e tacitcik, Agabus e icinikasotc, ki pasiko. E keskinowirikotc Miro Manitowa, ki tipatcimo aci kekatc kitci micta kokataniwonik kaskina wiec askik. —Tapwe tca ekoni ka pe iciwepanik, mekwata ka Kice Okimawispan Claude ka icinikasospan.—

²⁹ Aniki tca ka tapwerimatcik Cecoca ki oreritamok papeikw e tacitcik e ici kackitatcik kitci pakitinakik kekociciriw kitci iciticahamowatcik e witcihatcik anihi ka tapwerimaritci Cecoca nete Judée askik ka tacikeritci.

³⁰ Ekoni ka ki totakik. Ki mawotcitawok kekwariw. Kaskina ki mirewok aniheriw Barnabasa kirika Saula kitci nta miraritci anahweriw e taciritci ka nikaniwiritci iriniwa otci ka tapwerimaritci Cecoca nete Judée askik kitci matinamakeritci.