Ka ki aitotiskeritci Cecoc otarotakana 10 - Kice Manito Ocki Omirwatcimowin

Pien e wicamikotc kitci cimakanica Corneille kitci natawapamatc

¹ Tapan Césarée otenak peikw iriniw, Corneille e icinikasotc. Anahwe Corneille kitci cimakanicipan. Tiperimepan mitato mitana owitci cimakanica, Italie askik ka otciritci.

² Kicterimepan Kice Manitowa. Aiamihatisipan, kirika kaskina omikiwamik ka tacikeritci. Micta ko witcihepan cota iriniwa ka kitimakisiritci, mocak kaie aiamihakopan e pakoserimatc Kice Manitowa.

³ Peikwaw e kicikarik e ickwa apita kicikarik wiec nicto tipahikan, ki itapatamaw, ohweriw e icinak: ki wapamew Kice Manito otacerima e pe pitakeritci omikiwamik, e tca itikotc: “Corneille!”

⁴ Kanawapamew aceriwa e koctatc, e itatc: “Kekwan ni, Teperitcikein?” Aci itiko anihi aceriwa: “Kice Manito natotam kaskina ka ki ici aiamihain kaie ka ki ici witcihatcik ka kitimakisitcik. Nama ki onikatikw.

⁵ Iciticohwik tca aci kitirinimak Jaffa otenak kitci ki natcipahatcik peikw iriniwa, Simo ka icinikasoritci, arica Pien ka icinikatakaniwiritci.

⁶ Simo icinikasoriw kaie wir anihi iriniwa omikiwamirik ka taciketc anahwe Pien. Anahwe kotak Simo ka otamirohaketc pakekina. Aniheriw omikiwam rarewak kitcikamik ka ici takonik.”

⁷ Ka ickwa nakatikotc anihi aceriwa ka ki aimihikotc, Corneille wicamew nicw otarotakana kirika peikw ocimakanicima aci weckatc ka ki atoskectakotc, kaie wir ka kicterimaritci Kice Manitowa.

⁸ Kaskina ki atisokawew aniheriw ka ki isparitc. Minawatc tca ki iciticahwew Jaffa otenak.

⁹ Minawatc kecikarik, mekwata e pimotetcik, wiec aci e iti apita kicikarik, aci e tepinakonik Jaffa otenariw, ani apitc Pien ki iskwatowiw okitc mikiwamik kitci nta aiamihatc.

¹⁰ Ki pakatew. Wi tca mitcisopan. Mekwata e ocitamowakaniwitc ke mitcik, ki itapatamaw, ohweriw e icinak:

¹¹ Ki wapatam wakwek e ceparinik, kekociciriw e pe raciparinik, mitowi micta mitcisowakanekin e matcikonikatek neta e ici kikiekak e pe raciparik askik.

¹² Neta mitcisowakanekinik tapanak mitcet awesisak, nakowi e aicinakositcik: ka newokatetcik kirika kinepikok acitc mitcet pirecicak, papitoc e aicinakositcik.

¹³ Aci petam e itakaniwitc: “Pasiko Pien! Nipahik aniki awesisak! Mowik tca!”

¹⁴ Aric Pien itew: “Teperitcikein, nama ni ka ki mowawok! Nama meka wiskat ni ki otci mitcin kekocic aka ka actek kitci mitcinaniwok, cota aiamihewinik itekera, kekotc ka iteritakok maratan otcitcakocinak itekera!”

¹⁵ Kiapatc anahwe neta petam e itakaniwitc: “Akawir iterita maratan kekocic Kice Manito aci ka itetc mirwacin.”

¹⁶ Nictowaw aniheriw ki isparin. Minawatc tecikotc ki kiwe icpiparin wakwek anihe mitcisowakanekin.

¹⁷ Pien mamitoneritamopan e wi kiskeritakipan tan ni wa itemakanik aniheriw ka ki icinak. Aniki iriniwok ka ki pe iciticohikotcik Corneille mekwata pa nanto kiskeritamwakopan e ici takonik Simo omikiwamiriw, e ickwa miskakik. Aci ickwatemik pa nanipowiwok.

¹⁸ Tepwewok kirika kokwetcikemowok: “Ekota ia ota e taciketc Simo, arica ka icinikatakaniwitc Pien?”

¹⁹ Kiapatc Pien taci mamitoneritamopan e nanto kiskeritak tan ni wa itemakanik aniheriw ka ki icinak. Kek itiko Miro Manitowa: “Natota! Nictiwok ota iriniwok ka nantowapamiskik.

²⁰ Pasiko. Nitatowi. Ekoci nosanehwik aniki iriniwok akawir kaie wiec iterita. Nin meka ni, ka ki pe iciticohwakik.”

²¹ Aci Pien nitatowiw e natawapamatc anahweriw iriniwa, e itatc: “Nin ni, ka nantowapamiekw. Kekwan wetci pe icaiekw?”

²² Aci itewok: “Anahwe ni ki pe iciticohokonan, ka atoskectawakitc kitci cimakanic, Corneille ka icinikasotc. Anahwe iriniw icikowisk itatisiw kirika kicterimew Kice Manitowa. Micta mirerimiko kaskina cota iriniwa. Kice Manito otacerima ki itiko kitci pe iciticohwimitc, kitci pe natcipahitak kitci iciwiritak omikiwamik, e wi natotak ke itewotc.”

²³ Ki pitakewirew Pien anihi iriniwa kitci niparitci neta peikwo tipiskwa. Minawatc kecikarik, aci witcewew e matcaritci anihi ka ki pe natcipahikotc. Atita kaie iti witcewikowok kotakihi iriniwa kaie wirawaw ka tapwerimaritci Cecoca, Jaffa otenak ka otciritci.

²⁴ Minawatc kecikarik aci takociniwok Césarée otenak. Corneille kirika atita otcirowemakana kaie omiro okwimesa ka ki wicamaspan, pehepanak Piena acitc anahweriw iriniwa ka witcewaritci kitci takociniritci omikiwamik.

²⁵ Apitc ka pitakeritci Piena omikiwamik, Corneille ki pe nta nakickawew e nipiskoctawatc e micta kicterimatc.

²⁶ Aric Pien ki pasikopitew, e itatc: “Pasiko, nit iriniwin tepirak kaie nin.”

²⁷ Kiapatc Pien aimihew Corneilla e tca iti pitaketcik mikiwamik. Wapamew e micta mitcetiritci neta iriniwa e ki mawotcihitoritci.

²⁸ Pien itew: “Ki kiskeritenawaw e itemakak cota aiamihe irakonikewin, cota iriniw aka matci kitci pa witcewatc kaie aka kitci kiwotamatc awiriwa aka ka cota iriniwiritci. Aric Kice Manito ni ki kiskinohamakw aka aci kitci iterimak awik aka ka cota iriniwitc mia e ometciwitc otcitcakocik itekera, kaie aka kitci iterimak ‘nama tipi iteritakosiw kitci witcewakaniwitc.’

²⁹ Ekoni wetci tecikotc ki pe icaian kotc ka pe wicamewok. Ni ta mireriten tca kitci kiskeritaman kekwan wetci ki pe wicamewok.”

³⁰ Corneille itew: “Aci anotc nicto kickwa nit aiamihatai nimikiwamik, nicto tipahikan ko ka aiamihaniwok e ickwa apita kicikak. Kek ni ki wapamaw iriniw e micta wasiterik owikasim,

³¹ e pe nanipowitc, e icitc: ‘Corneille, Kice Manito ki petam ka pakoserimatc, kirika nama onikew ka ki ici witcihatcik ka kitimakisitcik.

³² Iciticohwik iriniwok Jaffa otenak kitci pecowatcik Simowa, Pien arica ka icinikatakaniwiritci. Neta tacikew omikiwamirik iriniwa, Simo ka icinikasoritci kaie wir. Anahwe kotak Simo ka otamirohaketc pakekina. Rarewak kitcikamik takoniw omikiwam.’

³³ Tecikotc ni ki itawok iriniwok kitci natcipahiskik. Ni mireriten tca e ki pe icain. Anotc kaskina tapickotc ni tacikanan, kaie wir Kice Manito e witci tacikemitokw, kitci natotawokw kaskina ka ki itisk Teperitciketc kitci itewotc.”

Pien e arimwetc Corneille omikiwamirik

³⁴ Aci Pien aiarimwew, e itetc: “Aci ni miro nisitoten ohwe e tapwemakak: Kice Manito nama kirawe kicterimew atita iriniwa patok kotakihi.

³⁵ Mirerimew kaskina iriniwa e aicinakosiritci, kotc nte wetciritci, kecpin e kicterimikotc kaie e itotiskeritci ka mirwacinik.

³⁶ Ki iciticahamawew otipatcimowin Israël iriniwa, kitci witamawakaniwiritci Mirwatcimowiniw e arimotcikaterik aniheriw pekateritamowiniw Cecoc Krist ka ki petatc, wir kaskina ka tiperimatc iriniwa.

³⁷ Ki kiskeritenawatake ka ki pe iciwepak nictam Galilée askik, minawatc kaskina Judée askik, ka ickwa kakeskwetc Capatis, kaie ka sikahataketc.

³⁸ Kaie ki kiskeritenawatake Kice Manito ka ki ici cawerimatc Cecoca, Nazareth ka otcirispana, e ki miratc Miro Manitowa omackawisiwiniw. Acitc kiapatc kaie ki kiskeritenawaw e pa pimatisispan Cecoc e pa miro totakipan kirika e kikehaspan kaskina iriniwa ka tiperimikowaspan Matci Manitowa. Kice Manitowa meka aspinikotc witci tacikemikopan Cecoc.

³⁹ Ninan ni ki wapamanan kaskina ka ki aitotak cota askik kirika Jérusalem otenak. Minawatc ki nipahakaniwiw e tcictaskowatakaniwitc tcipaiatikok.

⁴⁰ Aric Kice Manito ki apitcipahew ka ickwa nicto kickokarik, kaie ki nokohew kitci wapamakaniwiritci.

⁴¹ Nama kaskina awik ki otci wapamew, tepirak aniki aci ka ki ickwa orapamikotcik Kice Manitowa. Ninan ni ki wapamanan, ni ki witci mitcisomanan acitc tapickotc ni ki minikwanan, ka ickwa apitcipahikotc Kice Manitowa.

⁴² Ni ki itikonan kitci pa kakeskweiak iriniwok otci, kirika kitci pa tipatcimoak, kitci iteiak enko anahwe tapwe ke tipaskonatc ka pimatisiritci kaie ka niporitci, kotc ka orapamikotc Kice Manitowa.

⁴³ Weckatc kaskina ka ki pe tipatcimotcik Kice Manitowa otci kaie wirawaw ki arimomewok Cecoca, e itetcik: Kaskina ka tapwerimatc, kasihamawakaniwiw opactatowina, e apitc mackawisimakanik oticinikasowin.”

Aka ka cota iriniwitcik e pe pitciteheckakotcik Miro Manitowa

⁴⁴ Mekwata kiapatc e taci arimwespan Pien, Miro Manitowa ki pe nta pitciteheckakowok kaskina aniki ka natotawawaspan Piena.

⁴⁵ Aniki ka tapwerimatcik Cecoca ka cota iriniwitcik ka ki pe witcewawaspan Piena micta mamiskateritamwakopan e ki mirakaniwiritci kaie wirawaw aka ka cota iriniwiritci kitci pitciteheckakoritci Miro Manitowa.

⁴⁶ Petowepanak meka kotakeriw arimwewiniw e ici arimweritci, kaie e mirwatcimaritci Kice Manitowa. Aci Pien itew:

⁴⁷ “Nama ki ka ki otcinehwanowok aniki iriniwok kitci sikahatasotcik nipik, aci e ki ickwa pe pitciteheckakotcik Miro Manitowa kaie wirawaw mia kirano!”

⁴⁸ Minawatc Pien ki itew kitci sikahatowaritci, Cecoc Krist oticinikasowinik. Minawatc ki nataweritamako kitci witci tacikematc neta kiapatc memacic.