Ka ki aitotiskeritci Cecoc otarotakana 1 - Kice Manito Ocki Omirwatcimowin

E witamawakaniwitcik Cecoc otarotakana kitci pe iciticahamowakaniwitcik Miro Manitowa

¹ Nikwimes Théophile, nictam ka masinahikeian, ni ki tipatcimon kaskina ka ki aitotak Cecoc kaie ka ki ici kiskinohamaketc kotc ka kitciparitc,

² nac aniheriw e kicikarik ka ocpickatc, wakwek ka icatc. Aric epwamoci ocpickatc, ki witamawew otarotakana ka ki orapamatc e ici nataweritak ke totamiritci. Miro Manitowa meka sokiteheckakopan mekwata e kiskinohamaketc.

³ Tapwe wirata, ka ickwa nipotc, enko anahweriw otarotakana ka ki wapatahatc tapwe e pimatisitc, kaskina wiec e ki aitotisketc kitci wapatahatc. Nemitana tato kickwa irikik ki natawapamew e nta arimotamawatc Kice Manitowa Okimawiniw.

⁴ Peikwaw e kicikarik, mekwata e witci mitcisomatc Cecoc, ki itew: “Akawir matcakw neta Jérusalem. Petakw aniheriw ka ki itetc Kotawino kitci miritakw, anihe aci ka ki witamatakok kitci ici cawerimitakw.

⁵ Capatis meka ki sikahatakew, nipiriw e ki apatcitatc. Aric nanake ki ka sikahatasonawaw, Miro Manito kitci mirikoiekw.”

Ka ocpickatc Cecoc

⁶ Minawatc kiapatc peikwaw Cecoc e mawotcihitotcik kirika owitcewakana, ki kokwetcimiko: “Teperitcikein, aci ia kekatc ki ka kiwe mirawok Israël iriniwok kitci tiperitakik okimawiniwaw?”

⁷ Ki itikowok Cecoca: “Nama actew kitci nikan nanto kiskeritamekw apitc mia ke iti aisparik. Wircike meka Kotawino takoniw tiperitamowiniw kitci itactatc apitc ke isparinik kekociciriw.

⁸ Aric ki ka pe otitikonawaw mackawisiwin, apitc Miro Manito nitcirete kitci witci tacikemitakw. Kaskina wiec tca ki ka tipatciminawaw Jérusalem otenak, kaie kaskina wiec Judée askik acitc Samarie askik, nac kaskina e irikokoskamikak.”

⁹ Ka ickwa aitetc aniheriw Cecoc, mekwata e kanawapamikotc owitcewakana, ki ocpickaw, wakwek e icatc, nac aka e nokositc, oskoriw e nakeckakotc.

¹⁰ Mekwata kiapatc e taci itapitcik icpimik anahweriw owitcewakana nte Cecoca ka ki ici ocpickaritci, kek nicw iriniwa e wapaspisoritci pe nta witcikapowictakowok,

¹¹ e itikotcik: “Kirawaw Galilée iriniwok, kekwan wetci nanipowiekw neta, icpimik e itapiekw? Anahwe iriniw Cecoc ka ki matcatc, wakwek e ki iciwirikotc, minawatc kecko kata pe takociniw, mia ka ki ici wapamekw e matcatc, ekoni peikon ke ici wapamakaniwitc minawatc takocike.”

Ka orapamakaniwitc Matthias kitci tapickowatc Juda wa

¹² Aci Jérusalem otenak kiwepanak Cecoc otarotakana, nte e otci matcatcik matinacik Mont des Oliviers ka icinikaterik. Anihe matinacic pecotcik otenak ici takon, wiec apita tipahikan asitcaw neta e pimotaniwok.

¹³ Tekocikik Jérusalem otenak, icpimitakok mikiwamik ki iskwatowiwok, aricapik e icatcik, neta ko e ici mawotcihitowakopanen. Aniki ka ki taciketcik neta: Pien, Jean, Cak acitc Atre, Pirip, Toma, Barthélémy acitc Matio, Cak (Alphée okosa), Simo (“Anahwe aka ka naheritak kitci tiperimikotc kice okimawa” ka icinikatakaniwikopanen), kirika Jude (Cak okosa).

¹⁴ Kaskina ko mawotcihitowakopan tapickotc kitci ki aiamihatcik, iskwewok kaie wirawaw, kaie Mari (Cecoc okawiwa) acitc Cecoc ocima.

¹⁵ Peikwaw aniheriw e kicikarik, mekwata e taci mawotcihitotcik aniki ka tapwerimatcik Cecoca, wiec mitato mitana acitc nicitana e tacitcik, Pien ki pasiko. Tetawitc ki nanipowiw e tacikerispana anahweriw iriniwa, e itatc:

¹⁶ “Niwitcicanak, patoc otcitakotc kata isparin ohwe, Judas kitci keskinowewiratc anihi ke wi makonaritci Cecoca. Enkweriw weckatc ka ki masinahakipan Okimaw Tapit kitci pe isparinik, Miro Manitowa e ki mirikospan kitci masinahak Kice Manito Omasinahikanik.

¹⁷ Anahwe Judas ki pa witcewikotano. Kaie wir otamiropan e atoskectawokw Kice Manito.”

¹⁸ —Aniheriw coriariw ka ki kicikowakaniwitc anahwe Judas e ki matci totak e ki pakiterimatc Cecoca, ki otapinamakopan kitikan askiriw. Ki pakicin neta, warawik ki otcipariw. Tekaci ki pokotcecin kaie orowitakicepariw.

¹⁹ Kaskina neta ka taciketcik Jérusalem otenak ki petakewok aniheriw ka ispariritci. Ekoni wetci ki icinikatakik aniheriw kitikan askiriw, wirawaw e ici arimwetcik “Hakeldama.” Itwaniwon anihe: “Miko Kitikan Aski.”—

²⁰ “Enko tca ohwe ka masinatek Mirwatatamo Nakamowin Masinahikanik: ‘Kitci nakatcikaterik omikiwam, kaie aka awik kitci taciketc.’ Psaumes 69.26(25) Kaie kiapatc masinatew: ‘Acteriw kotakihi awiriw kitci tapickakotc.’ ” Psaumes 109.5

^21-22 “Acteriw tca kotak iriniw kitci orapamakaniwitc kitci witcewitokw, kaie wir kitci tipatcimotc wir tipirawe e ki wapamatc Teperitcikeritci Cecoca e ki apitciparitci. Aric anahwe iriniw ke orapamokw, patoc ni anahwe peikw neta e tacitcik iriniwok mocak ka ki pa nosanehitokok mekwata Teperitciketc Cecoc ka pa pimatisispan askik kirika kirano, esko apitc Capatisa ka sikahatakospan Cecoc, nac tca aniheriw e kicikarik ka ocpickatc, wakwek e icatc.”

²³ Nicw iriniwok ki wirakaniwiwok: anahwe peikw icinikasopan Sosep, kaie ko Barsabbas icinikatakaniwipan, arica e icinikatakaniwispan Justus. Minawatc anahwe kotak, Matthias icinikasopan.

²⁴ Minawatc kaskina tapickotc ki aiamihawok e itetcik: “Teperitciketc, kir ka kiskeritamwotcik kaskina iriniwok e icinakositcik otehiwak, wapatahicinan mia neta e nicitcik ka ki orapamatc,

²⁵ kitci tapickowatc Judawa neta ka ki ici otamirorispana e atoskectaskipan, ka ki tca nakatamiritci kitci icaritci neta ka ki ici kackitamatisoritci kitci icaritci.”

²⁶ Ekoni tca ka ici tawinakik mictikociriw kitci kiskeritakik anihi mia ke orapamakaniwiritci, Cecoc otarotakana kitci irapatisiritci. Matthias ki tawopitam, aci wirctam kitci witcewatc anihi kotakihi mitato acitc peikw e tacirispana.