3 Jean 1 - Kice Manito Ocki Omirwatcimowin

Jean e arimikowatc okwimesa

¹ Nin Kice iriniw. Ki masinahamatin, Gaïus, nimiro nikwimes tapwe e micta sakihitan.

² Nimiro nikwimes, nit asperimon kitci miroparik kir otci, kirika kitci micta miro pimatisiin kiwiawik e asitci miro pimatisiin kitcitcakocik itekera.

³ Aci ni ki pe natawapamikok kiwitcicaninowok, e ki pe witamawitcik e miro nosanetain tapwe miro meskanaw, kirika tan e ici pimotein tapwewinik. Ni ki micta mireriten ka witamakoian anihe.

⁴ Nama takon kotak kekocic kirawe e mirerimitamihikoan patok anihe, e petakeian tapwe miro meskanak e ici pimotetcik aniki ka iterimakik ninitcanicak.

Gaïus mocak e nosanehwatc Kice Manitowa

⁵ Nimiro nikwimes, ki wapatahiwan mocak kitci ki asperimototakoin e witcihatcik kiwitcicaninowok, misawatc aka kaskina e kiskerimatcik.

⁶ Ka mawotcihitoak ota kitci aiamihaiak, ki pe nta aiarimotamok aniheriw e ici sakihiwein. Ki nataweritamatin kaie kiapatc kitci witcihatcik aniki towihik kitci miro matcatcik, kotc e ici nataweritak Kice Manito.

⁷ Wetci meka ici matcatcik, osam e atoskectawatcik Krista, aka kekociciriw e pe mirikotcik iriniwa aka ka tapwerimaritci.

⁸ Actew tca kirano kitci witcihokok aniki towihik iriniwok, tapickotc kitci ki tipatatamokw tapwewin.

Diotrèphe kirika Démétrius

⁹ Ni ki masinahamowawok iriniwok ka tapwerimatcik Cecoca neta kotenamiwak. Aric Diotrèphe, anahwe kaskina e wi tipototak, tekaci nama wi pamatam ka itewak.

¹⁰ Minawatc tca icaiane nete kotenamiwak, kaskina ni ka witamawan e ici matci totak, e kiraskitc anahwe e pokonimimitc. Nama tipi iteritam ani e ici totak, kiapatc kirawe matci totam: nama wawatc wi acamew, nama kaie wi nipehew mitcet kotakihi kiwitcicaninowa e pe takociniritci. Tawok kotakihik ka taciketcik kotenamiwak e wi pitakehatcik anahweriw mantewa e takociniritci. Aric otcinehokowok anihi Diotrèpha, kirika nama awocamec pakitinikowok kitci pe nta aiamihatcik.

¹¹ Nimiro nikwimes, akawir keskinowamapamik aniki ka matci itatisitcik, aric aniki keskinowapamik ka miro itatisitcik. Anahwe meka ka miro itatisitc tapwe tiperimiko Kice Manitowa. Anahwe tca ka matci itatisitc, nama wiskat ki otci wapamew Kice Manitowa.

¹² Kotak anahwe Démétrius, kaskina awik mirwatcimew. Kiskeritakosiw kaie e nosanetatc tapwewiniw osam e miro itatisitc. Kaie ninan ni mirwatcimanan. Ki kiskeriten meka kaskina ka iteiak tapwe ni anihe.

Aci e matcacikowakaniwitc Gaïus

¹³ Micta mitcen kotak kekocic ka wi iteian, nama aric patima ni wi masinahen.

¹⁴ Nit asperimon nanake kitci wapamitan. Wapamitoikwe, wewerita ki ka arimotenano.

¹⁵ Ni pakoserimon kitci pekateritaman. Kikwimesak ota ka taciketcik kit arimikakok. Kaie nin kaskina kikwimesinowok nit arimikowawok, tato nta e tacitcik. Nin Jean