2 Timothée 4 - Kice Manito Ocki Omirwatcimowin

¹ Ki nataweritamatin, e petawitc Kice Manito kaie Cecoc Krist e itewak, anahwe ke tipaskonatc ka pimatisiritci kirika ka niporitci, e kiskeritamokw kaie kitci pe koski takocik Cecoc, acitc kitci takociparinik okimawin:

² Kaketin kakeskwe, Kice Manito otitewin e tipatataman, misawatc kecpin e wi natotaskik iriniwok kekotc aka e wi natotaskik. Kakotcita kitci cakosimatcik iriniwok kitci sokimatcik kaie kitci witamawotcik, kecpin aka wewerita e wi totakik wewerita kitci kiskinohamawotcik, kaie mocak kitci ciciperitaman.

³ Nikotin kata otcitciparin aka kitci wi natotakik iriniwok kiskinohamakewiniw e tapwemakanik. Kata nosanetawok wirawaw tipirawe ke ici nataweritakik e maratanik. Kata tca natotawewok tepirak anahweriw ka wi natotawatcik. Kata mawotcihewok mitcet iriniwa kitci kiskinohamakotcik wa ici petakik.

⁴ Kata kipotokenitisowok aka kitci petakik tapwewiniw. Kata atimikapowiwok, kitci natotakik atisokaniw aka e tapwemakanik.

⁵ Aric kir, miro nanakatcihitiso, kaskina ke totaman, kirika sokikapowi nakickamane arimisiwin. Mocak pa tipatata Mirwatcimowin, kirika kaskina tota anihe ka ki ici mirikoin kitci itotiskein, e atoskectawotc Kice Manito.

⁶ Aric nin, aci kekatc kata otcitciparin kitci pakiterimikoian Kice Manito otci. Aci takociparin kitci nakatitakok.

⁷ Mia aci e poniparik e ki natoparian e iteritakok e ki atoskectawak Cecoc. Mia kaie awik e ickwa mipatatc e kwetciskatatc, aci kata ickwaparin notamirowin. Mocak ni ki asperimototawaw Teperitciketc.

⁸ Aci otcitciparin kitci mirikoian anihe ka ki ici kackitamatisoian icikowisk aci e iterimikoian. Teperitciketc, mocak wewerita e tipaskoniketc, ni ka mirikw, takociparinike aniheriw ke kicikarik kitci tipaskonikaniwonik. Nama tepirak nin ni ka mirikw, aric peikon kaskina kotakihi ka sakihikotc, ka micta pehikotc kitci pe koski takocik.

Ka witamawakaniwitc mamitcitc Timothée

⁹ Mantokaso wipatc kitci pe natawapamiin.

¹⁰ Démas ni ki nakatikw, osam e sakitatc kekociciriw ota askik. Ki matcaw, nete e icatc Thessalonique otenak. Crescens nete wir ki icaw Galatie, minawatc anahwe Tite ekote neta Dalmatie askik ka icatc.

¹¹ Luc wircike nama ni nakatikw. Matcehori Mark. Pe iciwiri ota e ici tacikeiak. Ni ka ki witcihikw ota ka wi itotiskewak.

¹² Ni ki iciticohwaw Tychique neta Éphèse otenak.

¹³ Apitc pe icaine, petakan nikapotowan ka ki nakataman nete Troas otenak, Carpus omikiwamik. Petowaci kirika nimasinahikana, kaie anihi aka kitci onikein nimasinahikana ka pakekiniwoki.

¹⁴ Kaie anahwe piwapiskoke iriniw, Arikisan ka icinikatakaniwitc, mictahi ni ki matci totakw. Kata tapictako Teperitcikeritci ka ici kackitamatisotc.

¹⁵ Aiekwamictowi kaie kir anahwe. Tekaci meka nama ki otci mirotam ka ici kiskinohamakeikw, e wi cakotcitatc.

¹⁶ Nictam ka iciwirikoian tipaskonikewikamikok kitci kispiwatitisoan, nama awik ni ki otci pe witcihikw. Kaskina ni ki pakiterimikok. Nama aric ni nataweriten kitci anweritasohwakaniwitcik aniheriw otci.

¹⁷ Kice Manito wir ni ki wikotcihikw kirika ni ki mackawisihikw. Ekoni wetci ki kackitaian wewerita kitci tipatcimowak otipatcimowin, kaskina kitci ki petakik iriniwok aka ka cota iriniwitcik. Taraska mia awik kekatc e mowikotc micapiciwa, ka iteritaman, minawatc ni ki wikotcihikowin.

¹⁸ Tapwe Teperitciketc ni ka wikotcihikw tatwaw ke nakickaman ka maratak. Nikotin e kicikak ni ka pitakahikw Okimawinik wakwek aci e miro pimatisian. Kakike kitci icperimakaniwitc! Kekora ki iki.

Mamitcitc e matcacikowakaniwitc Timothée

¹⁹ Nit arimikowawok Priscille kirika Aquilas, kaie kaskina ka taciketcik Onésiphore omikiwamirik.

²⁰ Éraste ekote ka taciketc neta Corinthe otenak. Wir Trophime nete ni ki nakataw Milet otenak, e akositc.

²¹ Mantokaso kitci pe icain epwamoci pipok. Kit arimikakok Eubulus, Pudens, Linus, Claudia, kaie aniki kaskina kotakihik kiwitcicaninowok e iterimawikok.

²² Ni pakoserimon mocak kitci witci tacikemisk Teperitciketc! Ni pakoserimon kaie kaskina e taciekw kitci witci tacikemitakw Kice Manito omirotehewinik. Nin Pwar