2 Timothée 3 - Kice Manito Ocki Omirwatcimowin

Mamitcitc ke isparik epwamoci ponaskiwok

¹ Actew kitci kiskeritaman ohwe: kata natciparin nanake orina kitci arimiparik epwamoci ponaskiwoke.

² Tapwe iriniwok kata wi kicterimikosiwok, kaie kata sakitawok coriariw, kata mirwatcimitisowok acitc e micta sasekatcik, kaie kata marerimewok Kice Manitowa, nama kata natotawewok onikihikowawa, nama awiriw kata wi naskamewok, nama kaie kata kicteritamok kitci aiamihaniwonik.

³ Nama kata sakihewok owitc iriniwawa kaie nama kata kitimakerimewok. Orina kata mareritcikewok. Kata akwatisiwok kirika kata mireritamok e nekatcihiwetcik. Kata matcitawok kirika kata cikeritamok ka mirwacinik e totcikaterik.

⁴ Kata wecimiwewok. Kata koctatikoniw ke aitotakik. Tekaci kata kicterimowok. Kirawe kata sakitawok kitci mireritamihitisotcik patok kitci miroparihitotcik kirika Kice Manitowa.

⁵ Kata itekasowok e asperimototawatcik Kice Manitowa, aric kata wepakonamok Kice Manitowa omackawisiwiniw. Atimikapowictawik aniki towihik iriniwok!

⁶ Atita neta e tacitcik natawapamewok iskwewa omikiwamirik e cikimatcik kitci nosanehikotcik. Aniki iskwewok nama mackawisiwok otasperimowiniwak, kiapatc mitcet pactatowiniw e takopitikotcik, e paskewirikotcik kaskina e ici matci nataweritakik.

⁷ Mocak nantonamok ocki kiskinohamakewiniw aniki iskwewok, nama aric wiskat kackitawok kitci kiskeritakik tapwewiniw.

^8-9 Minawatc aniki iriniwok atimikapowictamok tapwewiniw, tekaci aka e mirwacinik omitoneritcikaniwaw, aka wiec e irapatanik otapwetamowiniwaw. Nama kinowec kata natotawakaniwiwok. Kata iti kiskerimakaniwiwok e kiwockweritakonik aniheriw ka aitetcik. Ekoni mia peikon weckatc ka ki isparitcik nicw iriniwok ka icinikasowakopanen Jannès kaie Jambrès, ka kotcitatcik kitci atimikapowictawatcik Moïsa.

Mamitcitc kitci nisawinaniwok

¹⁰ Aric kir Timothée, wewerita ki kiskeriten kaskina e ici kiskinohamakeian, e pimatisian kaie e nataweritaman, e asperimototawak Teperitciketc, e ciciperitaman, e sakihakik kiwitc irininook, e ici sokikapowian,

¹¹ e ici nakickaman nekatcitawin, kaie e nekaterimoian. Ki kiskeriten kaskina ka ki iciwepasian neta otenak Antioche, Iconium, kaie Lystre, kaskina ka ki ici nekatcihikoian. Aric Teperitciketc kaskina ni ki pe nta wikotcihikw kaskina e ici nekatcitaiapan.

¹² Tapwe wirata, kaskina ka nataweritakik kitci ici pimatisitcik kotc e ici nataweritamiritci Kice Manitowa, e mamweritakositcik kirika Cecoc Krist, kata nekatcihakaniwiwok.

¹³ Aric iriniwok ka matci iriniwitcik kaie aniki ka wecimiwetcik eckam kirawe warawik kata icawok e matci totakik. Kata wecimewok owitc iriniwawa, kirika kaie wirawaw kata wecimakaniwiwok.

¹⁴ Kir aric, wewerita kanawerita ka ki ici kiskinohamakoin, ka ki ici naheritaman e kiskeritamopan otcitakotc e tapwemakak. Ki kiskerimawok meka awin aniki ka ki kiskinohamaskik.

¹⁵ Esko awaciwiin ata ki kiskeriten e itasinatek Kice Manito Omasinahikanik. Ekota nta ka otci mirikoin miro mitoneritcikan, kitci ki asperimototawotc Cecoc Krist kitci tca akwacimisk.

¹⁶ Kaskina e itemakak Kice Manito Omasinahikanik, wir ka ki miriwetc. Mirwapatan e kiskinohamakaniwok tapwewin, kirika kitci kiskeritamokw anihe aka mia ka icinakok kitapwetamowininak, wewerita kitci kakeskimiwaniwok kitci ki tca nosanetakaniwok miro meskanaw, acitc kitci kiskeritamokw icikowisk ke ici pimatisiikw.

¹⁷ Kaskina aniheriw ki mirew Kice Manito otirinima kitci ickwa aikeritci, kitci miro nisawiritci kaskina kitci nakickamiritci, mocak ka mirwacinik kitci nosanetaritci.