2 Timothée 2 - Kice Manito Ocki Omirwatcimowin

Miro cimakanic ka nosanehatc Cecoca

¹ Kir tca, nikosis e iterimitan, pakitini Cecoc Krist kitci sokiteheckask, omirotehewin e ki mirisk, ka miratc anihi kaskina ka nosanehikotc.

² Ka ki ici petawiin e tipatcimoian e mitcetinaniwok, ekoni kaie kir ke ici acotamawotcik iriniwok ka iterimatcik kaie wirawaw kitci kackitatcik kitci kiskinohamawatcik owitc iriniwawa, mocak ke ki asperimototawakaniwiritci wiec e iciwepanik.

³ Nekatcitaine kaie kir Cecoc otci, mitowi cimakanic ka nekatcitatc ka miro atoskectawatc okimama.

⁴ E mekwa otamirotc cimakanic, nama mamitoneritam kotakeriw kekociciriw opimatisiwinik, tepirak tca kitci totak e ici nataweritamiritci okimama.

⁵ Peikon kaie awik e kwetciskataniwonik e mipataniwonik, nama kata ki kanewiw ke ici kackitamatisotc, kecpin aka e nosanetatc irakonikewiniw.

⁶ Peikon kaie kitike iriniw, kaketin e otamirotc kitci ki mirokinik okitikan, kicikinike, acteriw wirctam kitci mawotcitatc okitikan.

⁷ Mamitonerita anihe ka ititan. Teperitciketc ki ka mirikw kaskina kitci nisitotamowotc.

⁸ Mikawerimi Cecoc Krist, Okimaw Tapita ka ki otaniskotape omocomitc, kirika ka ki apitcipatc. Enko anahwe Mirwatcimowin ka pa tipatcimoian.

⁹ Enko anahwe Mirwatcimowin kaie otci nekatcitaian, kaie wetci takopitikoan piwapiskwapi, mia awik ka matci totak e iteritakosian. Aric Kice Manito otitewin nama ki takopitcikateriw.

¹⁰ Ekoni wetci sokeritaman, kitci ki witcihimaki anahweriw Kice Manito ka ki orapamatc, kaie wirawaw kitci ki akwacimakaniwitcik e asperimotcik Cecoc Krist, kaie kakike kitci ki pimatisitcik Kice Manito oticperitakosiwinik.

¹¹ Ketcinaweritakon ohwe ka ititan: “Kecpin nipoikwe kirika Cecoc, ki ka witci tacikemano.

¹² Kecpin mocak sokikapowiikwe e nekatcitaikw, tapickotc ki ka tiperitcikanano kirika wir. Kecpin pakiterimokwe, kaie wir ki ka pakiterimikono.

¹³ Kecpin e pakiterimoikw, aka tca kitci ki asperimototakoikw, wir nama wiskat kata pakiterimo, mocak e iteritakositc kitci ki asperimototawakaniwitc. Nama wiskat meka kata ki meckotatisiw.”

Arotakan e mirerimakaniwitc

¹⁴ Mikawasimik aniheriw kaskina ka tapwerimatcik Cecoca, acitc nataweritamawik, Kice Manito e kanawapamitakw, aka kitci kikatotcik itewiniw otci. Nama wiec irapatan e kikatonaniwok anihe otci. Matci aniki ka natotakik kata ki otci oniwirikowok.

¹⁵ Mantokaso kaskina e totaman, kitci mirerimisk Kice Manito e wapamisk, mitowi otamiro iriniw aka ka waneritak otamirowin e mirwacinik, wewerita tca e tipatcimoin Kice Manito otitewin e tapwemakanik.

¹⁶ Aka natota e aimihitonaniwok arotc kekocic otci, aka ka nahitak Kice Manito. Iriniwok ka pakitinitisotcik kitci ici arimwetcik eckam mocak kata rawowapamewok Kice Manitowa.

¹⁷ Mia akosiwin ka pamiparik e iteritakok okiskinohamakewiniwaw. Ekoni mitcet ka ici kiskinohamaketcik, mitowi Hyménée kirika Philète.

¹⁸ Ki paskewok, aka awocamec e kiskinohamaketcik tapwewiniw, e itetcik: “Ka nipotcik kaskina aci ickwa apitcipawok.” Oniwirewok mitcet iriniwa aka tca awocamec kitci nosanehwaritci Cecoca.

¹⁹ Aric kaskina Kice Manito ka otciparik nama mameckotciparin, mocak mackawisimakaniw, tarasak mia e miro manikaniwok, aka wiskat kitci pakitik mikiwam. Itasinatew neta micta asinik wir otci: “Wir tipirawe Teperitciketc kiskerimew otirinima.” Nombres 16.5 Kaie itasinatew kiapatc: “Kaskina awik ka itetc: ‘Ni nosanehwaw Teperitciketc,’ acteriw kitci atimikapowictak matci totamowiniw.”

²⁰ Micta mikiwamik, takon neta osawo coria orakan kirika coriawo orakan, ka kanaweritcitek kitci apatcitakaniwok tepirak makocan otci e kicteritakok. Takon kaie kotakihi orakana ka mictikowoki kaie ka asiniwoki, tato kickwa e apatcitakaniwok.

²¹ Peikon kaie kecpin awik e totak kitci maninikaterik aniheriw ka maratanik otehik, kata iteritakosiw kitci totak kekociciriw e kicteritakonik. Kata mirwapatisiw okimama otci, mitowi anihe orakan ka kicteritakok kitci iteritakositc, e ickwa aiketc kitci totak ka mirwacinik, kotc e icinakonik.

²² Ocimocta notc ka ici micta sakitatcik ka ocki pimatisitcik e maratanik. Mantokaso e nantowapataman miro itatisiwin, tapwetamowin, sakihiwewin, kirika pekateritamowin, kirika kaie wirawaw kotakihik ka pakoserimatcik Teperitcikeritci e pekitehetcik.

²³ Aka aric pamerita e kikatonaniwok, aka e sapinakok kekocic ka arimotcikatek kaie aka e apateritakok. Ki kiskeriten meka enko anihe ka otci matciparihitonaniwok.

²⁴ Awik ka atoskectawatc Teperitcikeritci, nama acteriw kitci kikamatc owitc iriniwa. Nitowatc acteriw kitci mirotehekatowatc kaskina awiriw, kitci kackitatc e kiskinohamaketc kaie aka kitci otake kiciwasitc kecpin e kiciwerimakaniwitc.

²⁵ Pekatc kata kiskinohamawew kaskina anihi aka ka nahitakotc. Pot kata witcihikowok Kice Manitowa pitoc kitci iteritakik kaie kitci ki kiskeritakik tapwewiniw.

²⁶ Kata tca waskamateritamok kitci wikotcihotcik e ki makonikowaspan Matci Manitowa, ka ki makonikotcik kitci totakik kaskina e iteritamiritci.