2 Timothée 1 - Kice Manito Ocki Omirwatcimowin

E arimikowakaniwitc Timothée

¹ Nin Pwar ka masinahamatan ohwe, Cecoc Krist otarotakana, Kice Manito e ki iterimitc kitci iteritakosiwak kirika kitci tipatcimowak aniheriw ocki pimatisiwiniw ka ki ici nespi tapwetc kitci miritokw kaskina e taciikw ka tapwerimokw Cecoc Krist.

² Ki masinahamatin, Timothée, e sakihitan, mia tipirawe nikosis e iterimitan. Ni pakoserimawok Kotawino Kice Manito kirika anahwe Ka Tiperimitokw Cecoc Krist kitci acotamaskik mirotehewiniw kaie okitimakeritcikewin acitc pekateritamowiniw.

E sokimakaniwitc Timothée

³ Mikwetc nit itaw Kice Manito, wir ka atoskectawak, mitowi nitaniskotape nimocomak ka ki atoskectawatcik, mocak e kiskeritaman nitehik e nosanetaian miro meskanaw. Mocak kit aiamihectamatin, e mekwa kicikak kaie e tipiskak.

⁴ Ni mikaweriten e ki matoin mamitcitc ka pe nakatitan. Mictahi ni nataweriten kiapatc minawatc kitci wapamitan, kitci ki micta mireritaman.

⁵ Mocak ni mikawin kitehik e otciparik e micta asperimototawotc Kice Manito, mia peikon nictam kokom Loïs kaie wir kikawi Eunice ka ki ici asperimototawatcik Kice Manitowa. Ni ketcinaweriten kaie kir anotc e ici asperimoin.

⁶ Ekoni wetci mikwasimitan kitci manatcitain anihe caweritcikan Kice Manito ka ki ici mirisk kitci atoskectawotc, ka ki mirikoin ka aiamihectamatan, ka takinitan.

⁷ Nama meka ki ki otci mirikono Omiro Manitoma kitci cakwerimoikw, aric kitci ki mackawerimokw, kitci ki sakihitoikw, kaie kitci ki miro nanakatcihitisoikw.

⁸ Aka wanerita kitci tipatataman aniheriw Ka Tiperimitokw ka ki totamiritci. Aka kaie wanerita nin e kipohokoian wir otci. Nitowatc ki ta ici naheriten kaie kir kitci nekatcitain Mirwatcimowin otci, e kiskeritaman kitci miriskw Kice Manito mackawisiwiniw ke wi apatcitain.

⁹ Wir ka ki akwacimitokw kirika ka ki wicamitokw otirinima kitci iteritakosiikw. Nama ki otci itotiskew osam e ki miro totamokw, aric tepirak osam e ki ici nataweritak kitci totak kirika e mirotehetc. Aci weckatc, epwamoci kiceritak askiriw, ki iteritamokopan kitci mirikoiak aniheriw omirotehewin, e pe iciticohwatc okosa Cecoc Krist.

¹⁰ Aci anotc tapwe ki ki wapatahikono aniheriw omirotehewin, e ki pe icatc Cecoc Krist, anahwe Ka Akwacimitokw. Wir ka ki pikotatc e asitci mackawisimakanikopanen nipowiniw, kirika ka ki miriwetc Omirwatcimowin kitci ki otci kiskeritcikaterik aniheriw pimatisiwiniw aka wiskat ke ickwaparinik.

¹¹ Kice Manito ni ki orapamikw kitci tipatcimowak aniheriw Omirwatcimowin, otarotakana e iteritakosiwak kaie e kiskinohamake iriniwiwak.

¹² Ekoni wetci ici nekatcitaian. Nama aric tekaci ni waneriten. Ni miro kiskerimaw meka anahwe ka asperimototawak. Ni kiskeriten kaie otcitakotc kitci kackitatc kitci kanaweritak aniheriw ka ki ici acotamawitc, nac takociparike anihe ke kicikak kitci tipaskonikaniwok.

¹³ Wewerita ki ka kanaweriten anihe tapwewin ka ki ici kiskinohamatan, mocak kaie kitci sakihiwein, kaie kitci asperimototawotc Cecoc Krist, kotc e ici pimatisinaniwok e mamweritakosinaniwok kirika wir.

¹⁴ Miro kanawerita anihe ka ki acotamakoin e apitc mirwacik. Miro Manito anahwe ka witci tacikemitakw ki ka witcihikw.

¹⁵ Ki kiskeritenatake aci kaskina ka taciketcik Asie askik ni ki nakatikok. Wawatc Phygèle kirika Hermogène, kaie wirawaw ni ki nakatikok.

¹⁶ Onésiphore tca mocak ni ki pe witcihikw. Nama ki otci waneritam e ki kipohokowak. Ni pakoserimon tca kitci cawerimikotcik Teperitcikeritci, wir acitc kaskina ka witci tacikemikotc.

¹⁷ Ka takocik ota Rome otenak ni ki nantowapamikw, nac e miskawitc.

¹⁸ Nit asperimon Teperitciketc kitci miro totawatc tipaskonikaniwonike. Ki miro kiskeriten kaskina wiec e ki totak kitci witcihitc nete ka tacikeiapan Éphèse otenak.