2 Pien 3 - Kice Manito Ocki Omirwatcimowin

Ki nespi tapwaniwon kiapatc kitci pe takocik Teperitciketc

¹ Nimiro nikwimesak, enko ohwe minawatc tec ka pe masinahamatakok. Wetci ki masinahaman e niciki nimasinahikan, e wi witcihitakok wewerita kitci ici mitoneritamekw,

² e mikawasimitakok weckatc ka ki pe aitetcik iriniwok ka ki pe nikan tipatcimotcik Kice Manitowa otci e kitcitwaweritakositcik, acitc aniheriw ka ki ici kiskinohamatakw Cecoc otarotakana, Teperitciketc otirakonikewiniw, anahwe Ka Ki Akwacimitokw.

³ Otcitakotc nictam ki ka kiskeritenawaw ohwe: kekatc ponaskiwoke, kata takociniwok iriniwok ke ici pimatisitcik wirawaw tipirawe e nataweritakik kitci otci pimatisitcik. Ki ka papirotakowawok,

⁴ kitci itetcik: “Ki itew Cecoc kiapatc minawatc kitci pe icatc, tapwe ni? Tante tca e taciketc anahwe? Esko ka poni pimatisitcik kitaniskotape kimocominowok, mocak peikon iciwepan kaskina ota askik, peikon icinakon esko ka kiceritcikatek,” e itetcik.

⁵ Otcita totamok aniki kitci oniketcik ohweriw: aci weckatc Kice Manito ki kiceritam kaskina e ici takonik askik, peikon kaie nte waskok, otitewin e ki totak. Ki oreritam taci ke ici takonik askiriw, neta weckatc tepirak nipiriw e ici takonikipan. Kaie nipiriw ki apatcitaw ka ocitatc askiriw.

⁶ Peikon kaie nipiriw ki nipahikowok weckatc iriniwok ota askik, apitc tekaci ka riskipoterik askiriw.

⁷ Anotc aski e takok acitc waskok, kaskina kanaweritcikatew, peikon osam e ki itetc Kice Manito kitci ici kanaweritcikaterik, nikotin tekaci kitci oraparinik kitci tcakaskisikaterik. Wetci mekwata kanaweritcikaterik, aniheriw ke kicikarik otci kitci tipaskonakaniwitcik kaskina aka ka kicterimatcik Kice Manitowa acitc kitci niponerimakaniwitcik.

⁸ Peikociniw aric e kicteritakok, nimiro nikwimesak, otcitakotc aka kitci onikeiekw ohwe: wir Teperitciketc e ici wapatak, e peikwo kickokarik mia peikon e peikwaw kice mitato mitana tato piponikarik kitci iteritakonik, kaie peikwaw kice mitato mitana tato pipona mia peikon e peikwo kickokarik.

⁹ Nama niramisiw Teperitciketc kitci totak ka ki ici nespi tapwetc kitci totak. Otcitakotc kata otcitcipariniw, misawatc atita pitoc e iteritakik. Mictahi ciciperitam kirawaw otci. Nama otci peikw natawerimew kitci oniciniritci. Nataweritam meka kitci miroparinik kaskina kitci atimikapowictamiritci ka maratanik.

¹⁰ Keskat aric kata pe takocipariniw aniheriw okicikom Teperitciketc, mia mitowi kimoti iriniw keskat e pe takocik. Ani apitc tekaci nama kata takon kekocic icpimik. Keskat kata tcakickamakan e koctasitakok. Kicikaw pisimw, tipiskaw pisimw kaie atcikocak tekaci kata tcakaskisowok. Aski kaie kaskina e ici takok ota askik kata ickwa takono.

¹¹ E kiskeritakok tca kaskina kitci ici oraparik, ki ta miro nisitotenawaw tan e ici actek kitci totamekw! Actew icikowiskw kitci ici pimatisiekw, acitc mocak kitci miro nosanehwekw Kice Manito.

¹² Ki ta petawanawaw okicikom, e mantokasoekw wipatc kitci pe takociparinik. Ekoni apitc ke tcakaskiterik icpimik e ici takonik. Ke apitc kiciterik, kata sosowok kicikaw pisimw, tipiskaw pisimw kaie atcikocak.

¹³ Aric Kice Manito ki nespi tapwew ocki askiriw acitc ocki kitci takonik waskok, tepirak icikowisk ke ici pimatisinaniwonik. Enko anihe kaskina ka petaikw.

¹⁴ Nimiro nikwimesak, ekoni wetci kicteritakok, mekwata e petaiekw kitci pe takociparik anihe e kicikak, kitci mantokasoekw tekaci kitci mirwinakosiekw kitehiwak acitc aka kitci takok ke ki otci itactahorikoiekw, icikowisk kitci ici wapamitakw Kice Manito, acitc mocak kitci miroparihitoekw.

¹⁵ Mamitoneritamokw wetci miroparik kitci ki akwacimikoiekw: osam e ciciperitak anahwe Ka Tiperimitokw. Enkweriw ni peikon ka ki ititakw ka masinahamatakw kiwitcicanino Pwar e sakihokw. Ki ki masinahamakowaw e omiro omitoneritcikanitc, Kice Manitowa e ki mirikotc aniheriw miro mitoneritcikaniw.

¹⁶ Ekoni peikon ka ici masinahiketc kaskina omasinahikanik, ohweriw e arimotak. Takoniw neta omasinahikanik e arimanik kitci ki nisitotcikaterik. Iriniwok aka orina kekociciriw ka kiskeritakik kaie aka ka sokikapowitcik, pitoc itemakatwawok aniheriw ka wi aitetc Pwar omasinahikanik, peikon e totakik kotakeriw e itasinaterik Kice Manito Omasinahikanik. Wirawaw tipirawe ka totatisotcik wetci onicikik.

¹⁷ Aric kirawaw nimiro nikwimesak, aci ki ki nakasomitinawaw. Nanakatcihitisokw tca aka kitci paskewirikoekw otitatisiwiniwaw iriniwok aka ka natotawatcik Kice Manitowa, kaie kitci onitaiekw e ici sokikapowiekw.

¹⁸ Ekoci kiapatc mocak omirotehewinik itekera kitci ici matcaiekw anahwe Ka Tiperimitokw Cecoc Krist, Ka Ki Akwacimitokw, eckam kaie kitci iti kiskerimekw. Nespitc kitci icperimakaniwitc, anotc kaie kakike! Kekora ki iki. Nin Pien