2 Pien 2 - Kice Manito Ocki Omirwatcimowin

Arotc ka ici kiskinohamaketcik

¹ Weckatc ki pe tawakopan iriniwok arotc e ki pe nikan tipatcimoctawatcik Israël iriniwa. Peikon kaie kotakihik kata tawok neta e ici tacikeiekw arotc ke pe nta kiskinohamaketcik. Kiraskiwiniw kata petawok ke ki otci onicinaniwonik. Kata wepakonewok Teperitcikeritci ka ki akwacimikotcik. Wipatc tca kata onicimitisowok.

² Mitcet iriniwa kata nosanehikowok e maratanik otitatisiwiniwaw. Kata tca otci mareritcikateriw aniheriw meskanariw tapwewinik ka iticimonik, ani e itatisitcik.

³ Ki ka wecimikowawok aniki arotc ka kiskinohamaketcik e kiraski atisoketcik, tepirak e sakitatcik coriariw. Aci weckatc nisawinaniwoniw kitci anwerimakaniwitcik, nama kinowec kitci onicikik.

⁴ Nama meka ki otci manatcihew Kice Manito anahweriw aceriwa weckatc ka ki pactatiritci. Atamaskamikok ki iciwepinew kitci kanawerimakaniwiritci e takopitakaniwiritci, nete e ici kiski tipiskarik nac mamitcitc kitci tipaskonikaniwonik.

⁵ Nama kaie ki otci manatcihew weckatc iriniwa, e ki iteritak kitci riskipoterik e irikokoskamikarik, e mitcetirikopanen iriniwa ota askik ka matcatikosirikopanen. Atita tepirak ki wikotcihew: peikw anahwe iriniw Noé ki icinikasoriw ka ki pe tipatatamiritci otipatcimowin, icikowisk e icinakonik, acitc nicowaso kotakihi iriniwa.

⁶ Minawatc Kice Manito ki anweritam aniheriw otenariw Sodome kirika Gomorrhe ka icinikaterik. Ki tcakaskisam aniheriw otenariw, ickoteriw e ki pakitinak. Ekoni ka totak kitci wapatahiwetc ke iti iciwepasiritci ka matci iriniwiritci.

⁷ Peikw iriniwa e miro iriniwiritci ki wikotcihew, Loth e icinikasoritci. Arimeritamokopan anahwe Loth e wapamakopanen owitc iriniwa arotc e ici pimatisiritci, tekaci aka e nosanetaritci miro meskanariw.

⁸ Wapamekopan kaie petawekopan e totamiritci, mocak e witci tacikemakopanen. E apitc maratanik e ici pimatisirikopanen, nekateritamihikopan anahwe Loth, wir icikowisk e iteritakipan otehik.

⁹ Ekoni wetci kiskeritakok e kiskeritak Teperitciketc ke totawatc iriniwa ka nosanehikotc kitci ki wikotcihatc e nakickamiritci nekatcitawiniw. Kiskeritam kaie ke totak kitci kicakonatc iriniwa ka matci totamiritci, takociparinike aniheriw ke kicikarik kitci tipaskonikaniwonik.

¹⁰ Kata kicakonew picicikw anahweriw tepirak ka nosanetaritci matci totamowiniw, aniheriw e ici nataweritakik iriniwok ka maratanik, kaie anahweriw ka cikeritamiritci kitci tiperimikoritci Kice Manitowa. Tekaci nama cakwerimowok aniki arotc ka kiskinohamaketcik. Kicterimowok. Nama kicterimewok anahweriw ka icperitakosiritci. Marerimewok.

¹¹ Wawatc aceriwok, wirawaw kirawe e mackawisitcik patok anahweriw arotc ka kiskinohamakeritci, kirawe kaie e sokerimotcik, nama itactahorewok kitci marerimatcik, mekwata e natcikapowictawatcik Teperitcikeritci.

¹² Aniki arotc ka kiskinohamaketcik pokona aitotamok, mia awesisak ka nitawikitcik kitci makonakaniwitcik nac kitci nipahakaniwitcik. Mareritamok aniheriw aka ka nisitotakik. Kata nipahakaniwiwok mia awesisak e totawakaniwitcik.

¹³ Ekoni ke ici otapinamatisotcik kitci arimiparitcik, e ki matci totakik. Wawatc mekwata e kicikarik mireritamok e matci totakik wa ici nataweritakik. Waneritakoniw e pe icatcik neta e ici mitcisoekw. Nama cakwerimowok peikon e totakik kaskina wa totakik neta.

¹⁴ Mamitoneritamok kitci pacikwatisitcik e kanawapamatcik iskwewa. Nama tipi iteritamok e pactatitcik. Paciwirewok iriniwa aka ka sokikapowiritci. Pasoweritamok otehiwak kitci ici tatakik kotakihi iriniwa e ici tatamiritci. Nikotin kata anwerimikowok Kice Manitowa.

¹⁵ Ki paskewok miro meskanariw. Ki oniciniwok, mitowi weckatc iriniw ka pimatisikopanen, Balaam ka icinikatakaniwikopanen, Bosor anihi okosa, orina ka sakitakopanen coriariw e ki kanewitc e matci totak.

¹⁶ Ki kitotakaniwiw aka e ki otci sapitowatc Kice Manitowa. Atikocic aka ki arimwetc keska ki arimwew, mia irinik e ititakositc. Ki witamawew anihi Balaama kitci ponitaritci aniheriw ka totamiritci e pisinatisiritci. Ki sapitako.

¹⁷ Aniki iriniwok mia peikon moskitciwonipekw e pactek iteritakosiwok, mitowi kaie osko ka pamactak e rotik. Takoniw wiec ka mawotci kiski tipiskarik ka ici kanaweritamakotcik Kice Manitowa.

¹⁸ Micta mirwatcimitisowok, aka wiec e irapatanik aniheriw ka aitetcik. Matci totamowiniw apatcitawok, notc e ici nataweritakik iriniwok ota askik e mawotci waneritakonik, kitci ki paskewiratcik iriniwa pitceraka ka ki kackihoritci nta e ici pimatisirispana ka ici maratanik, e ki pa witcewaritci matci iriniriw.

¹⁹ Nespi tapwewok e itatcik otcitakotc aka awocamec kitci tiperitakosiritci, aric wirawaw tipirawe e tiperimikotcik matci pimatisiwiniw nac nipowinik kitci ici matcewirikotcik. Tato iriniw meka tiperimiko aniheriw ka cakotcihikotc.

²⁰ Tapwe wirata tawok aci ka ki kackihotcik aniheriw matci meskanariw ka nosanetawaspan ka oniwiriwemakanik, notc e ici pimatisiritci iriniwa aka ka nosanehwaritci Kice Manitowa. Ki kackihowok osam e ki kiskerimatcik anihi Ka Tiperimitokw, Cecoc Krist, Ka Ki Akwacimitokw. Minawatc aric ki pakitinitisowok kitci tiperimikotcik matci pimatisiwiniw kaie kitci cakotcihikotcik, nac kirawe arimipariwok patok e asitci arimipariwaspan epwamoci kiskerimatcik Cecoca.

²¹ Kirawe kata ki miroparinipan aka wiskat kitci ki otci kiskeritakwapan miro meskanariw, patok e ki kiskeritakik, minawatc e ki atimikapowictakik aniheriw irakonikewiniw e kitcitwaweritakonik ka ki kiskinohamawakaniwitcik.

²² Aniheriw ka iciwepasitcik, ekoni ka otci kiskeritakonik e tapwemakanik ka itwaniwonik: “Atimw koski mitciw ocicecikokwan.” Kaie: “Kokoc e ickwa kisisiparakaniwitc icaw minawatc e nta cicocimorotc acickik.”