2 Pien 1 - Kice Manito Ocki Omirwatcimowin

Pien e arimikowatc okwimesa

¹ Nin Simo Pien ka masinahamatakok, Cecoc Krist e atoskectawak, otarotakana e iteritakosiwak. Ki masinahamatinawaw, kaie kirawaw ka ki pe otitikoiekw tapwetamowin e micta mirwacinik, mia peikon e asitakok kaie ninan ka ki ici otitikoiak, Cecoc Krist e ki totak kitci icinakonik, icikowisk e iteritakositc, wir Kikice Manitomino acitc Ka Ki Akwacimitokw.

² Ni pakoserimon nipara kitci acotamakoiekw mirotehewin acitc pekateritamowin, osam tapwe e kiskerimekw Kice Manito kaie anahwe Ka Tiperimitokw Cecoc.

Kirawe kitci miro kiskerimakaniwitc Cecoc

³ Omackawisiwin ki apatcitaw Teperitciketc, Kice Manitowa ka ki mirikotc, kitci ki miritokw kaskina ke wi apatcitaikw kitci miro nosanehwimokw Kice Manitowa. Ki ki kiskeritamihikono anihi meka ka ki wicamitokw kaie kirano kitci icperitakosiikw mia wir e icperitakositc, kaie kitci mirwasiikw, mia wir e mirwasitc.

⁴ Ekoni ka otci acotamatokw aniheriw ka ki nespi tapwetc kitci miriwetc e kicteritakonik kaie e kice mirwacinik. Otitikoekwe tca, aka kitci paskewirikoekw kekwan notc ko ka ici nataweritakok ota askik ke ki oniwirikoekw, acitc mia wir kitci ki iteritakosiekw.

⁵ Ekoni wetci kicteritakok nictam kitci mantokasoekw kitci asperimototawekw Kice Manito, minawatc kitci miro totamekw, kirika eckam tapwe kitci kiskerimekw,

⁶ kaie kitci nanakatcihitisoekw e itatisiekw, acitc aka kitci pakiterimitisoekw, minawatc mocak kitci miro nosanehwekw Kice Manito,

⁷ kirika kitci mirotehectatoekw e owitcicanitoekw, kaie kitci sakihitoekw.

⁸ Kecpin eckam ici pimatisiekwe, ki ka witcihikonawaw kitci mirwapatisiekw e atoskectawekw anahwe Ka Tiperimitokw, Cecoc Krist, kaie eckam kitci miro kiskerimekw.

⁹ Aric kecpin awik aka itatisite, kata iteritakosiw mia iriniw aka ka wapitc, tekaci aka kekociciriw e rawowapatak. Onikew aci e ki kasihamawakaniwitc ka ki ici pactatitc.

¹⁰ Ekoni wetci kicteritakok, niwitcicanak, kaketin kiapatc kitci mantokasoekw otcitakotc kitci miro kiskeritcikatek, e wapatcikatek e itotiskeiekw, tapwe e ki wicamitakw Kice Manito kitci nosanehwekw, acitc e ki orapamitakw, otirinima kitci iteritakosiekw. Kecpin meka ani totamekwe, nama wiskat ki ka pakicininawaw e ici maratak.

¹¹ Ekoni kaie ke otci mireritcikatek kitci mirikoiekw kitci pitakeiekw Okimawinik aka wiskat ke ickwaparinik, aniheriw Okimawin anahwe Ka Tiperimitokw Cecoc Krist, anahwe Ka Ki Akwacimitokw.

¹² Ekoni mocak ke otci mikawasimitakok anihe ka aiarimotaman ota, misawatc aci e miro kiskeritamekw, acitc misawatc anotc e mackawisiekw e sokikapowiekw neta tapwewinik, anihe tapwewin ka ki pe otitikoiekw.

¹³ Actew, nit iteriten, mocak kitci mikawasimitakok, kirike ma irikik ke pimatisian.

¹⁴ Ni kiskeriten meka aci kekatc kitci poni pimatisian, kotc ka ki witamawitc anahwe Ka Tiperimitokw Cecoc Krist.

¹⁵ Ni ka mantokason tca kitci witcihitakok, misawatc ickwa poni pimatisiane, mocak kitci mikaweritamekw ohwe anotc ka pe iteian.

Aniki ka ki wapamatcik Cecoca e ici icperitakosiritci

¹⁶ Namaiew ni atisokan ninan tipirawe ka ki ocitaiak, ka ki witamatakok, ka arimotamatak anahwe Ka Tiperimitokw, Cecoc Krist, e ki pe takocik ota askik e mackawisitc. Ninan tipirawe ni ki wapatamwanan omackawisiwin e wasiterik.

¹⁷ Kicteritakosiwiniw kaie icperitakosiwiniw ki miriko Kotawinowa Kice Manito, ka pe otewetak e itikotc anihi ka mawotci icperitakosiritci: “Enko ohwa nikosis. Ni micta sakihaw, kaie ni mirerimaw.”

¹⁸ Ninan tipirawe ni ki petenan anihe oskok ka ki otci otitakok, tapickotc ka tacikeiak nete matinak ka kitcitwaweritakok kirika wir.

¹⁹ Ekoni kirawe ka otci kiskeritamokw e tapwemakanik aniheriw ka ki ici tipatatakik iriniwok weckatc ka ki pe nikan tipatcimotcik Kice Manitowa otci. Ki ta miro natotamwanawaw aniheriw otipatcimowiniwaw. Mirwapataniw meka, mia mitowi wactenamakaniw e actakaniwonik wiec e ici tipiskarik e waskorerik, nac kitci pe wasearik e kicepawonik. Miro natotamwokw tca ka ki ici tipatatakik, nac kaie kitci pe waseasiketc wapan atcikoc kitehiwak.

²⁰ Wewerita ki ta kiskeritenawaw ohwe nictam: nama awik kackitaw wircike kitci kiskeritak wa itemakanik ka ici nikan tipatcitcikaterik Kice Manito Omasinahikanik.

²¹ Nama meka wiskat ki otci ispariniw iriniwok kitci nikan tipatcimotcik Kice Manitowa otci tepirak irinik kitci otciparinik, osam aric Miro Manitowa e ki mirikotcik ka ki aitetcik e tipatatakik Kice Manitowa otipatcimowiniw.