2 Jean 1 - Kice Manito Ocki Omirwatcimowin

Jean e arimikowatc iriniwa ka masinahamowatc

¹ Nin Kice iriniw. Ki masinahamatinawaw kir Iskwew, Kice Manito ka ki orapamisk, kirika kinitcanicak, tapwe e micta sakihitakok. Namaiew nin tepirak ka sakihitakok, aric kaie wirawaw ki sakihikowawok kaskina ka kiskeritakik tapwewiniw.

² Ki kanaweritenano meka kitehinak anihe, nespitc kaie kata takon.

³ Ni nataweritamawawok Kotawino Kice Manito kirika Cecoc Krist, Kice Manito Okosa, mirotehewiniw kitci acotamatokok, acitc kasihamakewiniw kaie pekateritamowiniw, mocak tapwewinik kitci ici pimatisiikw kirika osakihiwewinik.

Tapwewin kirika sakihiwewin

⁴ Ni ki micta mireriten ka petakeian atita kinitcanicak e nosanetatcik tapwe miro meskanariw, kotc ka ki ititokw Kotawino kitci itotiskeikw.

⁵ Ohwe tca minawatc ki witamatin, Iskwew, e micta sakihitan: sakihitotan kaskina e taciikw. Namaiew ocki irakonikewin ka witamatan. Enko ohwe peikon irakonikewin aci ka ki witamakoikw esko kaskina ki kitciparik.

⁶ Ekoni e icinakok sakihiwewin: kitci pimoteikw Kice Manito omeskanamik, kotc e ici nataweritcikaterik otirakonikewin. Enko tca anihe irakonikewin ka ki petamekw esko kaskina ki kitciparik: sakihiwewinik kitci ici pimoteikw.

⁷ Mitcetiwok ka pa wecimiwetcik ota askik. Nama wi tapwetamok tapwe e ki pe iriniwiritci Cecoc Krist. Ekoni ka otci kiskeritakositc anahwe ka wecimiwetc kaie ka iteritakositc “Anahwe ka wi naskowatatc Krista.”

⁸ Nanakatcihitisokw tca, aka kitci onitaiekw ka ki ici otamirotaiekw, aric ma kitci mirikoiekw kaskina ka ki ici kackitamatisoekw.

⁹ Anahwe aka awocamec ka nosanetawatc e ici kiskinohamakeritci Cecoca, kotakeriw tca kiskinohamakewiniw e nosanetatc, nama mamweritakosiw kirika Kice Manitowa. Anahwe tca kiapatc ka nosanetawatc Cecoca okiskinohamakewiniw, mamweritakosiw kirika Kotawinowa acitc Okosa.

¹⁰ Kecpin awik e natawapamitakw, aric pitoc e ici kiskinohamaketc, akawir pakitinakw kitci witci tacikemitakw. Nama wawatc ki ta mireritenawaw kitci arimikowekw.

¹¹ Anahwe meka ka arimikowatc anihi towi iriniwa, witcihew e matci totamiritci.

Mamitcitc ka wi itetc Jean

¹² Kiapatc mitcen kotak kekocic ka wi witamatan, kirawe aric ni nataweriten aka kitci ici masinahaman. Nit asperimon kitci natawapamitakok, nin tipirawe kitci aimihitakok, tapickotc tca kitci micta mireritamokw.

¹³ Kaie wirawaw Kimis onitcanica, kaie wir ka ki orapamikotc Kice Manitowa, kaskina kit arimikakowawok. Nin Jean