1 Timothée 5 - Kice Manito Ocki Omirwatcimowin

Ke ici mihakaniwitcik ka tapwerimatcik Cecoca

¹ Pekatc ki ka aimihaw kice iriniw, nama ki ka kakeskimaw. Ki ka wikosimaw mia peikon tipirawe kotawi. Peikon kaie ockinikiwok, mia peikon kiwitcicanak ke totawotcik.

² Peikon kaie iskwewok ka kiceatisitcik, mia peikon kikawi ke totawotcik. Ki ka kicterimawok ocki iskwewok, mia kiwitcicanak ke totawotcik, aka kitci matci mamitonerimatcik, wewerita kitci iterimatcik.

³ Kicterimik kaie mihik cikawok, aniki tapwe ka peikocitcik.

⁴ Aric cikaw e tarikwena onitcanica kekotc ma osima, acteriw kitci wapatahiweritci e ici tapwerimaritci Cecoca, kitci tca miro miharitci onihikikowawa. Ani e totakik koski mirewok onikihikowawa kaie okice onikihikowawa e ki pe miro mihikotcik ka apicicitcik. Mireritam meka Kice Manito e wapatak ani e totcikaterik.

⁵ Aric cikaw tapwe ka peikocitc, aka ka taritci awiriwa ke nakatawerimikotc, asperimototawew Kice Manitowa. Nama ponitaw e pakoserimatc, tato kickwa kaie tato tipiskwa e nataweritamawatc kitci witcihikotc.

⁶ Kecpin aric cikaw tepirak e mamitonerimitisotc kitci mireritamihitisotc, mia e nipotc otcitcakocik itekera iteritakosiw, misawatc e pimatisitc.

⁷ Enko ohweriw ke mikawasimatcik, aka kitci takonik ke ki otci itactahorakaniwitcik e ki matci totakik, icikowisk e itatisitcik.

⁸ Kecpin awik aka nakatawerimate otcirowemakana, picicikw anahweriw ka witci tacikematc, mia e ki atimikapowictak otasperimowin e iteritakositc. Kirawe wir matci totam patok aniki aka ka tapwerimatcik Kice Manitowa.

⁹ Nama ki ka actawan cikaw oticinikasowin neta cikawok ka ici masinasotcik kitci mihakaniwitcik, kecpin aka moci nikotwaso mitana tato piponesite. Acteriw tepirak peikwaw ka nipowitc,

¹⁰ kaie kitci kiskeritakositc mocak e ki pe miro totak, kaie wewerita e ki mihatc onitcanica mekwata e matcekiritci, acitc wewerita e ki mihatc owitc iriniwa omikiwamik ka pe kiwotamikotc, kirika e ki kisisipatcisitenatc owitc iriniwa ka tapwerimaritci Cecoca, kaie e ki witcihatc owitc iriniwa e arimipariritci, acitc mocak e ki miro totak e pa witcihiwetc. Aniheriw e ki pe miro totak matci kata ki masinahwakaniwiw cikaw masinahikanik kitci witcihakaniwitc.

¹¹ Aka masinahwik neta masinahikanik cikawok ka ocki pimatisitcik. Atita nta e tacitcik atimikapowictawewok Cecoca, osam mictahi e nataweritakik minawatc kitci nipowitcik, misawatc e ki nespi tapwetcik aka minawatc kitci koski nipowitcik, kitci ki tca atoskectawatcik Cecoca.

¹² Wirawaw tipirawe totamok kitci anweritakositcik, e pikopitakik aniheriw nictam ka ki ici nespi tapwetcik.

¹³ Ekoni kaie wetci iteian aka kitci masinahwakaniwitcik kitci nakatawerimakaniwitcik, osam atita nta e tacitcik nama tipi takoniw ke itotisketcik. Iti pa kiwotewok ko mikiwamiskak. Matci awocamec aitotamok ka maratanik, pamatisokewok aka kitci pameritakwapan kotakihi e ispariritci. Aiarimotamok kekociciriw aka ka acterik kitci pameritakik.

¹⁴ Ekoni wetci nataweritaman ka ocki pimatisitcik cikawok kitci koski nipowitcik kaie kitci onitcanicitcik, acitc kitci miro mitatcik omikiwamiwaw, aka tca kitci ki takonik ke itawikok aniki ka wi itactahoritokok.

¹⁵ Aci meka atita cikawok ki ickwa atimikapowictamok icikowisk meskanariw, Matci Manitowa e nosanehwatcik.

¹⁶ Kecpin iskwew ka tapwerimatc Cecoca e tcirowematc cikawa, acteriw kitci mihatc. Nama kata pakitinew kotakihi ka tapwerimaritci Cecoca kitci miharitci anihi otcirowemakana. Aniki tca kotakihik ka tapweritakik matci kata ki pe nta witcihewok cikawa tapwe tekaci ka peikociritci.

¹⁷ Minawatc aniki ka nikaniwitcik ka miro mihatcik kotakihi ka tapweritamiritci, kackitamatisowok kitci kicterimakaniwitcik kaie wewerita kitci kicikowakaniwitcik, picicikw aniki ka kosikonik otamirowiniwaw e kakeskwetcik acitc e kiskinohamaketcik Kice Manito otitewiniw.

¹⁸ Itactew Kice Manito Omasinahikanik e itemakak: “Ki ka mirawaw awesis ke mitcik, mekwata e otamirohatc mirominickwa,” Deutéronome 25.4 kirika itemakan: “Acteriw kitci ici mirakaniwitc awik tan e ici kanewitc e otamirotc.”

¹⁹ Minawatc kecpin awik itactahorate iriniwa ka nikaniwiritci e ki matci totamiritci, kecpin aka nicitawe kekotc nictotawe iriniwok kaie wirawaw ka ki wapatakik aniheriw ka ici itactahorakaniwiritci, nama ki ka tapwetowaw.

²⁰ Kecpin aric tapwe e anweritakositc awik e ki matci totak, ki ka kakeskimaw neta e ici mawotcihitotcik iriniwok ka tapwerimatcik Cecoca, kitci kiskeritakik kaie wirawaw aka kitci matci totakik.

²¹ Ki nataweritamatin wewerita, Kice Manito kaie Cecoc Krist otci, kaie aceriwok e kitcitwawisitcik, kitci natotaman kaskina ka ititan kitci itotiskein ota nimasinahikanik, aka tepirak atita kirawe kitci kicterimatcik patok kotakihik, kaie aka tepirak atita kirawe kitci miro mihatcik.

²² Aka wewepitwa kitci miratc awik kitci atoskectawatc Teperitcikeritci, kitci tca takinatc kitci aiamihectamowotc kitci irapatisitc. Aka pimote e ici pactatitcik kotakihik aka kaie kir kitci posipariin e ici matcewiriwemakak pactatowin. Mocak nanakatcihitiso aka kitci takok ka maratak kitehik.

²³ Ponita tepirak nipi e minikwein. Memantcic minicapo ki ta minikwan kitci miro miparik kimitcimim, mocak meka ki wi akosin.

²⁴ Atita iriniwok opactatowiniwaw miro nokoniw epwamoci tipaskonakaniwitcik. Aric kotakihik iriniwok patima kata tipaskonakaniwiwok epwamoci kiskeritakonik ka ki ici pactatitcik.

²⁵ Peikon kecpin iriniwok e miro totakik miro nokoniw. Kaie misawatc aka wipatc e nokonik, nama kinowec kata ki katcicteriw.