1 Timothée 4 - Kice Manito Ocki Omirwatcimowin

Arotc ka kiskinohamaketcik

¹ Miro Manito wewerita ki itew: apitc kekatc ponaskiwonike, atita iriniwok kata pakiteritamok otapwetamowiniwaw, kitci tca natotawatcik matci manitowa ka oniwiriweritci, kaie kitci natotakik matci kiskinohamakewiniw ka otciparinik anahweriw matci manitowa.

² Kata pakitinitisowok kitci oniwirikotcik iriniwa ka miro iriniwikasoritci kirika ka kiraskiritci, aka e mana totamiritci kitci kiskeritamiritci ka mirwacinik kaie ka maratanik. Mitowi kecpin peikw iriniw e ickwasotc piwapiskoriw e ki kicapiskiterik, omitoneritcikan iti nipomakaniw e ki ickwasikaterik.

³ Aniki iriniwok arotc kiskinohamakewok e itwetcik “nama mirwacin e nipowinaniwok,” kaie e itetcik “nama ki ka ki mitcinawaw atita mitcim.” Aric Kice Manito ki kiceritam mitcimiriw iriniwa otci ka kiskeritamiritci tapwewiniw kitci mitcisoritci, mikwetc kitci itikotc.

⁴ Kaskina ka ki ici kiceritak Kice Manito mirwaciniw; nama acteriw kitci itwaniwonik “nama mirwacin,” kecpin mikwetc itokwe ka ici miritokw.

⁵ Kaskina meka mirwinam, kecpin e aiamihectamwokw aniheriw, Kice Manito otitewin e apatcitaikw.

Iriniw ka miro atoskectawatc Cecoca

⁶ Kecpin ohwe witamawote kiwitcicaninowok, ki ka miro atoskectawaw Cecoc Krist, kirika kata otci kiskeritakon e otci mackawisihikoin, e sokeritaman Kice Manito otitewin acitc e nosanetain miro kiskinohamakewin.

⁷ Wepina atisokewina aka ka nahitak Teperitciketc. Mantokaso mocak kitci miro nosanehwotc Kice Manito.

⁸ Kecpin awik e cacipitc, tapwe wirata witcihitiso. Kecpin aric e nosanehwatc Kice Manitowa, nama tepirak anotc witcihakaniwiw. Kata kakike witcihakaniwiw, anotc mekwata kitci miro pimatisitc, acitc nikotin kitci kakike pimatisitc.

⁹ Ketcinaweritakon ohwe ka iteian, e tipi mirwapatak kaskina awik kitci natotakik.

¹⁰ Tapwe wirata, ekoni anotc wetci mantokasoikw kaie wetci kaketin otamiroikw, osam e asperimototawokw Kice Manito, anahwe ka pimatisitc kaie Ka Akwacimatc kaskina iriniwa, picicikw anahweriw ka tapwerimikotc.

¹¹ Enko anihe kaskina ke witamakein kaie ke kiskinohamakein.

¹² Nama acteriw awik kitci tipiterimisk tepirak e awaciwotc. Aric ki ta itatisin, kaskina ka tapweritakik kitci kiskeritakik ke ici pimatisitcik kaie wirawaw e wapamiskik: mocak kitci miro arimwein, icikowisk kitci itatisiin, mocak kitci sakihatcik kiwitc iriniwok, mocak kitci asperimototawotc Kice Manito, acitc tekaci kitci pekitehein.

¹³ E pehiin kitci takocinian, mantokaso mocak kitci tapwatcikectamowotcik iriniwok Kice Manito Omasinahikaniw, mocak kitci wikosimatcik kaie kitci kiskinohamawotcik.

¹⁴ Aka pakiterita anihe caweritcikan ka ki mirikoin, ani apitc ka arimwetcik ka nikan tipatcimotcik ka ki ici mirikoin, acitc aniki ka nikaniwitcik ka aiamihectaskik ka takiniskik.

¹⁵ Mantokaso kaskina anihe kitci totaman, e irikokotehein kitci ici atoskectawotc Kice Manito. Kaskina tca awik kata kiskeritamok eckam e miro nosanetain Kice Manito omeskanam.

¹⁶ Aiekwaminitiso kaie nanakatcita e ici kiskinohamakein. Sokikapowi neta. Kecpin itotiskeine, kir tipirawe ki ka akwacimikowin, kaie aniki iriniwok ka natotaskik kata akwacimakaniwiwok.