1 Timothée 3 - Kice Manito Ocki Omirwatcimowin

Ka nikaniwitcik

¹ Ki ketcinaweritenano ohwe: kecpin awik iteritake kitci nikaniwitc iriniwa otci ka tapwerimaritci Cecoca, miro otamirowiniw ka nataweritak.

² Anahwe ke nikaniwitc, acteriw kitci miro iriniwitc, aka kitci takonik ke ki otci itactahorakaniwitc e ki matci totak. Patoc kata peikohew iskwewa. Nama kata osameritakosiw. Pekatc kata pimatisiw. Kata kicterimakaniwiw e miro totak. Kata miro mihew owitc iriniwa e pe kiwoteritci omikiwamik, kaie kata kackitaw e kiskinohamaketc.

³ Nama orina kata minikwew, nama kaie kata akwatisiw. Kata pekatisiw, kaie nama kata otake kikawotam. Nama orina kata sakitaw coriariw.

⁴ Kata kackitaw kitci miro mihatc kaskina ka witci tacikemikotc, kitci tca sapitakotc onitcanica acitc tekaci kitci kicterimikotc.

⁵ Kecpin meka awik aka e kackitatc e mihatc anahweriw ka witci tacikemikotc, nama kata kackitapan kitci nakatawerimatc iriniwa ka tapwerimaritci Kice Manitowa.

⁶ Nama ki ka araw awik kitci mihitakw kecpin aka weckatc ka otci tapwerimakwen Cecoca. Kecpin arate matci kata kicterimopan, nac kitci anwerimakaniwispan, mitowi Matci Manito ka ki isparitc.

⁷ Acteriw kaie kitci ici pimatisitc kitci kicterimikotc iriniwa aka ka tapwerimaritci Cecoca. Kecpin aka ani totake, kata takoniw ke otci marerimakaniwitc, kitci otci oniwirikotc Matci Manitowa.

Ka atoskectawatcik iriniwa ka tapwerimaritci Cecoca

⁸ Kaie wirawaw ka atoskectawatcik ka tapwerimaritci Cecoca acteriw kaie wirawaw kitci itatisitcik kitci kicterimakaniwitcik acitc otehiwak kitci otciparinik kaskina e aitotakik. Nama kata micta minikwewok minicaporiw, nama kaie kata wecimewok iriniwa kitci otci ocoriamitcik.

⁹ E irikokotehetcik kata tapwetamok kiskinohamakewiniw, Kice Manito ka ki miritokw kitci kiskeritamokw, mocak kaie kitci kiskeritakik otehiwak e ki miro totakik.

¹⁰ Acteriw wewerita kitci nta kiskerimakaniwitcik. Kecpin aka e takonik ke ki otci itactahorakaniwitcik, matci kata ki atoskectawewok ka tapwerimaritci Cecoca.

¹¹ Okomiwawa kaie mocak kata itatisiriwa kitci kicterimakaniwiritci, aka kitci pa nta arawotcimoritci kitci mareritcikeritci. Nama kaie orina kata minikweriwa acitc mocak kata ki asperimototawakaniwiriw wiec e iciwepanik.

¹² Anahwe ka atoskectawatc ka tapwerimaritci Cecoca, tepirak kata peikohew iskwewa, kaie kata kackitaw wewerita e mihatc onitcanica acitc kaskina ka witci tacikemikotc.

¹³ Kaskina wewerita ka atoskectawatcik ka tapwerimaritci Cecoca kackitamatisowok kitci kicterimakaniwitcik, kaie sokitehewok e ici asperimototawatcik Cecoca.

Anihe ka ki katcictek, aci anotc ka kiskeritamokw

¹⁴ Ki masinahamatin ohwe masinahikan mocak e asperimoan wipatcikan kitci natawapamitan.

¹⁵ Kecpin aric itapatciane kitci natawapamitan, kirike ki ka tapwaten ohwe nimasinahikan, kitci kiskeritaman tan ke ici pimatisitcik Kice Manito otirinima, ni wi itwan, kaskina ka tapwerimatcik Kice Manitowa ka pimatisiritci. Enko aniki ka soki tapweritakik kaie ka nanakatcitatcik tapwewiniw. Sokikapowiwok, mia mitowi mia mikiwam ka ocitakaniwok kitci sokak, wewerita e asinikanikitcikaniwok kaie napakatikok ka sokaskositcik e ki apatisitcik.

¹⁶ Tapwe ni aci ketcinaweritakon anihe ka katcicterikipan, anotc ka wapatahiwetc Kice Manito: e apitc kicteritakok anihe ka ici tapweritamokw! Krist ki pe nokosiw, mia irinik e icinakositc. Ki ki wapatahikowinano icikowisk e iteritakositc, Miro Manitowa e ki wapatahiweritci. Aceriwa ki wapamiko. Iriniwa ota askik ki pa tipatatamiriwa otarimwewin. Ki tca tapwerimiko mitcet iriniwa ota askik, minawatc icpimik ki iciwirakaniwiw e ocpickatc oticperitakosiwinik e icatc.