1 Timothée 1 - Kice Manito Ocki Omirwatcimowin

Pwar arimikawew okwimesa

¹ Nin Pwar ka masinahamatan ohwe, Cecoc Krist otarotakana. Kice Manito Ka Ki Akwacimitokw kaie Cecoc Krist ka asperimoikw e ki miritcik aniheriw kitci itotiskewak.

² Ki masinahamatin, Timothée, e iterimitan mia nin tipirawe nikosis tapickotc e asperimototawokw Cecoc. Ni pakoserimawok Kotawino Kice Manito kirika anahwe Ka Tiperimitokw Cecoc Krist kitci acotamaskik mirotehewiniw kaie okitimakeritcikewin acitc pekateritamowiniw.

Aiekwamictowik aniki arotc ka kiskinohamaketcik

³ Aci ki ki witamatin ohwe ka matcaian, Macédoine askik ka icaian, kiapatc kitci tacikein neta Éphèse otenak. Tawok meka neta iriniwok arotc ka kiskinohamaketcik, kirika actew kitci witamawotcik kitci ponitatcik.

⁴ Icik kitci ponitatcik aspinikotc e arimotakik atisokaniw aka e tapwemakanik, kaie e wiratcik ko otaniskotape omocomiwawa ka otapikecikik e mitcetiritci. Tepirak kotc kinowec otci aimihitowok. Nama witcihikowok iriniwok kitci otci nisitotakik tan e totamiritci Kice Manitowa kitci ki akwacimiweritci, ke ki otci kiskeritcikaterik tepirak wir e asperimototawakaniwitc.

⁵ Wetci ititan anihe kitci witamawotcik aniki iriniwok, kitci tca iti sakihatcik owitc iriniwawa. Kata kackitawok kecpin e pekitehetcik, kaie kecpin e kiskeritakik otehiwak e miro totakik, acitc kecpin otehiwak e otciparinik e asperimototawatcik Kice Manitowa.

⁶ Atita ki paskewok neta miro meskanak. Ki tca oniciniwok e arimotakik tepirak arotc kekociciriw aka wiec e irapatanik.

⁷ Kakotcitawok kitci kiskinohamaketcik Kice Manitowa otirakonikewiniw. Nama aric tapwe nisitotamok tan e itetcik. Nama kaie kiskeritamok aniheriw ka arimotakik e sokitakositcik.

⁸ Ki kiskeritenano e mirwacik irakonikewin, kecpin wewerita e apatcitakaniwok.

⁹ Ki kiskeritenano kaie, nama ki otci itactakaniwon iriniwok otci ka miro totakik, aric aniki otci ka matci totakik kirika aka ka wi natotakik, ka matcitatcik kaie ka nta ko pactatitcik, acitc iriniwok otci aka ka kicterimatcik Kice Manitowa kaie aka ka kicteritakik ka kitcitwaweritakonik, ka nipahatcik otawiwawa kekotc okawiwawa, ka manohotcik,

¹⁰ acitc aniki otci ka pacikwatisitcik, kaie iriniwok ka otapinatcik kotakihi iriniwa mia e otiskwemitcik kitci totakik, acitc aniki otci ka kimotitcik iriniwa kitci atawetcik kitci atoskectakeritci, kaie aniki ka kiraskitcik ko, kirika ka kiraski nespi tapwetcik kitci otci itactahorakaniwiritci kotakihi awiriwa, kaie ki itactakaniwon irakonikewin iriniwok otci kaskina kotakeriw ka ici matci totakik, ka ki witamakoikw tapwe kiskinohamakewinik kitci atimikapowictamokw.

¹¹ Mirwatcimowinik ici takon anihe tapwe kiskinohamakewin ka ki acotamakoian kitci tipatataman, kaie nte e otciparik Kice Manitok, anahwe ka icperitakositc kaie mocak ka acterik kitci icperimakaniwitc.

Pwar mikwetc e itatc Kice Manitowa e miro totamiritci

¹² Mikwetc nit itaw Cecoc Krist, anahwe Ka Tiperimitokw, ka ki miritc mackawisiwiniw ka wi apatcitaiapan kitci itotiskewak notamirowiniw. Mikwetc nit itaw e ki tipi asiterimitc kitci acotamawitc aniheriw kitci ici otamirowak, e ki orapamitc kitci atoskectawak,

¹³ misawatc weckatc e ki marerimak epwamoci kiskerimak, e ki nekatcihak kaie e ki pokonemak. Aric ni ki kitimakerimikw Kice Manito, osam aka moci e kiskerimakipan kitci ki tapwerimakipan, aka tca e kiskeritamapan e totamapan.

¹⁴ Nipara ni ki mirikw omirotehewin anahwe Ka Tiperimitokw. Ni ki mirikw kitci asperimototawak kirika kitci sakihiweian, kotc e miratc kaskina ka mamweritakositcik kirika Cecoc Krist.

¹⁵ Ketcinaweritakon ohwe ka ititan. Otcitakotc kaskina awik kata otapinam e irikokotehetc kitci nisitotak: Cecoc Krist ki pe icaw ota askik kitci akwacimatc ka pactatiritci. Nin tca, nin kirawe ni ki pactatin patok kaskina kotakihik.

¹⁶ Aric ki kitimakerimitc Kice Manito, kitci ki wapatahiweritci Cecoc Krist nin nipimatisiwinik, nin ka ki mawotci pactatian, e apitc tekaci ciciperitamiritci. Ekoni ka ici wapatahatc kaskina iriniwa nikanik ke pe taritci ke tapwerimikotc kaie ke miratc kakike pimatisiwiniw, tan kaie wirawaw ke ici mihatc.

¹⁷ Nespitc kitci kicterimakaniwitc kaie kitci icperimakaniwitc anahwe Okimaw nespitc ke tiperitak, kakike ke pimatisitc, aka wiskat ka wapamakaniwitc, kaie wircike e Kice Manitowitc! Kekora ki iki.

¹⁸ Timothée, ninitcanic, kit acotamatin ohwe kiskinohamakewin, mia anihe weckatc ka ki ici nikan tipatcimonaniwok kir otci. Nit asperimon kitci sokiteheckakoin, kitci ki mantokasoin kitci miro itotiskein anihe otamirowin ka ki mirikoin, aka kitci cakotcihikoin.

¹⁹ Kanawerita kitapwetamowin kaie kanawerimitiso, mocak kitci kiskeritaman kitehik e ki miro totaman. Atita meka iriniwok nama ki otci wi natotamok tan e itikotcik otehiwaw, misawatc otehiwak e kiskeritakwapan ka mirwacinik kaie aka ka mirwacinik. Ki tca otci pakiteritamok otapwetamowiniwaw.

²⁰ Enko aniki kaie wirawaw Hyménée kirika Arikisan. Ni ki pakiterimawok memacic kitci tiperimikotcik Matci Manitowa, kitci tca otci kiskeritakik aka wiskat minawatc kitci marerimatcik Kice Manitowa.