1 Pien 5 - Kice Manito Ocki Omirwatcimowin

Ke itotisketcik aniki ka nikaniwitcik

¹ Aci aniki e taciekw ka nikaniwitcik iriniwok otci ka tapwerimatcik Cecoca ni wi witamawawok kekociciriw. Kaie nin ni nikaniwin. Nin tipirawe ni ki wapatamwan Cecoc Krist ka ki ici nekatcitatc. Kaie nin ni ka mirikowin oticperitakosiwin nikotin ke wapatahiwaniwonik. Enko ohwe ka ici nataweritamatakok:

² Miro nanakatcihakok aniki iriniwok Kice Manito ka ki miritakw kitci nakatawerimekok. Wewerita nanakatcihakok, tarasak mia maritcenici iriniwok ka miro nanakatcihatcik omaritcenicimiwawa kitci totamekw. Aka natarima totamokw, aric otcita e nataweritamekw, mia Kice Manito e ici nataweritak, aka kaie tepirak coria e kanawapatamekw, aric e wi atoskectakeiekw.

³ Aka wi tipomakok aniki ka ki mirikoiekw kitci nanakatcihekok. Mocak icikowisk itatisikw kitci ki tca keskinowapamikoiekw.

⁴ Minawatc pe takocike anahwe ka nanakatcihitokw, mia ka tiperimatc maritcenici iriniwa e iteritakositc, ki ka cawerimikowinawaw aniheriw oticperitakosiwin aka wiskat ke ickwaparinik.

⁵ Minawatc kirawaw ka ocki pimatisiekw, kit ititinawaw: ki ka natotawawok aniki kirawe ka kiceatisitcik. Kaskina e taciekw, nama ki ka kicterimonawaw e mihitoekw. Itasinatew meka Kice Manito Omasinahikanik: “Kice Manito atimikapowictawew anahweriw ka kicterimoritci, aric miro totawew anahweriw ka tipaterimitisoritci.” Proverbes 3.34

⁶ Tipaterimitisokw tca, tekaci e pakitinekw Kice Manito kitci tiperimitakw, e kice mackawisitc, kitci ki witcihitakw, apitc iteritake kitci totak.

⁷ Witamawakw kaskina e ici arimeritamekw, tekaci mirakw wir kitci mitatc. Ki nakatawerimikowaw meka.

⁸ Nanakatisikw mocak. Aiekwamictamokw kaskina kekocic. Aiekwamictowakw Matci Manito e wi cakotcihitakw. Mocak meka nantowapamew iriniwa e wi cakotcihatc, tarasak mia micapiciw e pa pimotetc e kitotc e nantowapamatc ko awiriw kitci ki mowatc.

⁹ Nanakaskohwakw! Ki ka sokikapowinawaw e asperimototawekw Kice Manito. Ki kiskeritenawaw meka, ekoni peikon kaskina wiec ota askik e nekatcitatcik ka nosanehwatcik Kice Manitowa, mia kiwitcicaniwawok e iterimekok.

¹⁰ Minawatc ickwa nekatcitaiekwe memacic, Kice Manito, anahwe ka otciparinik kaskina mirotehewiniw, ka ki wicamitakw kaie kirawaw nespitc kitci icperitakosiekw kirika wir, e mamweritakosiekw kirika Cecoc Krist, wir tipirawe ki ka mirikowaw kiapatc kitci miropariekw. Ki ka mackawisihikowaw. Ki ka mirikowaw kitci sokikapowiekw kaie kitci sokeritamekw.

¹¹ Wir mocak kitci tatak mackawisiwiniw! Kekora ki iki.

E matcacikaketc Pien

¹² Ohwe masinahikan aka e kinwapekictek, Silas ni ki witcihikw ka masinahaman. Mia niwitcican nit iterimaw anahwe, ke ki asperimototawakaniwitc. Ki masinahamatinawaw e wi sokimitakok acitc e wi witamatakok ekoni tapwe e icinakonik omirotehewin Kice Manito ka ici sokikapowiekw.

¹³ Kit arimikakowawok aniki ka nosanehwatcik Cecoca ota Babylone otenak ka taciketcik, kaie wirawaw ka ki orapamikotcik Kice Manitowa mitowi kirawaw ka ki orapamikoiekw. Kaie wir Mark, anahwe ka iterimak nikosis, kit arimikakowaw.

¹⁴ Otcemitokw e arimikatoekw, mia kiwitcicaniwawok e iterimitoiekw e sakihitoekw. Ni pakoserimon, kaskina e taciekw Cecoc otirinima, mocak kitci pekateritamekw. Nin Pien