1 Pien 3 - Kice Manito Ocki Omirwatcimowin

Ka nipowitcik ke ici mihitotcik

¹ Kirawaw iskwewok ka nipowiekw, tato neta e taciekw: ki ta natotawaw kinapemiwa. Kecpin aka tapweritamokwen Kice Manitowa otitewiniw, aric wapatake mia e itatisiin, pot kata iteritam kaie wir kitci tapwetak. Nama tca arimatc wiec ki ka itaw.

² Kata wapatam meka mia e ici pimatisiin kaie e apitc kicterimiwein.

³ Aka kaie orina mamitonerita e icihoin, kekotc e itarokwahamain, kekotc ka osawo coriawok kitci apatcitain, kitci ki miroskwehitisoin.

⁴ Aric meckota icita kimiroskewin kitci nokok atamik kitehik e otciparik. Ki ka pekatisin. Ki ka roskatisin. Ekota ni mocak ke otci kiskeritakositc iskwew tapwe kitci miroskewitc. Enkweriw kaie ka ici kicteritak Kice Manito.

⁵ Weckatc iskwewok ka ki aiamihatisitcik ka ki asperimotcik Kice Manitowa, ekota ni ka otci miroskewitcik: pe natotawewakopan onapemiwawa.

⁶ Ekoni kaie e itatisikopanen peikw iskwew weckatc ka pimatisispan, Sara ka ki icinikasotc. Anahwe iskwew mocak sapitowekopan onapema Abraham. “Nokimam” ki icinikatew. Mia mitowi Sara otanisa kit iteritakosinawaw kecpin e miro totamekw, kaie kecpin aka orina e otake sekihikoekw ke ki pe iciwepak.

⁷ Minawatc kirawaw iriniwok ka nipowiekw, tato neta e taciekw: mocak ki ka kicterimaw kitiskwem e miro mihatc, tapickotc e pimatisiekw, e kiskerimatc aka e mackawisitc mitowi kir e asitcisiin. Kaie wir meka kata cawerimiko Kice Manitowa aniheriw ocki pimatisiwiniw ke mirikoin. Ekoni ke itatisiin, aka kekwan kitci otimickakoin e aiamihain.

E nekatcitatc awik e ki miro totak

⁸ Minawatc ohwe mamitcitc kit ititinawaw, kaskina e taciekw. Kotcitakw tapickotc kitci iteritamekw. Kotcitakw kaie kitci nisitotatoekw e aiterimoekw. Sakihitokw, mia peikon kiwitcicaniwawok e iterimitoekw. Mirotehectatokw. Tipaterimitisokw.

⁹ Kecpin e akohikoiekw, nama ki ka kiwe akohiwanawaw. Kecpin e marerimikoiekw, nama ki ka kiwe mareritcikanawaw. Nitowatc ki ka itawaw anahwe ka totatakw: “Nit asperimon kitci cawerimisk Kice Manito.” Enkweriw meka ka ki ititakw Kice Manito ka wicamitakw kitci nosanehwekw, kaie kirawaw kitci cawerimikoiekw.

¹⁰ Masinatew meka: “Awik e wi mirerimotc, e nataweritak kitci mireritak e pimatisitc, kata ponitaw arotcikotc e aitetc kaie e kiraskitc.

¹¹ Kata ponitaw e matci totak. Mocak kata miro totawew owitc iriniwa, Mocak kaie kata natowi totam kitci miroparihitonaniwonik.

¹² Teperitciketc meka nanakatcihew anahweriw ka nosanehikotc. Miro natotawew e aimihikotc. Aric atimikapowictawew anahweriw ka matci totamiritci.” Psaumes 34.13-17(12-16)

¹³ Awin meka tapwe ke matci totatakw kecpin mocak e wi miro totamekw?

¹⁴ Misawatc nekatcihikoiekwe e ki miro totamekw, ki caweritakosinawaw. Nama ki ka koctawawok kotakihik iriniwok, nama kaie ki ka arimeritenawaw.

¹⁵ Aric kicterimakw Krist kitehiwak, wir e tiperimitakw. Mocak werikw kitci kispiwatitisoekw kecpin e kokwetcimikoiekw e nta kiskeritcikatek wetci asperimoekw.

¹⁶ Pekatc aric ki ka ici naskamonawaw acitc ki ka kicterimawok aniki ke ici kokwetcikemotcik. Ki ta kiskeritenawaw kitehiwak e miro totamekw. Otcitciparike tca kitci marerimikoiekw e miro itatisiekw aci Cecoc e nosanehwekw, aniki ka wi itactahoritakok kata waneritamok e ki pokonimitakok.

¹⁷ Kirawe meka kata miroparinopan kitci nekatcitaiekw e ki miro totamekw, kecpin ani ici nataweritamokwen Kice Manito, patok kitci nekatcitaiekw osam e ki matci totamekw.

¹⁸ Aci meka wir tipirawe Cecoc Krist ki pakiteritam opimatisiwin kaskina iriniwok opactatowiniwaw otci. Peikwaw ki totam, ekoni e tipiparinik. Kirano mocak ki patahenano. Aric anahwe aka wiskat ka ki otci patahak ki nipo kirano otci kirika kaskina kotakihi otci ka patahamiritci, Kice Manitok kitci ki iciwiritakw. Owiawik itekera ki nipahakaniwiw. Aric Miro Manitowa ki apitcipahiko, kiapatc minawatc kitci pimatisitc.

¹⁹ Ki witcihiko anihi Miro Manitowa, wawatc kitci nta tipatcimoctawatc anahweriw ka ki niporitci e kipohwakaniwiritci.

²⁰ Enko aniki weckatc ka ki pe nipotcik, aka ka ki atimikapowictawatcik Kice Manitowa. Kinowec ki pehikowok epwamoci nipotcik kitci kweskatisitcik, e ciciperitamiritci. Ani apitc mekwata ocitakopan Noé micta tcimaniw. Nicwaso mamo iriniwok ki positcimewok neta micta tcimanik. Nama tca ki otci pakitinikowok Kice Manitowa kitci otcinetcik neta nipik ka riskipoterik askiriw.

²¹ Anihe nipi ka ki mitcakamik ka riskipotek aski, ki otci kiskeritenawaw kaie tan e irapatak anihe kotak nipi ka apatak anotc e sikahatasonaniwok, e kasihamakoiekw kipactatowiniwaw. Sikahatakewin, nama ki kisisipasowakanawaw. Aric atamik kitehiwak ki kisisiparikowinawaw, e nataweritamawekw Kice Manito kitci kasihamatakw, kitci kiskerimitisoekw aci icikowisk e iteritakosiekw. Ki ki akwacimikowaw, anihe otci, osam e ki apitcipatc Cecoc.

²² Ki ocpickaw wakwek, aci e apitc onihiwinik Kice Manitowa. Ekota neta e ici okimawitc, aceriwa e tiperimatc acitc kaskina manitowa neta ka nikaniwiritci, acitc kaskina kotakihi ka mackawisiritci.