1 Pien 2 - Kice Manito Ocki Omirwatcimowin

Asini ka pimatisiweritakositc kirika Kice Manito otirinima

¹ Wepakanamokw tca kaskina ka ici matcitwaniwok kipimatisiwiniwak. Nama ki ka kiraskinawaw. Nama kaie ki ka miro iriniwikasonawaw. Nama ki ka otcinawekerimawaw kiwitc iriniwaw. Nama kaie ki ka mareritcikanawaw.

² Mia ocki awacic e nataweritak tcotcocanaporiw e mirwakaminik, mocak ki ka nataweritenawaw kekocic ka mirwacik ke ki matceatisiwakeiekw kitcitcakociwak itekera, kirika kitci akwacimikoiekw.

³ “Aci meka ki kiskerimawaw Teperitciketc e apitc mirwasitc.” Psaumes 34.9(8)

⁴ Wi pecowapamakw Teperitciketc, mia asini ka pimatisiweritakositc e iteritakositc. Enko aniki iriniwok ka maniketcik ka ki wepinatcik. Aric wir Kice Manito ki orapamew, e iterimatc e mawotci kicteritakosiritci.

⁵ Kaie kirawaw ki mirwapatisinawaw, mia mitowi asiniik e manikaniwok, tacikewin e ocitakaniwok, mitowi kitci aiamihe mikiwam kitcitcakociwak itekera. Ekota neta tapickotc ke ici atoskectawekw Kice Manito, mia omakatekorema kitci irapatisiekw, e cawerimekw aniheriw e ici mireritak, Cecoc Krist otci.

⁶ Ekoni meka e itasinatek Kice Manito Omasinahikanik: “Ni ka orapamaw peikw asini e mawotci kicteritakositc. Aci ni ka araw neta otenak Sion ka icinikatek, nictam kitci icicik neta e ici ocitakaniwok kitci aiamihe mikiwam kitci sokak. Anahwe ka tapwerimatc nama wiskat kata mitatam.” Ésaïe 28.16

⁷ Micta kicteritakosiw anahwe asini kirawaw otci ka tapwerimekw. Aric aniki otci aka ka tapwerimatcik, enkweriw ka masinaterik Kice Manito Omasinahikanik: “Anihi asiniwa ka ki wepinatcik manike iriniwok, e ki iteritakik ‘nama wiec irapatisiw,’ enko anihi aci ka mawotci kictapatisiritci.” Psaumes 118.22

⁸ Kiapatc masinatew: “Enkweriw asiniwa ka pacactecikik iriniwok, anihi ka otci pakicikik.” Ésaïe 8.14 Ki pacacteciniwok e ki anweritakik kitci sapitamwatcik Kice Manito otitewiniw. Aci weckatc ickwa oreritcikaterikopan kitci icinakonik.

⁹ Aric kirawaw ki ki orapamikowaw Kice Manito kitci otirinimitc. Kit atoskectawawaw e okimawitc, mia omakatekorema e irapatisiekw. Ki kitcitwaweritakosinawaw, mamowi e tiperimitakw, wir tipirawe otirinima e iteritakosiekw. Ki ki wicamikowaw kitci nakatamekw neta e ici kiski tipiskak, kitci pe natawapamekw e ici micta miro wasearik, kitci ki tca pa tipatatamekw kaskina e micta mirwacinik kekociciriw ka aitotisketc.

¹⁰ Weckatc nama Kice Manito otirinima ki ki otci iteritakosinawaw. Aci pitoc anotc icinakon. Nama kaie moci ki ki otci mirikowitawaw okitimakeritcikewin. Aric anotc aci kaskina aniheriw ki ki mirikowinawaw.

Kitci atoskectawakaniwitc Kice Manito

¹¹ Nimiro nikwimesak, mia mantewok kit iteritakosinawaw ota askik, mitowi iriniwok aka ka otaskitcik e iterimikoiekw. Ki pakoserimitinawaw kitci nanakatcihitisoekw, aka kitci cakotcihikoekw kekwan ka maratak, notc e ici nataweritak iriniw ota askik. Ekoni meka ke ki otci kowetowi iteritak awik, nac kitci cakotcihikotc otcitcakocik.

¹² Icikowisk ki ka itatisinawaw. Kecpin tca iriniwok aka ka kiskerimatcik Kice Manitowa wapamitakwe e itatisiekw, misawatc kecpin e itactahoritakw kekwariw, kata kiskeritamok peikon mocak e miro totamekw kaie kata mirwatcimewok minawatc takociniritena.

¹³ Teperitciketc otci, kaskina ki ka natotawawawok iriniwok ka tiperimitakok ota askik: Kice Okimaw, anahwe kaskina kekwariw ka tiperitak ota kitaskinak,

¹⁴ acitc kotakihik okimawok ka ki iciticohikotcik anihi kice okimawa kitci kicakonatcik iriniwa ka matci totamiritci kaie kitci mirwatcimatcik anahweriw ka miro totamiritci.

¹⁵ Tapwe wirata, ekoni e ici nataweritak Kice Manito, kitci miro totamekw, aka awocamec kitci ki kitotcik aniki iriniwok aka ka wi waskamateritakik, aka ka kiskeritakik e aitetcik e itactahoriwetcik.

¹⁶ Icikowisk itatisikw. Nama meka aci ki tiperitakosinawaw. Nama aric ki ka irapatcitanawaw aka e tiperitakosiekw mitowi e akonahamekw e matci totamekw. Kice Manito meka kit atoskectawawaw, ekoni tca wewerita ke otci itatisiekw.

¹⁷ Kaskina awik kicterimakw. Sakihakok kiwitc iriniwawok kaie wirawaw ka asperimototawatcik Cecoca. Kicterimakw Kice Manito, kaie kicterimakw Kice Okimaw.

Mia Cecoc ki ka itotiskanawaw kecpin nekatcihikoiekwe

¹⁸ Kirawaw arotakanak e irapatisiekw, ki ka natotawawawok ka atoskectawekok, tekaci kitci kicterimekok. Nama tepirak ka mirotehetcik ki ka kicterimawawok, kaie aniki aka ka miro iriniwitcik.

¹⁹ Tapwe wirata, mirwacin kecpin awik aka e pakiterimotc e nekatcihakaniwitc aka e ki otci matci totak, kaie e sapitowatc Kice Manitowa.

²⁰ Nama meka ki ka kicterimikowinawaw e ki sokerimoiekw, kecpin e nekatcihikoiekw osam e ki matci totamekw. Kecpin aric e nekatcihikoiekw e ki miro totamekw, aka e pakiterimoiekw, enkweriw ka ici kicteritak Kice Manito.

²¹ Ekoni wetci ki wicamitakw. Ki nekatcitaw meka Cecoc Krist kirawaw otci. Ki ki wapatahikowaw mia ke totamekw, omeskanam kitci nosanetaiekw.

²² Nama wiskat ki otci pactatiw, kaie nama wiskat ki otci kiraskiw.

²³ Ka marerimakaniwitc, nama ki otci kiwe mareritcikew. Ka nekatcihakaniwitc, nama ki otci kiwe kokwectasomiwew. Nitowatc ki acotamawew opimatisiwin Kice Manitowa, mocak icikowisk ka icinakonik otipaskonikewiniw.

²⁴ Wir tipirawe owiawik Cecoc Krist ki miwotaw kaskina e ici maratanik kipimatisiwininak, tcipaiatikok ka nipotc, aka awocamec kitci pimatisiikw pactatowinik, tepirak e ici mirwacik kitci otci pimatisiikw. Cowatc aci kit iteritenano, e ki akohakaniwitc kirano otci.

²⁵ Warawik ki tacikatawaw e ici tatc Kice Manito. Ekoni e iteritakosiekopanen, mitowi maritcenicak e ki oraparihotcik e onihakaniwitcik, warawik nte e ici tacikeritci anihi ka nanakatcihikotcik. Anotc aci ki kiwerikowinawaw kiapatc kitci nosanehwekw anahwe ka kanawerimitakw kaie ka nakatawerimatc kitcitcakociwariw.