1 Pien 1 - Kice Manito Ocki Omirwatcimowin

E arimikowakaniwitcik kaskina e tacitcik

¹ Nin Pien ka masinahamatakok, Cecoc Krist otarotakana. Ki masinahamatinawaw, kirawaw Kice Manito ka ki orapamitakw, mantewok aci e iteritakosiekw, kotakihi askik e tacikeiekw: Pont, Galatie, Cappadoce, Asie acitc Bithynie e icinikateki anihi askiwa.

² Ki ki orapamikowinawaw kotc ka ki ici nikan iteritakipan Kotawino Kice Manito. Tipan ki ki arikowaw kitci tiperimitakw, Omiro Manitoma e ki miritakw aniheriw, kitci ki tca sapitowekw Cecoc Krist acitc tekaci kitci pekiteheikw. Ka nipotc Cecoc, omikw ki macikotakaniwoniw kitci ki icinakosiekw. Ni pakoserimon nipara kitci mirikoiekw Kice Manito omirotehewin acitc opekateritamowin.

Pimatisimakan kitasperimowinino

³ Mirwatcimatan Kice Manito, anahwe Ka Tiperimitokw Cecoc Krist otawiwa. E apitc micarik okicewatisiwin, ki ki mirikono kiapatc minawatc kitci nitawikiikw, kitci ki ocki pimatisiikw, e ki apitcipahatc Cecoca ka niporitci. Ekoni wetci takok kitasperimowinino e pimatisimakak,

⁴ e petaiekw nikotin kitci pe otitikoikw aniheriw ka ici kanaweritak Kice Manito kaskina otirinima otci. Nama meka ki pikotakaniwon anihe ke ici mirikoikw, nama ki ometciwotakaniwon, nama kaie wiskat kata ickwaparin. Kanaweritam aniheriw Kice Manito wakwek, kirawaw otci,

⁵ e asperimototawekw, omackawisiwin e totak e kanawerimitakw, nac kitci takociparinik kitci akwacimiwetc. Kekatc ponaskiwoke kata pe nokotakaniwoniw.

⁶ Ekoni wetci mireritamekw, misawatc mekwata e actek memacic kitci kackeritamekw, kaskina wiec e nakickamekw nekatcitawin.

⁷ Mirwapatan anihe kitci ki otci kiskeritakok tapwe e asperimototawekw Kice Manito. Mitowi osawo coria, nikotin ke ickwaparik, ickotek ko iciwepinikatew kitci ki tcakaskitek kaskina neta aka ka mirwacik, tepirak ka mirwacik kitci takok. Ekoni peikon e isparik kitapwetamowiniwaw, kirawe aric e kictapatak patok osawo coria. Actew kitci nekatcitaiekw kitci ki otci kiskeritakok tapwe e sokak kitapwetamowiniwaw. Ekoni ke otci mirwatcimikoiekw, ke otci icperimikoiekw acitc ke otci kicterimikoiekw, minawatc takocike Cecoc.

⁸ Ki sakihawaw, misawatc aka wiskat e ki otci wapamekw. Ki tapwerimawaw, misawatc aka anotc e wapamekw. Ekoni wetci mireritamekw. E apitc mireritamekw, kaie e apitc icperitakok kimireritamowiniwaw, nama ki witcikatew e apitc micak anihe kimireritamowiniwaw.

⁹ Ki pe otitikonawaw meka kitcitcakociwawok kitci akwacimakaniwitcik. Ekoni wetci asperimototawekw Kice Manito.

¹⁰ Weckatc aniki ka ki pe nikan tipatcimotcik nantowapatamwakopan acitc nanto kiskeritamwakopan aniheriw ke otci totcikaterik kitci ki akwacimakaniwiritci iriniwa. Ki tipatatamok kaie aniheriw caweritcikaniw kitci miritakw Kice Manito.

¹¹ Mantokasowakopan kitci kiskeritakik tan apitc ke iciwepanikipan aniheriw ka ki witamakotcik Krist Omiro Manitoma acitc kotakeriw ke isparinikipan ani apitc. Aci meka ki pitciteheckakopanak Miro Manitowa. Ki tca nikan witamakowok kitci nekatcitaritci anihi ke pe iciticohwatc Kice Manito, minawatc kitci icperimakaniwiritci.

¹² Kaie ohweriw ki witamawew Kice Manito anahweriw ka ki atoskectakotc e nikan tipatcimoritci, aka wirawaw otci aniheriw tipatcimowiniw ka ki mirakaniwitcik kitci tipatatakik, aric kirawaw otci. Aci ki ki witamakowinawaw anihe tipatcimowin, aniki anotc ka pa tipatatakik Mirwatcimowiniw e ki witamatakok. Ka aiarimotakik aniheriw, Miro Manitowa ki mackawisihikowok, wakwek e ki pe otci iciticohwakaniwiritci. Wawatc aceriwok wirawaw tipirawe kata sakitapanak kitci nta kiskeritakik aniheriw Mirwatcimowiniw.

Kitci kitcitwawisiikw

¹³ Ekoni wetci actek kitci weriekw kimitoneritcikaniwak kitci atoskectakeiekw. Nanakatisikw. Tekaci ki ka asperimonawaw anihe caweritcikan ke mirikoiekw minawatc takocike Cecoc Krist.

¹⁴ Mocak ki ka sapitowawaw Kice Manito kirika nama ki ka wi makockatcitanawaw kekwan ka maratak ka ki ici nataweritamekopan weckatc epwamoci kiskerimekw.

¹⁵ Actew kitci kitcitwawisiekw kaskina e aitotiskeiekw, mia Kice Manito e kitcitwawisitc, anahwe ka ki wicamitakw kitci nosanehwekw.

¹⁶ Itemakan meka omasinahikanik: “Ki ka kitcitwawisinawaw, osam nin e kitcitwawisian.” Lévitique 11.44-45; 19.2

¹⁷ E pakoserimekw Kice Manito, “Notawinan” kit icinikatawaw, anahwe ka tipaskonatc kaskina iriniwa, aka atita kirawe e kicterimatc patok kotakihi. Kanawapatam tato papeikw ka ki totamiritci. Ekoni wetci kicteritakok kitci wapatahiweiekw e micta kicterimekw, icikowisk e itatisiekw, irikik ke actek kitci pimatisiekw ota askik.

¹⁸ Wirata ki kiskeritenawaw ohwe: Cecoc e ki pakiteritak tipirawe opimatisiwin kirawaw kitci ki otci akwacimikoiekw anihe ka ki ici pimatisiekopanen, weckatc kitaniskotape kimocomiwapanak ka ki ici wapatahitakw, aka wiec e irapatanik. Namaiew ni ota aski kekocic ka ki akwacimikoekw, mitowi coria kekotc ma osawo coria. Nikotin meka kaskina kata ickwaparin.

¹⁹ Ekoni wetci ki akwacimikoiekw: Cecoc Krist e ki pakiteritak omikw e micta kictapatanik. Mitowiriw maritcenica e orapamakaniwiritci kitci nipahakaniwiritci, tekaci aka e takonik ka maratanik, ekoni ka iteritakositc Cecoc.

²⁰ Ki ickwa orapamikopan Kice Manitowa epwamoci kiceritcikaterik askiriw. Aci anotc kekatc kitci ponaskiwok, kirawaw otci wetci ki kiskeritamihakaniwitc.

²¹ Wir ka ki totak kitci ki tapwerimimekw Kice Manitowa ka ki apitcipahikotc kirika ka ki mirikotc icperitakosiwiniw. Ekoni wetci kiskeritamekw kitci tapwerimekw Kice Manito, kirika kitci asperimototawekw.

²² Aci ki ki itotiskanawaw tekaci kitci miroteheiekw, ka sapitamwekw Kice Manito otapwewin, kitci ki otci miro sakihitoekw, mia kiwitcicaniwawok e iterimitoekw. Kaketin tca ki ka sakihitonawaw kaskina e irikokoteheiekw.

²³ Tapwe wirata ki ki ocki nitawikinawaw kitcitcakociwak itekera. Namaiew ni iriniw ka ki miritakw aniheriw ocki pimatisiwiniw. Wir tipirawe ka ki miritakw, anahwe aka wiskat ke nipotc, Kotawino Kice Manito otitewin otci, e pimatisimakanik acitc aka wiskat ke nipomakanik.

²⁴ Pe itasinatew meka: “Kaskina iriniw nama kinowec pimatisiw, mitowi mackoci, kaskina aniheriw ka ici kicteritakositc iriniw, mitowi wapikoni notcimik aka kinowec ka pimatisimakak, wipatc pactew mackoci acitc wapikoni pakitin.

²⁵ Aric mocak kata pimatisimakaniw Teperitciketc otitewin.” Ésaïe 40.6-8 Enko anihe Mirwatcimowin ka ki witamakoiekw.