1 Jean 5 - Kice Manito Ocki Omirwatcimowin

Kitci asperimototawimikw Kice Manito Okosa

¹ Kaskina awik ka tapwetak ohweriw: “Cecoc enko anahwe Krist, anihi ka ki itetc Kice Manito kitci pe iciticohwatc kitci akwacimimitokw,” Kice Manitok itekera ki otci nitawikiw. Kaie kaskina awik ka sakihatc awiriw, sakihew kaie anahweriw onitcaniciriw.

² Ekoni tca ka otci kiskeritamokw e sakihimikw Kice Manito onitcanica: e sakihokw Kice Manito kirika e nosanetawokw otirakonikewin.

³ Ekoni meka e icinakonik Kice Manito e sakihakaniwitc: e nosanetakaniwonik otirakonikewin. Nama kaie orina arimaniw kitci nosanetakaniwonik.

⁴ Tapwe wirata, tato e taciritci Kice Manito onitcanica cakotcitariw matci meskanariw notc ka nosanetakaniwonik ota askik. Kirika ekoni e totamokw kitci ki cakotcitaikw anihe: kit asperimototawano Cecoc.

⁵ Awin tca ka cakotcitatc matci meskanariw ota askik? Tepirak anahwe ka tapweritak ohweriw: Cecoc, enko anihi Kice Manito Okosa.

E ici tipatcimakaniwitc Cecoc Krist

⁶ Enko anahwe, Cecoc Krist, ka ki pe icatc ota askik kitci witci tacikemitokw. Ka pe icatc, nipiriw kaie mikoriw ki totcikateriw. Nama tepirak nipiriw ki otci totcikateriw, aric kaie mikoriw. Miro Manito ki witamakono tapwe e icinakonik, mocak meka e tapwetc.

⁷ Nictino tca ka otci kiskeritamokw tapwe Kice Manito Okosa e iteritakositc Cecoc:

⁸ Miro Manito, acitc nipi kaie omikw. Tapickotc e nictiki ki otci kiskeritenano tapwe Cecoc, enkweriw anihi Okosa Kice Manito.

⁹ Ki naheritamwano ko meka iriniwok e aitetcik, kekociciriw e arimotakik. Otcitakotc tca kirawe ki ta natotamwano aniheriw Kice Manito ka itetc. Mocak meka kata ki asperimototawakaniwiw e kice manitowitc, kirika Okosa e ki arimomatc.

¹⁰ Anahwe tca ka tapwerimatc Kice Manitowa Okosiriw, kiskeritam otehik e tapwemakanik aniheriw. Aric anahwe aka ka tapwerimatc Kice Manitowa, mia peikon e iteritak, “Kiraskiw Kice Manito,” aka e tapwetamwatc aniheriw ka ki iteritci Kice Manitowa, Okosiriw otci.

¹¹ Enkweriw tca ka ki ici witamakoikw: kakike pimatisiwiniw ki ki mirikono Kice Manito, kaie Okosa wetci acotamatokw.

¹² Anahwe ka witcewatc Kice Manito Okosa, aci takoniw aniheriw kakike pimatisiwiniw. Anahwe aka ka witcewatc nama takoniw.

Kakike pimatisiwin

¹³ Ki masinahamatinawaw kitci ki kiskeritamekw aci e ki pe otitikoiekw anihe kakike pimatisiwin, kirawaw ka tapweritamwekw Kice Manito Okosa oticinikasowiniw.

¹⁴ Aci ki ki sokeritenano e pakoserimokw Kice Manito. Ki natotakono meka kecpin e nataweritamawokw kekociciriw kotc e iteritak.

¹⁵ E kiskeritamokw tca e natotatokw e pakoserimokw, ki kiskeritenano kaie otcitakotc e miritokw aniheriw ka ici nataweritamawokw.

¹⁶ Kecpin e wapamekw kiwitcicaniwaw e pactatitc, kecpin tca aka ki oniwirikotc aniheriw opactatowin kitci ki niponerimakaniwitc, acteriw kitci aiamihectowekw. Kata tca miriko Kice Manitowa pimatisiwiniw. Anahwe towi iriniw ka arimomak, awik aka ka ki otci pactatitc pactatowiniw nipowinik ke ki iciwirikotc. Takon meka pactatowin ka oniwiriwemakak ke ki otci niponerimakaniwitc iriniw. Namaiew aric anihe towi pactatowin ka arimotaman kitci ici aiamihectamowakaniwitc awik.

¹⁷ Tatwaw e matci totak awik, pactatiw. Nama aric wirata kaskina pactatowin kata otci niponerimakaniwipan.

¹⁸ Ki kiskeritenano aka kiapatc e pactatitc ko awik Kice Manitok itekera ka otci nitawikitc. Kice Manito Okosa meka kanawerimiko anahwe iriniw. Nama kaie ki matci totako anihi Ka Matcatikosiritci.

¹⁹ Ki kiskeritenano e tiperimitokw Kice Manito. Kaskina aric ka tiperitakositcik ota askik, tiperimikowok anihi Ka Matcatikosiritci.

²⁰ Ki kiskeritenano tapwe e ki pe icaritci ota askik Kice Manito Okosa, kirika e ki miritokw kakitaweritamowiniw kitci ki kiskerimimokw anihi tapwe ka Kice Manitowiritci. Ki witcewano anahwe tapwe ka Kice Manitowitc, osam Okosa Cecoc Krist e ki itotiskeritci kitci icinakonik. Enko meka anahwe tapwe ka Kice Manitowitc, kaie ka pakitinak kakike pimatisiwiniw.

²¹ Ninitcanicak, aiekwamictowakok manitokanak. Nin Jean