1 Jean 3 - Kice Manito Ocki Omirwatcimowin

Kice Manito onitcanica

¹ Kanawapatamokw e apitc micarik osakihiwewin Kotawino! E apitc sakihitokw kit icinikatikono “ninitcanicak.” Tapwe meka ekoni e iteritakosiikw. Aric iriniwok ka nosanetatcik matci meskanariw, notc ka nosanetakaniwonik ota askik, nama ki nisitowinikonowok ani e iteritakosiikw, osam aka e kiskerimatcik Kice Manitowa.

² Nimiro nikwimesak, anotc kit iteritakosinano Kice Manito onitcanica, aric nama moci ki ki otci kiskeritamihikono tan ke iteritakosiikw kecko. Ohwe aric ki kiskeritenano: Minawatc takocike Krist, mia wir kitci iteritakosiikw. Ki ka wapamano meka mia e icinakositc.

³ Kaskina awik ka ici asperimotc, tekaci mirwinakohitiso otehik, mia Cecoc Krist wir tipirawe tekaci e mirwinakositc otehik.

⁴ Kaskina awik ka pactatitc atimikapowictam Kice Manitowa otirakonikewiniw. Ekoni meka e icinakok pactatowin: aka e nosanetakaniwonik aniheriw otirakonikewiniw.

⁵ Ohwe ki kiskeritenawaw: Cecoc Krist ki pe icaw kitci maninak pactatowiniw, wir tipirawe aka e takonik otehik.

⁶ Kaskina awik mocak ka witcewatc ponitaw e pactatitc. Aric anahwe mocak ko ka pactatitc wapatahiwew aniheriw e itotisketc aka e ki otci wapamatc Cecoca kirika aka e ki otci kiskerimatc.

⁷ Ninitcanicak, aka pakitinitisokw kitci oniwirikoiekw! Anahwe ka nosanetatc icikowisk itatisiwin, icikowisk iteritakosiw, mia Cecoc Krist e iteritakositc.

⁸ Anahwe mocak ko ka pactatitc Matci Manitowa tiperimiko. Aspinikotc meka pactatiw Matci Manito esko ka kiceritcikaterik askiriw. Ekoni mia wetci ki pe icatc Kice Manito Okosa, kitci orapatamwatc Matci Manitowa ototamowiniw.

⁹ Kaskina awik Kice Manitok itekera ka otci nitawikitc ponitaw mocak e pactatitc, osam e mirokinik Kice Manitowa opimatisiwiniw otehik. Aci e otawitc Kice Manitowa, nama awocamec ki pactatiw.

¹⁰ Ekota ke otci nisitowinawakaniwitcik pitoc e icinakositcik Kice Manito onitcanica kaie tca Matci Manito onitcanica: kaskina awik aka icikowisk ka itatisitc kekotc aka ka sakihatc owitcicana, nama tiperimiko Kice Manitowa.

Kitci sakihitoikw

¹¹ Enko ohwe ka ki ici witamakowiekw, ka ki petamekw esko ka kitciparik e tapwerimekw Cecoc: sakihitokw.

¹² Aka itatisitan mia Caïn. Ka Matcatikosiritci ki tiperimiko. Ki nipahew ocima. Kekwariw wetci ki nipahatc? Osam e maratanikipan ototamowin, kaie ocima icikowisk icinakonikopan.

¹³ Aka kockoparikw, niwitcicanak, kecpin e cikerimitakok iriniwok ota askik ka nosanetatcik matci meskanariw.

¹⁴ Ki kiskeritenano aci e ki nakatamokw nipowin, pimatisiwinik tca kitci tacikeikw. Wetci kiskeritamokw anihe, osam e sakihokok kiwitcicaninowok. Anahwe aka ka sakihiwetc, kiapatc tiperimiko nipowiniw.

¹⁵ Kaskina awik ka cikerimatc owitcicana, manoho iriniw iteritakosiw. Nama meka ki takoniw kakike pimatisiwiniw otehik awik e manoho iriniwitc.

¹⁶ Ekoni ka otci kiskeritamokw e icinakok sakihiwewin: Cecoc Krist ki pakitinam opimatisiwin kirano otci. Kaie kirano tca ki ta ickwa aikanano kitci pakitinamokw kipimatisiwinino kiwitcicaninowok otci.

¹⁷ Kecpin awik e mirwatcitatc, e wapamatc owitcicana e noteparinik ke otci pimatisiritci, aka tca e witcihatc, nama takoniw otehik Kice Manitowa osakihiwewiniw.

¹⁸ Ninitcanicak, nama actew kitci sakihiweikw tepirak itewina kitci apatcitaikw e aiarimotamokw anihe. Kirawe mirwacin kitci wapatahiweikw tapwe e sakihokok kiwitc irininook, kitci tca miro totawikok.

Kitci sokeritamokw e pakoserimokw Kice Manito

¹⁹ Ekoni tca ke otci kiskeritamokw e nosanetaikw tapwewin. Ekoni kaie ka otci pekateritamokw kitehinak e pakoserimokw Kice Manito.

²⁰ Misawatc kecpin e atamerimitisoikw kitehinak, peikon ki kiskeritenano kirawe e mackawisitc Kice Manito patok kitehino, tekaci e capo kiskerimitokw.

²¹ Kecpin kaie, nimiro nikwimesak, aka awocamec e atamerimitisoikw kitehinak, ki kackitanano kitci pakoserimokw Kice Manito, tekaci kitci sokeritamokw.

²² Ki pe otitikono kaskina ka ici nataweritamawokw, osam e nosanetawokw otirakonikewin kirika e itotiskewokw aniheriw e ici mireritak.

²³ Enkweriw otirakonikewin ka ici witamatokw: kitci tapweritamwokw Okosa Cecoc Krist oticinikasowiniw, kaie kitci sakihitoikw, kotc ka ititokw anahwe Krist kitci itotiskeikw.

²⁴ Anahwe tca ka sapitak Kice Manitowa otirakonikewiniw, witcewew Kice Manitowa kaie witcewiko. Enko ohwe ka otci kiskeritamokw tapwe e witcewitokw Kice Manito: ki ki mirikono Miro Manitowa.