1 Jean 2 - Kice Manito Ocki Omirwatcimowin

Mocak ki pe nta witcihikono Krist

¹ Ninitcanicak, ki masinahamatinawaw e wi witcihitakok aka kitci pactatiekw. Kecpin aric awik nta e taciikw pactatite, taw arimitakosi iriniw mocak ka witcihitokw e witci tacikematc Kotawinowa. Enko na Cecoc Krist, tekaci icikowisk e iteritakositc.

² Ki pakiterimitiso meka kitci nipahakaniwitc, kitci kasihamakoikw kipactatowinino, nama aric kirano tepirak kipactatowinino, aric kaie kaskina iriniwok ota askik opactatowiniwawa.

³ Kecpin sapitamwokwe otirakonikewin Kice Manito, ki kiskeritenano tapwe e kiskerimokw.

⁴ Kecpin awik e itetc, “Ki kiskerimaw Kice Manito,” aric aka e sapitamwatc otirakonikewiniw, kiraski iriniwiw, kaie nama takoniw tapwewiniw otehik.

⁵ Kecpin aric sapitamwate Kice Manitowa otirakonikewiniw, tekaci kaie takoniw otehik osakihiwewiniw. Ekoni ke ki otci kiskeritamokw e witcewokw Kice Manito:

⁶ Anahwe ka itetc, “Ni witcewaw Kice Manito,” acteriw kitci pimotetc mia ka ki ici pimoteritci Cecoca.

Ocki irakonikewin

⁷ Nimiro nikwimesak, namaiew ocki irakonikewin ka arimotamatakok e masinahamatakok. Enko ohwe weckatc irakonikewin, ickotokw ka ki pe otitikoiekw esko ka kitciparik e tapwerimekw Cecoc. Ohwe weckatc irakonikewin, enko anihe aci ka ki pe ici petamekw.

⁸ Ata ocki irakonikewin iteritakon ohwe ka masinahamatakok. Kiskeritakon e tapwemakak ohwe irakonikewin, e kiskerimokw Cecoc, kaie kirawaw tca e kiskerimikoiekw. Tapwe wirata iti matcamakan e tipiskak, tapwe tca aci e waseak.

⁹ Anahwe ka itetc, “Ni waseatisin,” aric e cikerimatc owitcicana, kiapatc tipiskatisiw.

¹⁰ Anahwe ka sakihatc owitcicana tacikew e ici wasearik. Nama takoniw ke ki oniwirikotc.

¹¹ Aric anahwe ka cikerimatc owitcicana tipiskatisiw. Tekaci e tipiskarik ici pimotew, aka e kiskeritak ite e icatc, aka tca kaie awocamec e wapatak.

¹² Ki masinahamatinawaw ninitcanicak, e wi mikawasimitakok e ki kasihamakoiekw kipactatiwinawaw Cecoc Krist oticinikasowin otci.

¹³ Ki masinahamatinawaw, kirawaw otawiwok, e kiskerimekw anahwe ickotok ka ki pe tatc. Ki masinahamatinawaw kaie kirawaw ka ocki pimatisitcik, aci e ki cakotcihekw anahwe Ka Matcatikositc.

¹⁴ Ki masinahamatinawaw ninitcanicak, e kiskerimekw Kotawino. Ki masinahamatinawaw kirawaw otawiwok, e kiskerimekw anahwe ickotok ka ki pe tatc. Ki masinahamatinawaw ka ocki pimatisitcik, e mackawisiekw. Takoniw Kice Manito otitewin kitehiwak acitc aci ki ki cakotcihawaw anahwe Ka Matcatikositc.

¹⁵ Akawir sakitakw matci meskanaw, notc ka nosanetakaniwok ota askik. Kaie akawir sakitakw arotc kekwan ka takok. Anahwe meka ka sakitatc aniheriw, nama awocamec kata ki sakihew Kotawinowa.

¹⁶ Ekoni meka e icinakok anihe matci meskanaw: e iteritak awik kitci matci totak kotc e ici nataweritak, kekotc mocak wa ici tatak kekociciriw e wapatak, kaie e sasekatc e ici tatak acitc e aitotisketc. Nama Kotawinak otciparin kaskina anihe matci pimatisiwin. Ota askik otciparin.

¹⁷ Aci meka taci poniparin kaskina matci meskanaw ota askik, kaie kaskina ke ki ici matci nataweritcikatek. Aric anahwe ka totak e iteritamiritci Kice Manitowa kata kakike pimatisiw.

Anahwe ka wi naskowatatc Krista

¹⁸ Ninitcanicak, aci kekatc kaskina kata ickwaparin! Aci ki ki petakanawaw kitci pe takocik anahwe Ka wi naskowatatc. Aci meka mitcet ka wi naskowatatcik ki pe takociniwok kirika ekoni wetci kiskeritamokw aci kekatc kaskina kitci ickwaparik.

¹⁹ Aci ki ki nakatikonowok aniki iriniwok. Nama aric tapwe ki ki otci witcewikotanowok. Kecpin meka ki witcewitokopanen, kiapatc anotc ki ta witci tacikemikonowok. Aric ki ki nakatikonowok. Kiskeritakoniw tca aka e ki otci witcewitokok, nama otci peikw neta e tacitcik.

²⁰ Kirawaw aric ki ki pe otitikonawaw Miro Manito, Krist e ki miritakw. Ekoni tca wetci kaskina kiskeritamekw tapwewin.

²¹ Nama ki masinahamatinawaw e iterimitakok, “Nama kiskeritamok tapwewiniw,” osam aric aci e kiskeritamekw. Ki kiskeritenawaw kaie aka wiskat kiraskiwin e otciparik tapwewinik.

²² Awin tca ka kiraski iriniwitc? Anahwe ka itetc: “Cecoc namaiew ni wir Krist, nama ki otci pe iciticohoko Kice Manitowa kitci pe nta akwacimitokw.” Kiraski iriniw, enko kaie anahwe Ka wi naskowatatc Krista. Tapickotc wepakonew Kotawinowa acitc Okosiriw.

²³ Tapwe wirata, anahwe ka wepakonatc Kice Manitowa Okosiriw, nama aci kiskerimew Kotawinowa. Anahwe ka witak e tapwerimatc Okosiriw, kiskerimew kaie Kotawinowa.

²⁴ Nakataweritamokw tca kitci miro kanaweritamekw kitehiwak anihe witamakewin ka ki ici petamekw esko ka kitciparik e tapwerimekw Cecoc. Kecpin tca miro kanaweritamekwe anihe, kaie kirawaw mocak ki ka witcewawawok Kotawino kirika Okosa.

²⁵ Ohweriw kaie ki ici nespi tapwew Krist kitci miritokw: kakike pimatisiwiniw.

²⁶ Ki masinahamatinawaw ohwe e wi ekwamisimitakok aniki ka wi oniwiritakok.

²⁷ Kirawaw tca, ki witcewawaw anahwe Miro Manito ka ki pe otitikoikw, Krist e ki miritakw. Nama actew iriniw kitci kiskinohamatakw. Tapwe wirata, Miro Manito kaskina ki kiskinohamakowaw: tapwewiniw kiskinohamakew, nama kiraskiwiniw. Ekoni wetci actek kitci totamekw aniheriw ka ki ici kiskinohamatakw: mocak kitci witcewekw Krist.

²⁸ Ekoci tca, ninitcanicak, mocak witcewakw Krist, tekaci kitci sokikapowiikw takocike, aka kaie kitci waneritamokw e ki patahamokw, wapatamokwe aniheriw ke kicikarik pe takocike.

²⁹ Ki kiskeritenawaw icikowisk e iteritakositc Krist. Kaie kirawaw tca ki ta kiskeritenawaw ohwe: kaskina awik icikowisk ka iteritakositc, Kice Manitok itekera ki otci nitawikiw.