1 Jean 1 - Kice Manito Ocki Omirwatcimowin

Anahwe ka icinikatakaniwitc “Itewin” miriwew pimatisiwiniw

¹ Anahwe ickotok ka ki pe tatc, ni ki petawanan, ninan tipirawe ni ki wapamanan, ni ki kanawapamanan, kirika ni ki takinanan: enko anahwe Itewin ka icinikatakaniwitc, pimatisiwiniw ka miriwetc.

² Ki pe takociniw ota anahwe. Ni ki wapamanan kaie. Ni tipatcimanan tan mia e iciwepasispan. Ekoni kaie wetci tipatcimoctatak anahwe ka pakitinak kakike pimatisiwiniw, ka witci tacikemaspan Kotawinowa, kirika ka ki pe mirikoikw kitci kiskerimokw.

³ Anihe ka ki ici wapatamak acitc ka ki ici petamak ki ki tipatcimoctatinan. Ekoni tca tapickotc ke otci mamweritakosiikw, aci meka e mamweritakosiikw kirika Kotawino acitc Okosa Cecoc Krist.

⁴ Ki masinahamatinawaw ohwe kitci micta mireritamokw.

Mia wactenamakan iteritakosiw Kice Manito

⁵ Enko ohweriw tipatcimowiniw ka ki petawakitc Cecoc Krist e pe witak, kaie ninan tca ka witamatak: mia wactenamakan iteritakosiw Kice Manito. Nama takoniw wir e tipiskarik.

⁶ Kecpin e iteikw, “Ki mamweritakosinano kirika Kice Manito,” mekwata aric kiapatc mia e ici tipiskak e pimatisiikw, ki kiraskinano. Nama tapwewinik ki otci pimatisinano.

⁷ Kecpin aric ka ici wactek e ici pimatisiikw, mia wir tipirawe Kice Manito e ici taciketc, aci tapwe ki mamweritakosinano, kirika ki mirikowinano tekaci aka kitci takok kipactatowinino, osam Cecoc, Kice Manito Okosa, e kasihamatokw, e ki pakitinak omikw kitci ki kasihamakoikw.

⁸ Kecpin e iteikw, “Nama ki pactatinano,” ki wecimitisonano, nama kaie takon tapwewin kitehinak.

⁹ Kecpin aric mocak kopesiwikwe kipactatowinino, ki ka ki asperimototawano Kice Manito, icikowisk e iteritakositc. Ki ka kasihamakono kipactatowininariw acitc ki ka maninamakono kaskina ka maratanik e ici takonik kitehinak.

¹⁰ Kecpin aric e iteikw aka e ki otci pactatiikw, kekatc mitowi e iteikw, “Kiraskiw Kice Manito,” nama kaie takoniw otitewin kitehinak.