1 Corinthe iriniwok 3 - Kice Manito Ocki Omirwatcimowin

Ka atoskectawatcik Kice Manitowa

¹ Niwitcicanak, ani apitc ka pe icaian neta e ici tacikeiekw, nama moci ki ki otci aiamihitinawaw mia ko e ici aiamihakik kotakihik ka pitciteheckakotcik Miro Manitowa. Nitowatc ki ki aiamihitinawaw mia e ici aiamihakik iriniwok ota askik aka ka kiskerimatcik Kice Manitowa. Mitowi awacak kit iteritakositawaw kitcitcakociwak itekera, pitcerak e ki kitcipariekw kitci nosanehwekw Krist.

² Mitowi ocki awacic, tepirak tcotcocanaporiw e mirakaniwitc kitci ki pimatisitc, aka moci e tipi asitatisitc mitcimiriw kitci acamakaniwitc, peikon kirawaw nama moci kit ickwa aikatawaw kitci miritakok ka arimak kiskinohamakewin. Tapwe wirata, wawatc anotc peikon nama ki kackitanawaw kitci natotamekw.

³ Kiapatc meka kit ici pimatisinawaw mia e ici pimatisitcik iriniwok aka ka tapwerimatcik Kice Manitowa ota askik. Ki otcinawekerimitinawaw kirika ki kikatonawaw. Ekote ni e itatisiekw kaie kirawaw mitowi iriniwok ota askik aka ka tapwerimatcik Kice Manitowa.

⁴ Atita neta e taciekw itewok: “Ni tiperimikw Pwar.” Kotakihik itewok: “Ni nosanetawanan Apollos ka ki ici kiskinohamaketc!” Ekoni peikon e itatisitcik iriniwok ota askik aka ka nosanehwatcik Kice Manitowa!

⁵ Tan mia e irapatisitc Apollos? Tan tca e irapatisian nin Pwar? Tepirak nit atoskectawanan Kice Manito, ka ki mirikoiak kitci witcihitak kitci tapwerimekw. Tato neta e taciak ni otamironan kotc e ici nataweritak Teperitciketc.

⁶ Papitoc nit irapatisinan, mitowi kitike iriniwok tapickotc ka otamirotcik kitikan askik kitci mirokinik okitikaniwaw, papitoc e irapatisitcik. Nin Pwar ni ki matce kitikan kitehiwak. Minawatc wir Apollos, mia tarasak e sonipatak kitikaniw. Wir aric Kice Manito ka ki matcekitatc kitci mirokinik.

⁷ Anaha ka matce kitiketc kaie anahwe ka sonipatak kitikaniw, nama orina kicteritakosiwok. Kice Manito wir ka matcekitatc kitikaniw, wir tepirak kicteritakosiw.

⁸ Anahwe ka matce kitiketc kaie anahwe ka sonipatak tapickotc asiteritakosiwok. Kice Manito kata cawerimew tato nta e taciritci ka ici kackitamatisoritci, kotc ka itotiskeritci e otamiroritci.

⁹ Nin kirika Apollos, tapickotc ni otamironan e atoskectawakitc Kice Manito. Kirawaw kit iteritakosinawaw mia okitikan aski Kice Manito. Kaie tca tarasak Kice Manito omikiwam e ki tcimatakaniwonik e iteritakosiekw.

¹⁰ Nin ni ki mirikw Kice Manito omirotehewin kitci kackitaian e asinikanikitcikeian kitci ki miro manikaniwok. Aci kotakihik iriniwok taci otamirowok neta mikiwamik. Aric acteriw tato nta e tacitcik kitci aiekwamisitcik e ici maniketcik.

¹¹ Aci meka Kice Manito ickwa ocitaw ke ici teticterik mikiwamiriw ke ocitakaniwonik. Anahwe ke ici tetictek mikiwam, Cecoc na ka arimomakaniwitc. Nama takon kotak tetihikan ke ici actek.

¹² Atita apatcitawok osawo coriariw kaie coriariw kekotc ma asiniwa ka misakitakosiritci e ocitatcik mikiwamiriw ite ka ici teticterik. Minawatc kotakihik, mictikw kekotc napakitokwa kekotc ma mackociriw apatcitawok.

¹³ Kaskina tato nta e tacitcik kata nokoniw tan mia ka ici matcitc, takociparinike aniheriw ke kicikarik kitci tipaskonikaniwonik. Anihe otcitciparike e kicikak, Kice Manito kata nta kiskeritam tato nta e taciritci otamirowiniw, ickoteriw kitci totak, kitci wapatahiwetc e asiteritakonik, e mirwacinik kekotc ma e maratanik.

¹⁴ Kecpin tca kiapatc e mirwacinik omanikan, misawatc e ickwaterik, kata otitiko aniheriw ka ki ici kackitamatitisotc.

¹⁵ Kecpin aric e ickwaterik omanikan awik, kaskina kekociciriw kata onitaw. Aric wir tipirawe kata akwacimakaniwiw. Mia mitowi e ki capotoweckak ickoteriw e ki wikotcihotc ke iteritakositc.

¹⁶ Ki kiskeritenawatake mia mitowi Kice Manito okitci aiamihe mikiwam e iteritakosiekw, kirika Kice Manito Omiro Manitoma e tacikeritci kitehiwak.

¹⁷ Kecpin awik e pikotatc Kice Manito okitci aiamihe mikiwamiriw, Kice Manito kata kicakonew anihi iriniwa. Kitcitwaweritakoniw meka Kice Manito okitci aiamihe mikiwam. Kirawaw tca kit iteritakosinawaw Kice Manito okitci aiamihe mikiwam.

¹⁸ Ekwa kitci onipititisoekw. Kecpin awik iteritake “nimiro mitoneritcikanin,” kotc e iteritakik iriniwok ota askik, kirawe kata miroparinipan kitci iti “pisinateritak,” ekoni tapwe kitci ki omiro omitoneritcikanitc.

¹⁹ Kotc e ici mamitoneritakik iriniwok ota askik, Kice Manito wir wapatam e pisinateritomoritci omitoneritcikanik itekera. Ekoni meka e itemakanik Omasinahikan: “Kice Manito katcitinew awiriw ka iterimitisoritci ‘ni omiro omitoneritcikaninan’ wirawaw tipirawe e ici wecimiweritci.” Job 5.13

²⁰ Itemakan kiapatc: “Teperitciketc kiskeritam kaskina otiteritamowiniwariw iriniwa ka iterimitisoritci ‘ni omiro omitoneritcikaninan.’ Kiskeritam aka wiec e irapatanik.” Psaumes 94.11

²¹ Nama tca actew awik kitci mirwatcimatc kotak iriniwa, kitci itikotc mawotci kicteritakosiriw kitci ki nosanehwakaniwiritci okiskinohamakewiniw. Aci meka kaskina ki ki ickwa mirikowinawaw.

²² Ninan Pwar, Apollos kaie Pien, kaskina e taciak ki ki mirikowinawaw kitci witcihitak. Aski, pimatisiwin, nipowin, anotc mekwata ka iciwepak kirika nikanik ke iti isparik, kaskina anihe kirawaw otci, ki ki mirikowinawaw kitci witcihikoiekw.

²³ Kirawaw aric ki tiperimikowaw Krist, mitowi Krist ka tiperimikotc Kice Manitowa.