A Jun Bit Manxa Watx'ilok 5 - A Txꞌan Biblia Yin Kꞌanjobal 1989

Chi yal nak:

¹ Lanan woctok xol wawoj ach wetbi camc'ulnebil. Lanan wion aj in mirra c'al in perfume, lanan wablen yal cabil no akan, lanan wuq'uen in vino yetok in leche, ẍi nak. Ex wamigo lowanek, uq'uek a', uq'uek jantak che yochej, ẍi eb.

Chi yal eb amigo: Yet is can makan Chi yal ix k'opoj:

² Waynak in elok, palta iquisc'al in nabal. Max wabeni tol a nak in camc'ulnebil chi awji bay puerta: Jak in octok ach in camc'ulnebil; ach k'opoj, lajan ach axca no cakmu, tol c'am jabok a tacnakil. Caw wal ch'acan in jolom yuj yal ak'bal. Caw wal chi el jil-labok yal ak'bal tu' yin xil in jolom, ẍi nak ayin.

³ Mayal wiel in pichil; ¿tom ok waoc junelxa? Mayal in tx'aj wakan; octa pax pokok yin junelxa, quin chi bay.

⁴ A nak in camc'ulnebil tu', max yaoctek nak k'ab bay yolanil puerta. Caw wal max in aj jucnaj yuj.

⁵ Yuj tu' max in aj wan in jakon octek in camc'ulnebil tu'. Toxac'al max el t'ujlabok mirra yin in k'ab, max occan yinlak tz'utz'al puerta. A wal yet max waben k'anjabi, ijanxac'al tol max in cam max wabej.

⁶ A yet max in jakon puerta bay nak in camc'ulnebil tu', c'amxa ec' nak. Max in sayic'ok, majxa ilchaj wuj; max wawtej, palta majxa tak'wok ayin.

⁷ Max in chaloj yuj eb nak patrulla chi ec' taynen conob; max in is mak'on yasjok eb nak. Caw wal yobxac'al max yun yion el eb nak chi taynen puertail conob in k'util.

⁸ Ex k'opoj aj Jerusalén, ak'ek e ti'; ta chi ilchaj nak in camc'ulnebil e yuj, alek bay, tol ayin ti' c'amxa chi techaj wuj in camc'ulal yin nak, quin chi bay eb.

⁹ ¿Tzet yetal watx'il nak a camc'ulnebil tu' ayach, ach ix tol watx'xac'al eli yintak eb ix ix watx' yili? ¿Tzet-xac'al is watx'il jun a camc'ulnebil tu', xan toxac'al cha k'an ayon tol chi jak' co ti'? ẍi eb ayin.

¹⁰ A nak in camc'ulnebil tu', sak nak, cax cak wak'inak yili; caw wal watx' yili yintak 10,000 winak.

¹¹ A is sat nak, lajan wal yetok oro caw wal watx'; a xil jolom coxquiltak, k'ek yili axca no joj.

¹² A is bak' sat, lajan wal axca no cakmu chi ec'jabtok tilak aej, axcaxac'al tol xol leche chi achinwi no', ti najabil a' aej tu' chi ay pakan no'.

¹³ A wal paq'uil-lak sat, axca wal junok awoj bay ay an ac'un manxa watx'ilok yoc jabil. A wal xak is ti', lajan wal axca junok an xumac watx' yoc jabil.

¹⁴ A is k'ab, lajan axca junok xoyan oro ayoc ch'en topacio yin; a is c'ul, axca wal ch'en marfil nululixac'al, tol ayoc ch'en zafiro yelbubok.

¹⁵ A wal yakan, lajan wal axca cabok oy naba mármol ayay yiban cabok yich tol naba oro watx'; axa yili, lajan wal axca te c'ute' ay bay Líbano, tol sic'bil elok.

¹⁶ A wal is k'anej chi yala', manxa chialok chi jabej, caw wal watx'c'al nak yin masanil. Caywal tu' yili nak in camc'ulnebil ex k'opoj aj Jerusalén, quin chi bay eb.