A Jun Bit Manxa Watx'ilok 1 - A Txꞌan Biblia Yin Kꞌanjobal 1989

¹ A wal jun is poesía cham Salomón manxa watx'ilok ti'.

Babel Makan Chi yal ix k'opoj axca ti':

² Tz'ubc'al el in ti' ach in camc'ulnebil. Yelxac'al watx' a camc'ulal chi wab yintak vino.

³ Manxa watx'ilok yoc jabil perfume en, a wal yet chach binaji, lajan wal chi wab axca yel jabil perfume. Yuj tu' xan tok ay junok eb ix k'opoj tol c'am chach camc'ulneni.

⁴ Iintok etok yin aymanil, iintok bay a cuarto xin ach wajawil, ẍi ix. Manxa tzalojc'ulalok chon ayji ec' etok; caw wal ok jochej a camc'ulal yintak vino. Yuj tu' xan xiwil chi camel c'ul eb ix k'opoj en, ẍi eb.

Chi yal eb amigo: Chi yal ix k'opoj axca ti':

⁵ Ex ix aj Jerusalén, ayin ti' k'ekmak'inak wili, palta watx' wili; k'ek wili axca wal yili manteado bay Cedar, watx' wili axca yili cortina yul yatut cham Salomón.

⁶ C'am chex ocxac'al t'anan win, yujtol k'ek wili, yujtol tz'anak in yuj yakan c'u. A eb nak in nuej max tit yowal eb win, max in yaon oc eb yin in taynen awoj uva, yuj tu' xan max in bek ilnej in ba.

⁷ Ak' wojtaknej el ach in camc'ulnebil, ¿baytal chach ilwi calnel? ¿baytal chetok no' yebaj ba yet chuman c'u? ¿Tzet yuj xan tol chin ec'jab axca junok ix ix tol toc'al chi ec'jab xol eb et ilom calnelal? ẍi ix.

Chi yal eb amigo:

⁸ Ta man ojtakok ach ix tol yelxac'al watx' eli xol eb ix ix watx' yili, tzaklojan yintak yakan no calnel, a bay tu' chel no' a yunetak chiwo, bay cawilal is lanchu eb ilom calnel tu', ẍi eb.

Chi yal nak:

⁹ In camc'ulnebil ach, lajan ach chi wil axca junok no' k'opoj chej chi ec' xol is carruaje faraón.

¹⁰ Watx'xac'al yili a sat nan xol yu a txiquin, watx'xac'al yili a nuk' bay ayoc ch'en uej.

¹¹ Ok co watx'nej yu a txiquin naba oro, ok oc ch'en plata yelbubok, ẍi nak.

Chi yal ix k'opoj:

¹² Yak'ban chotan ay wajawil bay is meẍa, axa an nardo chi el sumumok jabil win.

¹³ A in camc'ulnebil lajan wal chi wab axca junok tx'uy an mirra, tol a wal bay txam in c'ul ayic'ok.

¹⁴ A wal in camc'ulnebil lajan wal axca junok yuchan an alheña chi ch'ib bay En-gadi, ẍi ix.

Chi yal nak:

¹⁵ Manxa watx'ilok eli ach in camc'ulnebil, caw wal watx' eli. Lajan yili a bak' sat axca yili no' cakmu, ẍi nak.

Chi yal ix k'opoj:

¹⁶ Caw wal watx' eli ach in camc'ulnebil, caw wal watx' eli. A wal an yax ac'un ok oc co wayubok, ẍi ix.

Chi yal nak:

¹⁷ A te c'ute' ok oc axca patzabilok co na, axa te q'uisis ok oc axca is patilok, ẍi nak.