Salmos 8 - A Txꞌan Biblia Yin Kꞌanjobal 1989

SALMO 8 A is mayk'ak'al Dios, yetok is satak eb anima

A ton bit David ti'

¹ ¡Mamin Jehová, Jajawil ach! Axac'al oc a mimanbilal chi binaj bay masanil yulyibank'inal, ca c'apax tu' bay satcan, chi al-lay watx' k'anej en.

² A eb unin, c'al eb chi txutxwi, cha k'anbalnej eb yin yalon el epalil yailokc'al eb ajc'ul oc en, yet watx' chi tz'inji eb ajc'ul, c'al eb ec'nakwom tu'.

³ A wal yet chi wilon ajtok satcan, tol ach wal caw max a watx'nej, xajaw c'al waycanlak max ak'canok,

⁴ chin naon yul wet: ¿Tzet jelapnok ayon anima on ti', xan chon a natek, cax nanon yec' a c'ul yuj co watx'ilok?

⁵ Yin yaynakilal janic'ok yintak eb ángel max con ot a watx'neni, palta max ak' mimanbilal c'al mayk'ak'al ayon.

⁶ Max ak' jikbej yiban onben. Max acan oc masanil tzet yetal watx'nebil oj yul co k'ab.

⁷ A yul co k'ab ay no calnel, no wacax, c'al masanil no c'ultakil no',

⁸ c'al masanil pojanil tz'iquin chi ec' satcan, c'al masanil pojanil txay yul a' mar, c'al masanil tzet yetal chi ec' yul a'.

⁹ ¡Mamin Jehová, Jajawil ach! ¡Axac'al oc a mimanbilal chi binaj bay masanil yulyibank'inal!