Salmos 74 - A Txꞌan Biblia Yin Kꞌanjobal 1989

SALMO 74 Chi k'anlay bekchaj el eb conob

A ton bit cham Asaf ti'

¹ Ach Dios, ¿tzet wal yuj xan max on a bekc'alcanok? ¿Tzet wal yuj xan max aj can yowal a c'ul yin a conob ti'?

² Natek a conob xin. A' max e' yettax payxa. A' max a colcan el yet chi oc a conobok. Natek tzalan Sión bay cajan achc'alta'a.

³ Sebach cax chelon juntzan max uchlay ay yin junelnej ti'. A eb ajc'ul max uchon c'ay masanil bay a templo.

⁴ A eb ajc'ul oc en, max el yaw eb bay a templo, yujtol max ayc'ay yuj eb, axa bandera yet conoblak max yiaj eb bay tu'.

⁵ Axca tol siwom eb xolak te',

⁶ max low echej c'al martillo yin chem te' ayoc yul templo, max c'aychaj el is watx'il yili yuj eb.

⁷ Max yaoc eb k'ak'al a templo. A na bay chi oc ayilal ayach max yetnejtok eb. Max aycan bulan sat tx'otx' yuj eb.

⁸ Max na eb on yak'on c'ayilok. Max yaoc eb k'ak'al bay masanil lugar yul co nación, bayc'alta' chi co waj co ba on, yin jak'on ayilal ayach.

⁹ C'amxa chi txecloj junok tx'oxbanil a watx'c'ulal, c'amxa junok a chekbej co xol, tamwal jojtak tinani' jantakto tiempoal ok yak' jun ti'.

¹⁰ Ach Dios, ¿jantaktoc'al tiempo ok on tx'emlay yuj eb ajc'ul ti'? ¿Bak'in ok bek eb yalon yobal k'anej en?

¹¹ ¿Tzet wal yuj xan cha c'ubaj el a k'ab? ¿Tzet wal yuj xan c'am chak' ep ak'on lajwok el eb?

¹² In reyalil achc'alta' yettaxc'al yalantok. Ach in Diosal, xiwil bay max ayc'ay owal juj yuj a colwal.

¹³ Ach max a poj nan a' mar yuj epalil. Max a mak' poj jolom no' mimek no' yul a' mar.

¹⁴ Max a tec'ay jolom no' miman Leviatán, cax max ak'on bay no chiom no' bay tz'inan tx'otx'.

¹⁵ Ach max ak' ajol nuk'lak aej chi el yakan, cax max ak'on tan a' mimek aejlak c'amc'alta' chi tani.

¹⁶ Ach ay et c'ualil c'al ak'balil, ach max acan oc yip xajaw c'al c'u.

¹⁷ Ach max acan oc mojonal yulyibank'inal. Ach max a watx'nej c'atxan c'al nabil k'inal.

¹⁸ Mamin Jehová, nac'altek tol a eb ajc'ul chach tx'emoni, chi ec' yiban eb yobtakwom ach yintaknen elok.

¹⁹ Manchak ach ec' yiban Mamin yin on tojcan c'ayc'ulal oj. Tx'okxa co c'unal axca no cakmu. Manchak on acan oc yul k'ab no chiwajwom no'.

²⁰ Manchak tojcan c'ayc'ulal a trato jetok on, yujtol a bay masanil eb a conob ti' max aj can yaxc'aynakil eb ajc'ul.

²¹ Man a bek etax eb aycan yalan. Bitnokokab eb meba' ayach, c'al eb ok'bal c'ul.

²² Ach in Diosal, ajan wanok, col a ba, naokabtok a c'ul, tokwal chi bek eb chi ec' yiban ach tx'emoni.

²³ Manchak tojcan c'ayc'ulal oj is yaw eb ajc'ul oc en. Xiwil chi aj can yel yaw eb chi ec' yiban ayach.