Salmos 44 - A Txꞌan Biblia Yin Kꞌanjobal 1989

SALMO 44 Chi k'anlay colwal Dios

A ton bit eb yinatil Coré ti'

¹ Ach co Diosal, max jab wal on, yujtol a eb jichmam max alon ayon tzet max on yetok eb yet payxa.

² Yetok epalil max oktej el eb conoblak, max a c'ayoncan el eb mimek conoblak tu', axa eb jichmam on max a cajbaj cayti'.

³ Manak yipalil eb, tamwal is yespada eb, max yak'balnej yuj yion eb jun tx'otx' ti'. Maj yi' eb jun tx'otx' ti' yin ak'oj owal. Palta a epalil max ak'on ayc'ay owal tu', yujtol ayach ec' yetok a mayk'ak'al, yuj a camc'ulal yin eb jichmam on.

⁴ Ach in Diosal, in Reyalil ach. Oj xan chi uj yuj a conob.

⁵ Ach ton chach oc jetok, xan chi ayc'ay eb ajc'ul juj. Yuj epalil xan max ayc'ay eb max yak' yowal jin on.

⁶ Tokwal a in julbal ti' ok waoc yipok in c'ul, tokwal yuj wespada ti' ok wak' ayc'ay owal.

⁷ Oj ton wali xan max ayc'ay eb ajc'ul juj. Ach max ak' ayc'ay eb chi chichon oc c'ul jin on.

⁸ Asan en ok jak'c'al tzaloj co c'ul, asan ach ok ach co bitnejc'al.

⁹ Palta max on entaknej el Mamin, max on acan oc yalan q'uixawc'ulal. Tok chito yal a c'ul chach eltok yetok eb co soldado on.

¹⁰ Ach max on a bekcanok, xan chon elcan aj bay eb ajc'ul. A eb chi chichon oc c'ul jin on, max yitok eb co tzet yetal.

¹¹ Max on acan oc yul k'ab eb. Axca tol calnel on, chon ilaytok bay cambal. Max con a saklemnejcantok xol eb conoblak.

¹² Max on a txoncan el ayon a conob on ti' yin yetzan. Tokwal ay tzet yetal max e' yuj on a txonon elok.

¹³ Max on acan oc yin buchbejalil. A eb nacionlak ay co cawilal chon tx'emoni, cax c'am jelapnok yul sat eb.

¹⁴ Max on acan oc yin buchbejal bay eb conoblak. A yet chon yilon eb, chi yucon eb jolom yin buchwalil.

¹⁵ C'am junok txolan tol watx' jet. Mul yail eb ajc'ul, xan chon ayxac'al nojan yuj q'uixawc'ulalil.

¹⁶ Chi pak ba eb jin. Chon is tx'emon eb, c'am jelapnok bay eb.

¹⁷ Tix ton tzet chon on ti'. Chi tit jun ti' jiban on, man yujok tol max ach tojcan c'ayc'ulal juj. Ilab tol yikem onc'al yin a trato ayon.

¹⁸ C'am chi co na' a tojcan c'ayc'ulal juj, ma ach co bekon canok. Tok ay a be chi co bekcanok.

¹⁹ Caxc'al axca tu' ach chon acan oc yalan majilal, max on a makchej ay xol k'ekk'inal tol ay is may.

²⁰ Ach co Diosal, tatol max ach tojcan c'ayc'ulal juj, axa bay comon dios max jiay co ba a q'uexelok,

²¹ xam wal on eltek, tok ay ewanc'uan tol man ojtakok.

²² Palta xin, oj wali xan junjun txolan ijan chon yak' cam eb, axca calnel chi ilaytok yet chi cami, caytu' chon yut eb.

²³ Mamin, ¿tzet wal yuj xan axca tol chach wayi? Ilontek xin, c'am chon entaknej el yin junelnej.

²⁴ ¿Tzet wal yuj xan chebaj el a ba ayon? ¿Tzet wal yuj xan chon tojcan c'ayc'ulal oj xol co miman yailal?

²⁵ Mayal el jip, c'amxa tzet chi jala', tol ipan co jutxontok co ba sat tx'otx'.

²⁶ ¡Ajan wan xin, sebach. Colon el yuj a miman camc'ulal, cax chon bekchaj elok!