Salmos 41 - A Txꞌan Biblia Yin Kꞌanjobal 1989

SALMO 41 A is txaj jun ya'ay

A ton bit David ti'

¹ Watx' yet mactxel chi naon eb ok'bal c'ul. A Jehová ok colon el xol yatakilal.

² A Cham ok taynenok, cax ok yak'on cawil, c'al tzalojc'ulal yet ayic' sat tx'otx' tx'otx' ti'. Man ok yacan oc bay yochwan eb ajc'ul oc yin.

³ Ok alay oc yip xol ilya' yuj Jehová, axa ok yunajok, ok jay c'ul.

⁴ Ayin ton max wala': Ok' a c'ul win Mamin Jehová. Antej in, yel toni ay in mul ayach, quin chi.

⁵ A eb ajc'ul oc win chi yal eb yobal win: ¿Bak'in wal ok camok, cax manxa ok nalayok? ẍi eb.

⁶ Chi jay eb ulail ayin, palta man yinok watx'c'ulal chin ul yil eb. Masanil tzet chi yil eb win, chi c'ubaj eb yul c'ul, axa yulak be chi yalcan el eb in k'umal.

⁷ A eb c'am chin ocheni, chi waj ba eb, cax chi yalon eb in k'umal. Yob chi na eb win.

⁸ Chi yalon eb: A is yilya' jun ti' c'amxa yanil. Mayal toj sat tx'at, majxa jay c'ul, ẍi eb.

⁹ Toltax a junok eb in watx'il anima, yipxac'al in c'ul waloni, junej chi low wetok, a' max oc ajc'ulal win.

¹⁰ Axa ach Mamin Jehová, ok' wal a c'ul win. Iin aj wanok, cax ok wion ec' in pak bay eb.

¹¹ A yin jun ti' ok nachaj el wuj tol max wak' tzaloj a c'ul, ta manchak tzaloj aj c'ul eb ajc'ul oc win.

¹² Axa pax in xin, tol max in beytek yin tol c'am in mul, iin aj yetok a k'ab. Ayinokabc'al ec' a satak.

¹³ Al-layokab watx' k'anej bay Jehová co Diosal ayon Israel on ti', tinani', c'al yin tojbalk'inal. Yunokabi.