Salmos 128 - A Txꞌan Biblia Yin Kꞌanjobal 1989

SALMO 128 A tzet yetal chi yak' Jehová

Bit yet chi ajtok eb israel bay Jerusalén.

¹ Watx' et, mac ach ay yelapnok Jehová yul a sat, cax ikem ach bay.

² Yin tzalojc'ulal ok a lo' sat awoj, cax watx' ok ach elocok.

³ Axca wal satni an uva yinlak atut tol xiwil sat an, caytu' yayji etbi. Axca wal wol te olivo, caytu' ok yun eb oninal yinlak a meẍa.

⁴ Caywal tu' ok yun yak'on Jehová watx'c'ulalil bay mac ay yelapnok Cham yul sat.

⁵ Yak'okab Jehová watx'c'ulalil ebantac'al bay tzalan Sión yet iquis ach. Yilokab a sat is watx'c'ulalil yin Jerusalén junjun c'u.

⁶ Yilokab a sat e a txiquin. ¡Ayokab junc'ulal jiban ayon Israel on ti'!