Salmos 114 - A Txꞌan Biblia Yin Kꞌanjobal 1989

SALMO 114 Nabaniltek yet max el eb israel bay Egipto

¹ A yet max eltek Israel, is yinatil Jacob bay Egipto, a ton bay jun conob tx'ok is ti',

² a Judá max occan cajlobalok Jehová, axa yin Israel max yajawbi Cham.

³ A yet max yilon a' mar yin Cham, max elcan aj a'. Axa a' miman Jordán max meltzoj yintak.

⁴ Axa witzlak c'al tzalanlak max aj t'uklabok axca no chiwo, c'al axca yune' calnel.

⁵ ¿Tzet max on a' mar, xan max eli? ¿Tzet max on a' Jordán xan max meltzoji?

⁶ ¿Tzet max on witzlak c'al tzalanlak, xan max aj t'uklabok axca no chiwo, axca yune' calnel?

⁷ Bilokab aj tx'otx' tx'otx' satak Jehová, Cham Diosal Jacob.

⁸ Max yieltek Cham jun najab yul ch'en, yulak mimek ch'en max yieltek nuk' aejlak.